East Bengal -ah Dudu a kir

Indian football-a foreign striker langsar ber pawl ni thin Dudu Omagbemi chuan a club hlui Kingfisher East Bengal a zawm.
 
Nigerian striker hian vawiin khan Kolkata a thleng a, East Bengal-ah hian Brazilian striker Charles D’Souza a thlak dawn a ni. Hmatawng tha mamawh East Bengal ah Brazilian striker Charles hian beisei a pha lo a, Willis Plaza a inhliam bawk avangin striker goal thun thei an mamawh hle.
 
“East Bengal hian player an nei tha a, I-League ah pawh kan champion theih ka beisei. Club hruaituten ka chunga rinna an la nghat ngam hi ka lawm a, fans te pawh ka tih lawm ngei ka beisei,” tiin kum 32 a upa Dudu chuan beisei a neih san thu a sawi.
 
East Bengal bakah Sporting Goa, Dempo, Salgaocar, Pune City, FC Goa, Mohun Bagan leh Chennaiyin tana lo khel tawh Dudu hi an Polish club tha Wisla Krakow leh Finland club lar Europa League vel a kan hmuh thin KuPS tan hlawhtling takin a lo khel tawh a, 2004-05 season khan National Football League (I-League a la awm lo) ah Top Scorer a lo ni tawh a ni.