Kan nghahhlelh El Clasico chu kan nghakchhuak ta a, nghah man a va awm tehlul em. Inrinni zanrei-a La Liga inkhelah Real Madrid chuan khualmualah an hmelma kumhlun Barcelona chu 2-1 in an hneh a, an kut khingkhatin La Ligo nomawi an dawm thei ta. He inkhelah hian Sami Khedira leh Cristiano Ronaldo ten Real Madrid tân an thun a, Barcelona goal awmchhun hi Alexis Sanchez thun a ni.

He inkhel en tur hian khawvel vir lai meuh pawh a ding ta ve ang tiin sapram chanchinbu chuan an ziak a, an ziak uar lo. Football khawvelin hei aia ‘rivalry’ ropui min hlui tur a nei chuang lo a, Spain-a team ṭha ber pahnih hi khawvela team ṭha ber pahnih tho an ni. Tun dinhmunah, khawvela footballer ṭha ber ber panga thlangchhuak dawn ila, heng team pahnih aṭang bak hian thlanchhuah tur an awm chuang lo.

Inrinni zana El Clasico hi El Clasico pangngai a ni lova, Spanish La Liga ‘final’ a ni tel bawk. He inkhel result hian La Liga champion tur a hril ruih thei a, Barcelona in chak ngei ngei an mamawh a, point 4 a an phak loh Real Madrid hi hneh ngei tumin an lo mikhual a, field chhung an lut ta.

Team Lineups:

Barcelona tlarhnungah Pique tân hmun a awm lo a. Fabregas aiah Thiago Alcantara chuan midfield-ah bul a ṭan bawk. Inhliam damkawr Alexis Sanchez aiah Tello lutin, dan pangngaiin 4-3-3 in an rawn inrem. Real Madrid tân big game experience ngah Kaka a start lo a, Bayern Munich laka khel chhe tak Coentrao chu Marcelo aiah left back ah a awm. Mikhual lam hi Jose Mourinho formation ngainat ber 4-2-3-1 in an rawn inrem a ni.

Barcelona (4-3-3): Valdes; Alves, Mascherano, Puyol, Adriano (Pedro 74′); Xavi (Sanchez 69′), Busquets, Thiago; Tello (Fabregas 81′), Messi, Iniesta

Real Madrid (4-2-3-1): Casillas; Arbeloa, Pepe, Ramos, Coentrao; Khedira, Xabi Alonso; Ronaldo, Ozil (Callejon 89′), Di Maria (Granero 74′); Benzema (Higuain 93′)

A hmuhnawm nghal pup pup

Inkhel an ṭan a, Nou Camp-a thum hum hum mai a, inkhel en zawng zawng an au vek emaw tih mai turin a bengchheng. Team pahnihte an innawr nghal pawp pawp a, minute 4 lekah Real Madrid corner aṭangin Ronaldo chuan a head goal teuh nghal hle a, minute 6 lekah Pepe pass sual changtu Dani Alves a hlauhawm hle bawk. Team pahnih keeper te an che ṭha nghal hle.

Minute 17 a ni a, Real Madrid in goal an thun ta. Corner aṭanga Pepe head chu Barca keeper Victor Valdes chuan a manbet zo lo a, ball per hi Puyol chuan chang hmasa mahse a petchhuah theih hmain Sami Khedira  chuan hnai fe aṭangin, Puyol ke kar aṭangin a pet goal.

Si an phurh hnu hian Barcelona an khel ṭha sawt a. Real Madrid player tlanpeih tak tak karah duhtawkin ball an inpekual thei. Alves chu winger angin a khel a, a tlanchhuahsan hmunawla hlauhawm tur ber Ronaldo chu Puyol-a’n a veng tlat bawk a, Madrid attacking player ten ball ṭha an hmu hleithei lo. Lionel Messi chu central midfielder ang deuhthawin a inpawtlet a, midfield-ah Barca an chungnung larh a, minute 27 ah Messi through ball, Xavi pet goal loh chu uihawm tak a ni.

Real Madrid an bet tluan a, mahse Barcelona in clear chance an nei thei bik lo kha Madrid defender leh midfielder te khelhṭhat vang a ni. First half-ah goal dang a luhbelh lo a, minute 44 ah Mesut Ozil-a’n a khalhtlang hnuin a final ball uluk deuh se Real Madrid zawk hi goal thunbelh thei dinhmunah an ding.

Second half: Sanchez! Ronaldo!!!

Second half tirlamah pawh Barcelona in ball an chang tam a, mahse an pet goal thei chuang lo. An pet goal thei lo mai a ni lova, Real Madrid defence an ṭhiat hleithei lo. Goal hlauhawm an neihchhun, minute  54 ah Barcelona move mawi tak finish tu Tello chuan a ṭhelh chiang kher mai.

Minute 69 ah Xavi aiah Alexis Sanchez a rawn lut a, a luh hnu minute 2 lekah a pet goal zui. Messi ball khalh ṭha tak kal zel aṭanga Tello leh Iniesta te shot chu Casillas chuan a lo dang ve ve a, mahse a save per hi goal bulah Sanchez chuan lo changin, a shot hmasa zawk hi Casillas chuan a save leh hram a, a vawihnihna erawh a dang seng ta bik lo. 1-1 a ni a, minute 20 a la awm a, ‘home team’ Barcelona dinhmun a ṭha.

Inkhelh hmain Barcelona manager Pep Guardiola khan Real Madrid hi khawvela counter attack hlauhawm ber tiin a lo sawi a, a sawidik thawkhat ang. Barcelona fans te authawm pawh a reh hmain Madrid hian counter attack aṭangin goal ropui an thun a. Minute 71 ah Mesut Ozil through ball mawi zet chu Cristiano Ronaldo chuan lo changin cool zetin a pet goal a, a pet goal zawhah Nou Camp mipuite chu thawm zawi deuh turin a ti vel !!! Ozil through ball nalh lutuk leh, kha ball chang thei tura Puyol leh Mascherano inkara Ronaldo dawk pur pur kha football tihmuhnawmtu pakhat a ni.

A tawpah beisei angin Barcelona goal nawr a hlauhawm lova, Real Madrid counter attack a hlauhawm mah zawk. Goal dang a luhbelh tawh lova, Jose Mourinho hnuaia Real Madrid in La Liga-a Barcelona an hneh hmasak ber a ni.

Match statistics

Barcelona ziah hmasak zel a ni.

Shots (on goal) : 14 (3) – 14 (6)
Fouls : 11 – 20
Corners: 4 – 7
Offsides: 5- 3
Possession: 72% – 28%
Yellow cards : 2 – 4
Red cards: 0 – 0
Saves: 4 – 2

Real Madrid an champion tawh?

Match 4 ve ve chiah khelh tur an nei tawh a, point 7 in Real Madrid an sâng fal tawh. Champion turin point 6 chiah an mamawh tawh a, thilmak a thleng a nih loh chuan Real Madrid hi La Liga champion an ni ang. Real Madrid fans te lawmna belhchhahtu tur chu Cristiano Ronaldo goal thun hi a ni. Ze thu a cheng lo, El Clasico chhungah hian, ‘El Clasico’ tenau zawk, Real Madrid player ṭha ber leh Barcelona player ṭha ber inelna hi a kal ve reng a. Ronaldo hian goal 42 a thun tawh a, goal 41 thun tawhtu Lionel Messi nen an inum zel e.

Ṭumdang ang lo takin red card leh intibuai luai luai a awm lo a, El Clasico a kim lo lek lek !!! Dani Alves-a’n Ronaldo a tlawh lui tih loh chu boruak han sosân viau na tur a awm lem lo.

Barcelona hi ball possession, passing etc ah an chungnung zawk a, mahse a pawimawh ber goal thunah Real Madrid an chungnung zawk. Inkhel pumpui thlirin Real Madrid in chak an phû a, Casillas, Sergio Ramos leh Pepe te kha man of the match a thlan vek tlak khawpin an khel ṭha. Barcelona hi a zawnin vawihnih an chak lo ta a, May 2009 hnuah a zawna vawihnih an chak loh leh hmasa ber a ni. He team ropui hian a vanglai a pel ṭan em ni?

Neuh neuh

• Real Madrid-a Jose Mourinho a luh hnuah Real Madrid leh Barcelona te hi vawi 11 an intum tawh a, tun hi Real Madrid an chak vawihnihna chiah a ni.
• La Liga bikah, Nou Camp-ah Barcelona hi hneh loh nei lovin match 34 zet an lo kaltluang tawh a. Competition hrang hrangah match 54 hneh loh nei loin an awm tawh. Heng record ṭha tak tak pahnihte hi Real Madrid in an tihtawp sak ta a ni.
• Real Madrid hian tun season ah La Liga ah goal 109 an thun tawh a, season khata La Liga-a goal thun hnem ber record thar an siam. Record dinglai kha goal 107 a ni.