El Clasico : Santiago Bernabeu-ah Barca an dingchang


El Clasico-ah Barcelona-in an hmelma Real Madrid 3-0 in an sawp a, La Liga-ah match 17 atangin point 45 an hmu a, Zinedine Zidane-a hoten match khata khel tlemin Catalan club hi point 14 in an pha lo.

Santiago Bernabeu-ah Lionel Messi telna Barca an mawi a, Luis Suarez-a’n minute 54-naah goal hmahruai a khung a. Real defender Dani Carvajal chuan a kut hmanga goal tura ngaih a dan avangin hnawhchhuah a ni a, hemi vanga penalty chu Messi-a’n minute 64-naah khungin hun pek belhah substitute Aleix Vidal-a’n a khung belh leh bawk.

A zawnin vawi 3
Barcelona hian Santiago Bernabeu-ah hnehna an chang fo tawha, tun tum danglamna erawh league match bikah a zawna vawi thum Real Madrid khelmuala an chak vawi khatna a ni a, goal thum lawih an khung bawk.

Real hian FIFA Club World Cup-ah an champion zo deuh chauh a, kum 2017 chhung hian nomawi chawi theih zawng zawng an chawi vek. Amaherawhchu season kal mekah La Liga-ah an talbuai a, French manager Zidane-a dinhmun thlengin a derthawng tawh.

A chhehvel atangin
ZoFooty admin zinga La Liga lam hrechiang bera ngaih chuan zanin El Classico kha tihiana sawi, “Zan tira El Clasico chu a hmuhnawm dan duhthu a sam tawk lo a, Premier League inkhel ang chauh a ni. An game a physical mah mah a, kum danga team pahnihin an thiamna ang an pholang ang thin kha hmuh tur a tam lo,” tiin halftime laiin a sawi a, hei hian first half a khai khawm tha viau.

Real Madrid tantu tan phei chuan zanin El Classico chu a hriat reng tlak loh . Inkhelh tan hmain Sergio Ramos-a’n Club World Cup nomawi a chawi a, hei hi Real tantute hlim lai ber a ni hial ang.

First half-ah team pahnih an inhnehtawk. Real erawh goal hmaa vanduai zawk an ni. Inkhelh an tan chauh a, Cristiano Ronaldo-a’n tauh lut ngal mah se offside vanginn pawm a ni lo a, half time hma hretin Karim Benzema-a’n goal ban a tih per bawk.

Barcelona midfielder Paulinho goal khung tur chu Real keeper Keylor Navas-a’n a nam per hman bawk a, goal chance dah tha ila, first half a hmuhnawm tawk loh.

Messi leh Barca
Barcelona-in minute 54-naah Luis Suarez hmangin goal an khung a, hemi hnu atang chuan inkhel kalhmang a dang hlak. Bernabeu-a Real tantute thawm an neih pawhin an lawm loh vang a ni tlangpui a, Catalan club tantute erawhin lawmna tur an ngah hle.

Goal luhna tur hian Real tlarhnung a pherh a, Ivan Rakitic-a’n Real defence pawp hi hmuh hmaih loin a kaw laiah tak hian a khalh lut a, mual dinglama awm Sergi Roberto pein ani hian Luis Suarez insiamrem a hmuh hmaih lo a, Uruguayan striker hian ball chu goal len a tawn puar tir : 1-0.

Goal khat luh hnuah Messi thiamna a langsar lehzual a, Argentina captain hian Suarez tan ball tha vawrhin Liverpool striker hlui hian goal khat dang khung belh a harsat a, amaherawhchu hemi atanga kal zelah Messi lo thiam ve bawk nen Real lamin ball an chang fuh thei lo a, Paulinho ball tauh chu Dani Carvajal-a’n a kutin a beng a, red card pek a ni.

Los Blancos-in player 10-a an khelh a tul a, an harsatna belchhahna turin Messi-a’n penalty chu goal-ah a chantir bawk. Argentine forward hian El Classico bikah goal 25 a khung a, La Liga bikah goal 17 khungin Bernabeu-ah goal 15 a khungna a ni a, Real tantute chuan a theihna hi an hrechiang tawh khawp ang.

Mangang nawr
Real-in player 10 an nih hnuah Gareth Bale leh Marco Asensio te an luhtir a, an goal nawr a na sawt. Hei erawh hriat tel a tha, Bale leh Asensio that bik vang ni loin Real hian goal khung an mamawh tawh a, Barca tan goal venhim a tawk tawh bawk.

Hun tawp lamah Barca keeper Marc-Andre ter Stegen-a’n hna a ngah a, defender goal nawr na Sergio Ramos a langsar hle. Amaherawhchu Ronaldo ang thoin Bale-a’n goal a rawn keng tel lo a, Barca veteran player Andres Iniesta ten talbuai miah loa hmun chep atanga ball an lakchhuah theih avangin Catalan club tan manganna tur a awm lo.

Injury time-ah Barcelona-in Aleix Vidal an luhtir a, hun khawhralna ang chauh tur ngaih ni mah se kum 28 mi Spanish player hian Messi pass chu injury time minute thumnaah goal-ah a chantir a, Real keeper Keylor Navas-a’n minute 90 chhunga a khelh that a nuai reh vek. Los Blancos hian nipui bazarah kum dang ang thoin keeper tha an zawng leh ang.

Eng nge kan zir?
Zanin El Clasico bikah chuan Ronaldo aiin Messi a tha a, coach nomawi chawi tam Zidane aiin Ernesto Valverde game plan a fuh zawk.

French manager Zidane a dinhmun a derthawng a, a hmalam hun erawh Real thuneitu kutah a awm.

Thlirna Tawi
Real Madrid 0 – 3 FC Barcelona
FCB : Suarez 54′; Messi 64′ (P); Vidal 90′
Red card: Carjaval 63′, Real

Tute nge khel?
Real Madrid (4-4-2): Navas; Carvajal, Ramos, Varane, Marcelo; Casemiro (Asensio 72), Kovacic (Bale 72), Kroos, Modric; Benzema (Nacho 66), Ronaldo
Sub chhawr loh : Casilla, Theo Hernandez, Vazquez, Isco

Barcelona (4-4-2): ter Stegen; Roberto (Vidal 90), Pique, Vermaelen, Alba; Busquets, Paulinho (Gomes 84), Iniesta (Semedo 77), Rakitic; Suarez, Messi
Sub chhawr loh : Denis Suarez, Cillessen, Mascherano, Digne