EMIRATES STADIUM-AH STOKE AN ZAWR

Estimated read time 4 min read

Arsenal chuan an muala an lo hneh than tawh Stoke City chu Emirates Stadium-ah lo mikhualin 3-1 in hnehna an chang a, Premier League table chung berah an awm mek.

Mikhual team tan Charlie Adam chuan Joe Allen laka Granit Xhaka penalty chawi chu goal-ah a chantir a, hma an hruai. Mahse, Theo Walcott chuan club tana a goal 100 thunna’n substitute Hector Bellerin-a cross atangin hun tawp hma lawkin an si phurh a sut. Arsenal tan goal 95 thun tawhin Southamton tan khan goal 5 a thun hman bawk. Tin, December 25 hmaa goal 10 a thun tlin avangin a nupui chuan present atan Coffee Vending Machine a lei dawn ta.

Second half atanga minute 10 ralah Mesut Ozil chuan 84% saved nei Stoke keeper Lee Grant-a man phak lohvin Chamberlain-a vawrhluh chu a tauh goal a, substitute Alex Iwobi chuan hun tawp nan minute 15 a la awm tihah an chak chianna goal hi a thun zui ta a ni.

Chelsea in naktuk zan hian Stamford Bridge-ah West Brom an mikhual dawn a, an result a zirin hmahruaitu hi ala danglam thei.

Arsenal hian Inrinni liam ta mai khan West Ham lakah goal 5 an thun a, thawhleh zanlai Champions League-ah Basel lamah goal an thun leh bawk, tunah goal 3 an thun leh cheu a, goal thun an harsat lo. Season tanniah Liverpool chu Emirates Stadium-ah an lo hneh lo va, hemi hnu hian league-ah tlawm an nei tawh lo.

Stoke hian goal thunna remchang pek tum lovin penalty area pawnah phui taka inremin engemaw chen chu an va lenluhnate hi an dangchat a. Xhaka chuan Wales international Joe Allen a dan tumna lamah a nghawk palh a, referee Lee Mason chuan penalty a pe a, Stoke in hma an hruai zui.

Gunners dinhmun a tha dawn lovin a lang: Shkodran Mustafi chu inhliam avanga lakchhuah a ni a, a aiah damkawr Hector Bellerin a rawn lut, a tangkai leh hle thung. Spain right-back hian Walcotta- thun tur a siamsak nghal.

Alex Oxlade-Chamberlain chuan fing taka Stoke defence vawrhkhumin Ozil-a tan a siamsak a, German midfielder hian tun season-a league goal 9 a thunna ni turin keeper man phak loh tawka sangin a tauh goal. Hetih lai hian Potters right-back Erik Pieters inhliam avangin mual pawnah a awm mek.

Bench atangin Iwobi a rawn lut a, FC Basel laka a chet ang thovin goal a thun leh, a goal thun hma hian Arsenal hi chak mahse table chung berah an la awm thei chuang lo. Goal a thun takah chuan point 34 ve ve hmu a, goal difference 21+ ve ve neiah goal 4 a goal thun tam zawk a team te a chung berah an awm dawn tih a chiang nghal.

Kum 35 chhung maw?
Stoke hi tunhnaiah an che tha a, an game hnuhnung 9-ah vawi 5 lai hnehna an chang thei a, vawikhat chiah an tlawm. Hemi tumahte hian goal 5 chiah an chhuah bawk a, a hma lam leh hnung lamah an tha tawk viauin a lang bawk.

Mahse, Arsenal laka an thawnthu hlui a chul thei lo, August 1981 hnu lama Arsenal khel muala an lenluh apianga an tlawm ziah chu zaninah pawh an chhunzawm leh! Kum 35 chhungin Gunners mualah vawi 14 an tlawm zawn ta.

Arsenal laka an tlawm avangin Stoke hi an khel chhe viau tihna erawh a ni lo. An mikhualna ramah bul an tan tha a, penalty atanga an goal thun bak pawh hi goal thunna remchang an nei. Marc Muniesa chuan 30-yard atangin a volley lut tep a, Charlie Adam-a cross atangin a kum 31-na pianchampha phak a lawm niah Petr Cech a paltlang teuh hle.

Marko Arnautovic chuan si 2 faia an hmahruaina goal a thun teuh hle a, box chhunga ball tha taka a luhpui hnua a pet chu Monreal chuan a lo dang hlauh. Pa khansang Peter Crouch chuan mual a luh atanga a ball khawih hmasak berah a tauh goal teuh hle a, chesual lek lek thin Cech chuan a lo dang leh.

You May Also Like

More From Author

4Comments

Add yours

+ Leave a Comment