Arsenal chuan 3-0 in Aston Villa a hneh a. Arsenal in pathumna ah an innemngheh rualin Arsenal record thar an siam tel. Arsenal left back Kieran Gibbs, winger Theo Walcott leh midfielder Mikel Arteta te hian league table a pathumna a inbengbel theihna turin goal thum an thawh a. London a club lian dang ten goal an thunloh zanah London Hmar Veng ah erawh goal thum a lut.

Line Up
Arsenal: Szczesny, Sagna, Vermaelen, Djourou, Gibbs, Song, Rosicky, Arteta, Walcott, Persie, Gervinho
Aston Villa: Given, Warnock, Collins, Cuellar, Hutton, Petrov, Herd, Albrighton, Ireland, Agbonlahor, Heskey

Inkhel chanchin
Inkhel tan hma taksa tihlum anih laiin Arsenal defender Laurent Koscielny chuan a khup ti na in a inhnukdawk a. A aiah Johan Djourou dah a ni a. He thu hi puan anih lai in Emirates Stadium a mipui te a barakhaih rualin Djourou awm tur hi an ngai ngam zanlo tih a hriat theih. Aston Villa lam pawhin Darren Bent an chhawr theilo chu a tlarhma a ruak dawn hle niin a lang a. Inkhel tan anih atangin Arsenal hian an khelmual a ni tih chiang takin an lantir a, an tal na nghal hle. Aston Villa lam hian ball inpeksual an nei zeuh zeuh a. Tum khat an tihsual phei chu Arsenal lam hian hmang tangkai in minute 16 na ah Kieran Gibbs in goal hmahruai a thun a. Hei hi Premier League a a goal khat thunna a ni nghe nghe. Minute 25 na ah Theo Walcott in Arsenal goal hnihna mawi zet in a thun leh a. He goal a thun chiah hian Arsenal ah record thar a siam. Chu record chu 1997 hnua Arsenal tana inkhel a English mi pahnih in goal an thun leh theih vawi khatna a ni. Arsene Wenger in a enkawl hnuah hian English an thahnem ta lo hle a. He record dangdai tak hi zanin hian siam a ni leh ta.

Aston Villa hian inkhelh chhungin goal hlauhawm tak tia sawi tur an ngah lova. An hmatawng Darren Bent leh Charles N’zogbia te awmlo a langsar hle. Premier League a goal thun thei ber Robin van Persie chuan goal hmaa a vanduai zan a ni nge, a pet goal tur vawi nga vel lai chu Villa lam hian an lo dansak a. Villa defender Stephen Warnock in a lo dan phei chu pui tak a ni. Minute 90 hnuah minute 5 pekbelh a ni a, hemi chhung hian Arsenal in free kick a hmuh chu Mikel Arteta in kawh zet mai in Given-a goal a chuan pet lut chiang ngei mai. Hun a tawp meuh chuan Arsenal hi 3-0 in an chak a, a zawn in inkhel vawi ruk an chakna chiah a ni.