Belgium mi, kum 21 chauhva upa, tunlaia Europe khawmualpui football chanchin luahkhattu Eden Hazard chuan Chelsea a zawm ngei dawnin a lang a. Sap chanchinbute leh webiste-te chuan Chelsea a zawm tur chungchang hi an ziak huai viau tawh.

‘Inkhelhna hmun ka channa tur ngei ka pan ang,’ ti thin mahse, Hazard hian hlawh tamna a zawng tih hai rual a ni lo. Manchester khaw club pahnihah a khawi zawk nge a zawm dawn tih a hriat loh thu te, eng zawk zawk jersey pawh a inhmeh tur thu te a sawi vak vak a. Mahse Lille striker goal khung thei ve tak hian a hlawh tamna ber tura lang Chelsea a zawm dawn chiangin a lang ta a. Chelsea hian a thlawnin an nei dawn lo a ni satliah lova, sum leh pai tam lutuk tak mai seng leh sen belh zel turin an lalut dawn niin a lang.

Hazard-a’n Premier League champion Manchester City leh champion ngun ber Manchester United aia Stamford Bridge a pana chhan hi engnge ni ang? Champions League champion lai an nih vang a ni ber ang em? Chelsea hi Champions League-ah an champion a ni thei a, mahse Premier League-ah Manchester City aiin point 25 in an hniam zawk a, 5-na an ni hram!

Manchester khaw club pahnihte hian nipui insuan hun laia an player lei duh zingah Hazard hi an telh ve ve a, a hnaih pawh an hnaih hman viau, mahse Chelsea a thlang ta zawk a. Lei loh hrim hrim chu ni se thuhran, an hmelma zinga mi Chelsea a pan kher hi a ngeiawm duh ngawt ang.

Mi thenkhat chuan Hazard-a agent John Bico hian sum leh pai a um nasa hle a, ani hian Hazard-a rilru pawh a su hle turah ngaih a ni an ti a. Hazard-a hlawh tur pawh hi an sawi hraw hle a, a tawpah chuan Chelsea neitu Roman Abramovich chiah an phut zat pawisa pe thei tura insawi a awm ta a, chu chu Chelsea a zawm chhan lian ber a nih an ring.

Hazard hian Chelsea-ah hian kum nga daih contract a ziah rin a ni a. Kum nga chhunga Chelsea-in Hazard-a man leh a hlawh leh a behbawm danga an sum hman tur zat chu – pound maktaduai 90 vel zu ni a!

A man atan hian Chelsea chuan Lille club hnenah pound maktaduai 32 an pe dawnin a hriat a. Hazard hi kar khatah pound nuai 2 hlawhtirin, kum khatah pound maktaduai 10.4 hlawhin, Chelsea player zinga hlawh hnem ber (khel tha ber ni chuang lo) Fernando Torres nen an hlawh zat a inang dawn a. Chu mai bakah chuan Chelsea chuan Hazard-a agent Bico chu Hazard-a an lei theih nana sulsutu a nih manah pound maktaduai 6 an pe bawk dawn niin hriat a ni.

Abhu Dahabi billionaire-te enkawl City thuneitute hian Hazard hi kar khatah pound 150,000 (nuai khat leh singnga) hlawh turin an thlem a. France-ah chauh a la inkhel a, season hnih chhungin a che tha a ni mai a. Carlos Tevez leh Yaya Toure-te nena ang khata en nghal ringawt an duh lo a. Chutih lai chuan Sir Alex-a player hip theihna hmanga player lalut thin United pawh hian an pu Alex-a leh Hazard hi mimal takin lo inhmu tawh mahse, kar khatah pound 130,000 bak hlawhtir an tum lova. Chelsea netupa Abramovich hian Champions League-ah a tikimtu nih a duh lova, Europe-a club tha ber ber zinga tel zel a duh avangin hlawh pawh pek a inhuam sang ta ber niin a lang.

Chelsea-in football khelhna hun pek theih an intiam te, Champions League-a an dinhmun te, London khawpui hipna hrim hrim te hi Hazard-a’n Stamford Bridge a pan chhan zinga mi a ni ngei ang a. Chu mai piah lamah chuan a hlawh zat tur hi a chhan lian ber zinga mi a nih ngei a rinawm hle a ni.

Abramovich-a’n kum 21 leka upa, France ram tih loh, Europe hmun danga tawnhriat la nei miah lo player tana heti zat pawisa sen a hreh lo hian Champions League-a tel zel a tumna a lantir rualin, season liamtaa City neituten a aia sum an hmang hnem kha a tha a na deuh a, champions League an lo champion bawk nen, City theih loh theih kha a chak deuh pawh a ni maithei.

Hazard hi Europe-a inkhelh thiam leh striker tha ber pawla ngaih a ni chiang a. England-ah hian rawn inkhelin, khawvela player tha ber zinga chhiar tel a ni dawn em tih chu a la chiang lova. Thil chiang tak erawh chu, kum 21 chauh niin, kar khatah pound nuaih hnih a hlawh dawn tih hi a ni!