Santiago Bernabeu-a El Clasico inkhelah Xavi hnuaia in dinthar mêk FC Barcelona chuan si li faiin Real Madrid an sawp.
He inkhelah hian Barca tân an hmatâwng lâk thar pahnih Pierre-Emerick Aubameyang leh Ferran Torres te chuan an thawhhlawk hle a. Arsenal captain hlui Aubameyang chuan goal hnih khungin league game 7 a khelhah goal 7 a khung ta a, Ferran Torres pawhin Barca tana league game 8 a khelhah goal 4 khungin assist vawi 3 a nei tawh bawk a ni.
Inkhel pumpui thlirin Catalan club hian inkhel an thunun a tih theih a. Goal 4 lai khung mahse goal ngei tura ngaih Aubameyang leh Torres ngêite pawh hian an hlah a. An chance ṭha hmuh thun vek se chu goal 6/7 vel khung thei tur khawpin Barca hi an khêl ṭha a ni.
Real hian goal zâwnah vawi 4 pêt ve bawk mahse clear chance kan tih, goal khung ngei tura ngaih ang kha vawikhatmah an nei lova. First half-ah Vinicius Jr. chuan penalty hlawhchhuak ngei tura a inngaih laiin referee in pe lova, amaherawhchu hei hi replay en chuan referer thutlukna a dik hmel thung a ni.
Carlo Ancelotti teamte an tlarhnung an sawngnawi hle a, Barca in an nawr in an talbuai zel emaw tih turin an nghîng a. Xavi teamte lah an phûr tulh tulh mai si a. La Liga a Xavi’n El Clasico a hmachhawn hmasakberah manager tawnhriat ngah zawk Carlo Ancelotti teamte a tukdawl dêr a ni.
Barcelona hian an hmelma club hi hneh mahse La Liga-ah point 11 laiin Real Madrid leh Barcelona hi an la inthlau a, chutihrual chuan Barca hi game khatin an khêl tlêm thung a. Real hian game 9 khelh hmabak la neiin Barca hian game 10 khelh hmabak an la nei a, chhiarkawp dân chuan la in lehthal thei meuh mahse thil harsa tak chu a ni tawh maithei a ni. Amaherawhchu thil thleng thei lo tawp erawh a ni lo ve.
Real Madrid 0-4 FC Barcelona (FT)
Pierre-Emerick Aubameyang 29′ 51′, Ronald Araujo 38′, Ferran Torres 47′
