East Bengal – ah Anto leh Vineeth ?

Season thar atanga ISL khelh tum East Bengal chuan Indian footballer zinga tawnhriat nei tha pahnih Rino Anto leh CK Vineeth te chu an lalut dawn niin an sawi.

Kum 32 a upa Tata Football Academy – a ‘Best Gentleman Cadet’ lo ni tawh Anto hian season liam ta khan Bengaluru tan vawi khat chiah a khel a, ‘star player’ a nih thinna hmunah a khel phak lo. ISL nomawi chawi tawh, Indian defender zinga tawnhriat ngah ber pawl hian East Bengal pan hi a hreh lo niin an sawi.

Vineeth hian season liam ta khan Jamshedpur tan game 10 khelin goal 1 chauh a thun a, tunhmaa forward hlauhawm ni thin khan beisei a pha lo. Indian footballer zinga hlawh hnem ber ni tawh Vineeth hian season tharah intuaihriam nan chona thar hmachhawn hi a hreh a rinawm loh.

Player pahnih te hian tunhmain Bengaluru FC tan I-League nomawi vawi hnih lo chawi dun tawhin Kerala Blasters tan pawh an lo khel dun tawh a ni.