EMIRATES STADIUM-AH LIVERPOOL – Lawmkima Hmar

(Saturday, 23 December 2017)
1:15am-Arsenal vs Liverpool (Star Sports Select 1)

Zanin zanlai pelh hian hian tunkar tawp English Premier League match zinga mit la berah Arsenal chuan Liverpool an mikhual dawn a, champion tura beisei ngam tawh loh ve ve ni mahse, an tan season thar Champions League khelh a pawimawh a. Club lian ve ve, tlawm duh lo ve ve te inkhel hi sawi nep pawh tum ngial ila a nep thei chuang lo.

Inhliam leh dam :
Arsenal forward Olivier Giroud chuan tha na avangin The Reds a hmachhawn thei dawn lo va, French defensive midfielder, karlaihawl Carabao Cup-a West Ham an hneh tuma bai chhuak Francis Coquelin erawh a inlan thei thung dawn a, defender pawimawh Shkodran Mustafi pawh chhawr theihin a awm.

Liverpool lamah hremna tlingtla zo hlim Emre Can a ranw kir leh thei ta a, Daniel Sturridge leh Joel Matip te erawh minute 90 khel tluan tura rinngam an la ni lo thung. Defender Alberto Moreno chu ngalrek na avangin a inlan thei lo bawk ang.

Manager thukhawchang :
Arsenal manager Arsene Wenger chuan inkhelh hmasaka 4-0 a an tlawm chungchang zawhna chhangin: “Manager ka nih chen hi ni ve ta ulang chuan hetianga chiang taka tlawm tumte, damchhung atana a chhe zawnga hriat reng tur khawpa tlawm nasatte in nei ngei ang.

“A tha zawng zawng hi neih vek theih a ni bik lo. Chuvangin hmalam thlir mai hi a finthlak zawk. Zirtawp zan hian (game hmasa ang ni lo) thil danglam thlen turin kan inbuatsaih.

“Phurna kan nei a, kan team rilru puthmang a dik bawk a; game rang leh nung tak kan chhawpchhuak ang,” a ti.

Liverpool manager Jurgen Klopp chuan: “Goal tam tak a lut leh ang em tih ka sawi thei mai bik lo; chutiang thlentir tur erawh chuan kan theihtawp kan chhuah leh dawn. A hmaa kan result ang kha hlawhchhuah a har ang tih chu kan hria, mahse, thil theih loh a ni lo.
“Arsenal hi team puitling tak an ni a, mual chhungah chuan engkim an ti thei. A tul hunah rang takin an che a, an game pawh an thlak leh dawrh mai thin. Giroud a awm khan long ball an a tam a, a inlan theih dawn tak lohvah chuan an game an dang leh ngei ang.

“Tuemaw awm lo mahse an hlauhawm ngaiin an hlauhawm reng a, mual chhunga danglamna thlen thei mai tur an nei nual a ni,” tiin an tumpui tur team te a fak.

Chhinchhiah atan :

Arsenal hi a zawnin vawi thum aia tam Liverpool lakah an la tlawm ngai lo va, zanina an tlamw a nih chuan Premier League-a a zawna Liverpool vawi 4 an hneh lohna a ni ang.

*Liverpool hian Jurgen Klopp-a hnuaia Premier League-a Arsenal an hmachhawn hnuhnung 4 ah te khan goal 3 aia tam an thun vek a, match 4 atangin goal 14 an thun tawh.

*Liverpool leh Arsenal inkhelh tum hian minute 90 leh a hnulamah goal 17 lut tawhin Premier League-a club pahnih inhmachhawnnaa minute 90 leh a hnu lama goal luh tam berna a ni.

Arsenal :

*Arsenal hian an mual an hmang thiam hle a, an muala Premier League an khelh hnuhnung 14-ah vawi 13 hnehna an chang.

*Arsene Wenger-a naute hian an mualah a zawnin game 23 chhung goal an thun tawh a, an muala Premier League an khelha goal an thun loh hnuhnung ber chu October 2016 a Middlesbrough nena 0-0 an inhneh tawk tum kha a ni.

*Gunners hian club lian an ngam lo thin hle a, tun season-a top 4 a awmte vawi 4 an hmachhawn atangin point khat chiah an la hlawhchhuak (Arsenal 0-0 Chelsea, September 2017).

*Petr Cech hian goal a chhuah lo a nih chuan Premier League goalkkeper zinga clean sheet 200 nei hmasa ber a ni ang. Amaherawhchu, Liverpool a hmachhawn hnuhnung 5 atangin goal 14 a chhuah tawh.

Liverpool :

*Liverpool hi English Top Flight huanga khual muala a zawna an tumpuite vawi 4 lai 3-0 leh a tlukpuia hneh thei awmchhun an ni.

*Jurgen Klopp-a naute hian tun season EPL-ah khual mualah goal 24 an thun tawh. Manchester City nen khual muala goal thun tam ber an ni mek.

* The Reds hi a zawnin game 9 chhung an tlawm tawh lo (W6, D3), Premier League-a an record tha ber dawt tum a ni. November 2016 khan a zawna vawi 11 tlawm lo record an lo siam tawh.

*Goal an chhuah lo a nih chuan tun season EPL-a a zawna game 3 chhung goal an chhuah loh hmasak ber tum a ni ang.

*Mohamed Salah hi tun season Premier League player zinga inelna hrang hranga goal 20 thun tling hmasa ber a ni.

*Philippe Coutinho hian Liverpool tana khual muala a inlan hnuhnung 7 atangin goal 8 thunin assist 7 a nei!

*Sadio Mane hian Arsenal a hmachhawn hnuhnung vawi 3 ah goal a thun vek.
…
Top 10 Table :

Team P GD Pts
1.Man City 18 44 52
2.Man Utd 18 27 41
3.Chelsea 18 18 38
4.Liverpool 18 18 34
5.Arsenal 18 11 33
6.Burnley 18 4 32
7.Tottenham18 13 31
8.Leicester 18 1 26
9.Everton 18 -6 25
10.Watford 18 -6 22