Economist hriat hlawh tak Jose Maria Gay chuan Europe a football league te dinhmun tawifel takin a sawi a. Goal.com in a tarlan danin Jose hian report a peknaah Europe a league liante chanchin a sawi.

Jose Maria Gay

La Liga chungchang a sawinaah Jose chuan Real Madrid leh FC Barcelona te chauh hian hma lam an pan a. Club dangte hian tun kum nga chhung khan hmasawnna an neilo tih a sawi. La Liga hian ral lam a pan mek a, league dangte aiin kum nga velin an dinhmun hi a hnufual tih a sawi. Spain a an khelmual te dinhmun thalo chu a chhan niin a sawi a. Khelmual a tih hian entute an thathnem tawkloh vang niin a lang.

Premier League chungchang a sawinaah Jose chuan club tamzawkte hi sum lamah an harsa a. Sum an neihloh bakah club neitu (owner) ah an innghah avangin a company thawhpui (holding companies) lakah sum an hloh niin a sawi. Premier League a sum an relbawldan hi ngaihtuah chuan a tha bik lova, La Liga hnung a zui ve thei mai dawn niin a sawi.

Spain leh England ah te football an hlut em em laiin sum hmandan chungchangah fimkhur tawkloh avangin harsatna a thleng thei a. Tuna France leh Germany a an inrelbawl dan hi chu a him tiin Jose hian a sawi. Football hian a ram sum dinhmun a entir zel a, Germany leh France a football a sum che vel hian an ram tan harsatna a thlen dawnloh thu a sawi.