Electric Vengin I League club hneh nawn

Estimated read time 4 min read

Electric Veng FC-in Mizoram Premier League club an nih hnua an match hmasa berah I League champion lo ni tawh Aizawl FC chu 2-1 in a hneh a, Mizorama football inelna sang ber MPL-ah pawh Electric Veng hian 2-1 in an hneh nawn.

September 6 tlai  Lammual inkhelah hian Electric Veng goal hi Isak Vanlalpeka freekick aṭanga chhuak ve ve a ni a, Kolasib tlangval freekick hmasa zawk chu Alfred Kemah Jaryan-a’n an lamah a khenglut a, freekick hnuhnung zawk erawh AFC keeper Lalawmpuia’n a en liam. AFC goal awmchhun hi minute 80-naah Alfred-a’n a tauh lut a, hun tawp thlengin inkhel a hmuhnawm.

Intawn vawi 2-na
Aizawl FC coach Gift Raikhan-a’n a sawi lawk angin bul ṭan turin tualchhung football hrechiang a luhtir a, Alfred-a chu state pawn player emaw foreign player awmchhun a ni.

I League club-in goal hlauhawm an nei hmasa a, David Lalrinmuana freekick chuan crossbar a per nghal dawp, Electric Vengin talbuai nan hmang loin ṭan zual sauh nan an hmang.

Electric Veng hian captain C. Laldinmawia damloh vangin bul ṭan lo mah se midfield laiah an veng rawlthar pahnih H. Zawnhmingthanga leh Vanlalremkima te an thawkrim. A bik takin rawlthar duhawm Thanga a tlan tam a, Aizawl FC player-ten an duh angin ball an inpe thei lo.

First half ni sa hnuaiah team pahnihin chance ṭha an insiam thei lo a, goal zawnah an pet thei lo ve ve. Chutihrualin team pahnih fitness a ṭhat avangin ‘midfield battle’ erawh a en tlak hle.

Tihpalh a ni lo
Electric Vengin Aizawl FC an hneh ṭumin Isak-a’n freekick aṭangin goal ṭha tak a khung tawh a, tihpalh a ni lo tih lantir. Minute 69-naah striker chak ṭha David Lalchhuanawma freekick hlawhchhuah chu Isak-a hian mual sir lam aṭanga petin insiamrem hman lo Alfred-a’n chiang zetin a kheng lut.

Minute hnih hnuah EFC-in freekick an hmu leh a, yard 30 vel zeta hla aṭangin Isak-a’n mar ṭha zetin a pet a, Aizawl FC keeper AwP-a a che hman lo. MPL7-ah hian ball thar ‘Nivia Antrix’ hman a ni a, ball a kal chak avangin goal ropui hmuh tur a awm choh zel a beisei ngam.

Hei le, long ball
Aizawl FC coach Gift Raikhan-a’n goal an hnih an chhuah hnuah long ball uar sawh turin a naute a fuih a, goal nawr nat tumin forward F. Lalremsanga chu midfielder David-a aiah luhtir a ni a, Neroca aṭanga AFC zawmtu David Biakzara a inlan bawk.

Minute 80-naah Paul Ramfangzauva freekick vawrhluh chu Alfred-a’n ṭha zetin a tauh lut a, Aizawl FC-in nunna thar an nei chiah bawk. Hun tawp lamah Electric Veng an talbuai a, Aizawl FC goal nawr na mah se MPL kai thar an ṭang tluan.

Eng nge an sawi?
Electric Veng manager Lalchhanhima chuan, “Vawi khat chauh a ni lo a, vawi hnih lai I League club kan hneh nawn hi kan lawm takzet a ni. Kan club chhung inlungrualna leh mipui thawhrah a ni a, result ṭha nei tura kan ṭanrual zel a pawimawh ang,” tiin Vanglaini a hrilh.

Aizawl FC coach Gift Raikhan-a’n MPL kaithar chu vanduai theihna an nih avangin an fimkhur a ṭul tur thu a sawi lawk a, amaherawhchu I League club hian Manipur coach hnuaiah point hmu loin bul an ṭan ta tho.

AFC assistant coach Lalruatdika chuan, “Kan team hian hma kan sawn ngei a, amaherawhchu I League club tan chuan chak loh chu a dik lo. Electric Veng chauh ni loin club dang pawh hneh lo ila a dik lo hrim hrim. Nasa taka hma kan sawn a ṭul a ni,” tiin insiamṭhat an mamawh thu a sawi.

Thlirna Tawi
Electric Veng FC 2-1 Aizawl FC
EFC : Alfred Kemah Jaryan 67′ (OG); Isak Vanlalpeka 69′
AFC : Alfred Kemah Jaryan 77′
MoM : Isak Vanlalpeka, EFC

Source : www.vanglaini.org

You May Also Like

More From Author

+ There are no comments

Add yours