EMIRATES STADIUM-AH CHELSEA – Lawmkima Hmar

Posted on January 3, 2018January 5, 2018 by C Tlanthianghlima

4 min read

Zanin zanlai pelh dar 1:15 hian English Premier League-ah Arsenal chuan London palian Chelsea an lo mikhual dawn a, kum 2018 a club lian leh club lian inchaltauhna hmasa ber a ni ang.

Arsene Wenger hi referee Mike Dean-a penalty pek avanga West Brom nena an in hnehtawk chungchanga lungdam thei lo niin, Calum Chambers-a kuta Kieran Gibbs-a pet per Jay Rodriguez-a’n goal-a a chantir zui tak chungchanga lungawi lo French manager hian inthlakna pindana official te a zui luh avangin FA chuan a chungah hremna an lekkawh dawn a, referee Mike Dean pawh hi division hniam zawk, Championship lamah an duty tir dawn nia sawi a ni bawk (Man. City vs Watford-ah khan 4th Official ah a awm).

Tun dinhmunah champion lai Chelsea hian khelh 21 atanga point 45 hmuin pahnihna hauh mek Manchester United lehpelhna hun remchang an nei a, champion beiseiawm lutuk tawh lo mah se point 15 zeta hmahruai mek Manchester City hnaih thei ber tur an ni mek.

The Blues hian hunpui an dawl a, Kutpui (Krismas & Kumthar (vuakveta) match 5 an khelhah point hnih chiah hlohin vawi 4 hnehna an chang a, vawikhat an khingpuite nen an inhnehtawk. Team dehkhirha ngaih Stoke City phei chu 5-0 in an nawp.

Gunners hian an match hnuhnung pangaah tlawm nei lo mahse vawi hnih lai an khingpuite nen an inhnehtawk avangin Champions League khel pha tura an kawng a chhoh deuh dawn a, tunah hian point 38 hmuin 6-na an hauh mek. Hun pawimawha hnehna an chang hlei thei lo hi an buaina zakhua a ni fo.

Inhliam leh dam : Arsenal player pawimawh inhliam Mesut Ozil leh Laurent Koscielny te chuan Chelsea hmachhawn theihna remchang chhete an nei a, Koscielny inlan theihna hi 30% niin Ozil-a khup hliam erawh a dam chak avangin a khelh theih a rinawm viau.

Tharum ngah wing-back Sead Kolasinac chu ngalrek na avangin chawlhkar hnih chhung a chawlh a ngai dawn a, Aaron Ramsey, Olivier Giroud leh Nacho Monreal te pawh te natna khumah an la let rih.

Chelsea lamah inhliam tharlam an awm lo va, defender David Luiz a dam hman dawn em tih erawh a chiang lo.

Sulhnu :
*Arsenal hian nikum hmasa September 24, 2016 khan Emirates Stadium-ah 3-0 in an hneh a, hemi hnu hian Chelsea chuan harhtharna changin an champion zui.

*Inelna hrang hrangah Emirates Stadium-a Arsenal ngam ber chu Chelsea leh Manchester United te niin vawi 5 ve ve an hneh tawh.

* Arsenal in Premier League season khata Chelsea laka point an hmuh ve ve hnuhnung ber chu 2011-12 (W1 D1) niin season khata Chelsea laka goal an chhuah loh ve ve chu 1998-99 daih kha a ni tawh.

*Arsenal hian Premier League-a Chelsea nena an intawn hnuhnung vawi 9 ah vawi 7 zet goal an thun lo.

*Arsenal leh Chelsea intawn hnuhnung vawi 7 ah red card 6 phawrh a ni a, an intawn hnuhnung 3-ah Chelsea hian red card an hmu vek.

*Chelsea hi tun season London Derby-ah vawi hnih an tlawm, West Ham leh Crystal Palace an hneh lo ve ve.

*Tun season-a Chelsea goal thun 21 zet hi Spanish player te thun a ni a, Europe League lian 5 a, club khat tana Spanish player in goal an thun tam berna a ni.

*Tun tum hi Wenger-a’n Chelsea a hmachhawn vawi 60-na tur niin club mal a hmachhawn ngun ber an ni (W22, D16, L21).

*Tun tum hi Wenger leh Conte te vawi 6 an inhmachhawnna tur chiah niin Chelsea hian vawikhat chiah hnehna an la chang; vawi hnih tlawmin vawi hnih bawk an inhnehtawk.

*Fabregas hian Arsenal tan Emirates Stadium-ah goal 19 thun tawhin club dang tan he hmunah hian vawi 3 inlanin goal a la thun lo vek.

(Thursday, 4 January 2018)
1:15am-Arsenal vs Chelsea (Star Sports Select 1)
• Referee – Anthony Taylor (Age 38 from Cheshire and FIFA accredited)
• Assistant Referee 1 – Adam Nunn (from Wiltshire and FIFA accredited)
• Assistant Referee 2 – Lee Betts (from Norfolk and FIFA accredited)
• Fourth Official – Craig Pawson (Age 38 from South Yorkshire and FIFA accredited)