ISL club East Bengal leh anmahni sponsor tu Shree Cement te inkara buaina awm chu vawiin khan chin fel a nih thu West Bengal Chief Minister Mamata Banerjee chuan a puang.
“Engkim peih fel a ni ta. Vawiin hian ka hlim khawp mai. An inrem theih loh avang hian ISL an khel thei ang em tih kha a chiang lo reng a, tunah chuan a fel ta vek e,” tiin an state secretariat Nabanna atangin Mamata hian East Bengal leh Shree Cement te inremna thu hi a puang.
“East Bengal hian ISL an khelh loh chuan an fan mi nuaih tam tak hian tan tur an nei dawn si lo. An club hian football khawvelah hlutna sang tak an nei a, vawiin hian East Bengal chauh ni lo an hmelma Mohun Bagan fan te thlengin an hlim vek ka ring,” a ti bawk.
Tarlan tawh angin East Bengal leh Shree Cement te hi hun rei tak chhung an inrem theih loh avangin vawiin khan Mamata hian club leh company aiawh te hi a ko a, Shree Cement aiawhin an company secretary SS Khandelwal, chief finance officer S.Jaju leh senior manager Sandeep Kumar te an tel a, top official pahnih Debabrata Sarkar leh Sadananda Mukherjee te’n East Bengal ai an awh.
Vawiinah inrem thei mahse Indian football transfer hun a tawp tep a, an player tha engemawzatin club dang an zawm tawh bawk nen, East Bengal hian nasa lehzuala tan an lak a tul dawn niin a lang.
