ENG NGE HOMEGROWN HI ? ENG NGE A PAWIMAWHNA ?

Tunlai football khawvelah ‘homegrown’ tih hi kan sawi nasa hle a. A bik takin Premier League-ah hian he thumal hi kan hre nasa lehzual âwm e. Hemi chungchang hi la hrechiang lo kan lo awm palh tâk hlauh in heti ang hian sawifiah i han tum ang aw.

Eng nge ‘homegrown’ chu?

‘Homegrown’ hrilhfiah dawn chuan Football Association (England) leh Football Association of Wales ten an hrilhfiah dân leh UEFA in a hrilhfiah dân sawi ve ve a ngai a. A awmzia erawh chuti ang lutuk chuan a danglam lem lo thung.

English FA leh Welsh FA te hian ‘homegrown’ chungchangah hian dân intawm an siam a, chu an dân siamin ‘homegrown’ a sawifiahna hmasaber chu England leh Wales ram chhunga piang footballerte chu ‘homegrown’ a chhiar an ni nghâl a ni.

Chutihrual chuan heng ram pahniha piang lo tân pawh ‘homegrown’ nih theih dân a awm a, chu chu kum 21 hnuailam player in kum 3 chhung England leh Wales ramchhung cluba a lo khelh emaw training (academy a awm) emaw in ‘homegrown’ a chhiar theih an ni a. A zawnin kum 3 khelh emaw training emaw kher hi a ngai lo va, kum 21 an tlin hma a kum 3 England emaw Wales emaw ah an lo khelh tawh hrim hrim chuan eng ram mi pawh ni se ‘homegrown‘ a chhiar theih an ni.

UEFA dânah chuan ram pawn mi tana ‘homegrown’ nih theih dân hi kum bithliah a awm a. England leh Wales ah chuan kum 21 an tlin hma a an ram chhunga kum 3 an lo khelh tawh hrim hrim chuan ‘homegrown’ player a chhiar an nih theih laiin UEFA chuan kum bitliah a siam thung a. Chu chu kum 15-21 inkar an nih chhunga kum 3 an khelhin ‘homegrown’ an ni thei chauh a, kum 15 an tlin hma in academy ah lo awm pawh ni se kum 15 an nih atanga chhiar chauh tur tihna a nih chu.

UEFA hnuaia intihsiakna (Champions League leh Europa League) a khel tur clubte chuan team ‘List A’ leh ‘List B’ an siam tur a ni a, ‘List A’ ah chuan a tam berah player 25 an register thei a. Hetah hian player 8 chu ‘homegrown’ player an ni tur a ni a, chuta player 4 chu club chhulchhuak (club academy a awm tawh) an nih a ngai bawk. Tin ‘non-homegrown’ player 17 chiah tel theih a ni bawk. ‘List B’ ah erawh club U21 player engzat pawh telh theih a ni thung.

Heti ang hian dân hran awm mahse Football Association (England leh Wales) te chuan an ram chhung intihsiakna (League leh cup competition) ah anmahni dân angin thil an kalpui thei a. Chutihrual vêk chuan UEFA hnuaia European Competitionah erawh UEFA dân angin clubten an squad registration an tih a ngai ve thung a ni.

Club in ‘homegrown’ quota lo nei daih lo ta se engtin nge ni ang?

Dânin a phût ang zat kha club in ‘homegrown’ player a nei daih lo a nih chuan Football Association (England & Wales) leh UEFA te chuan hriatthiamna dân inang an nei a.

English FA leh Welsh FA hnuaiah chuan UEFA dân ang thovin squad-ah a tam berah ‘non-homegrown’ player 17 an ziahluh theih a. Hetah hian club in ‘homegrown’ player ngai zat (8) an nei daih lo a nih chuan squad a ‘homegrown’ quota hnawhkhat lo vin an dah ang.

Entirnan – Squad a player 25 ziahluh theihah ‘homegrown’ quota an hnawhkhah theih lova, ‘homegrown’ player 6 chauh an dah a nih chuan squad-ah player 23 chiah an awm thei dawn a, ‘homegrown’ quota an dahkhah loh 2 kha ‘non-homegrown’ quota in a va hnawhkhah theih ringawt loh a ni. ‘Homegrown’ quota ah player 5 chauh an ziakluh thei a nih chuan squad ah player 22 chauh an ziaklut thei dawn tihna a ni.

Tin ‘homegrown’ quota 8 a a zatve chu academy a lo awm tawh an nih a ngai ang hian 8 aia tlem squad-ah an lo dah a nih chuan a zatve ang zelin academy chhuak kha an dah zel a ngai a ni (6 an nih chuan 3 chu academy chhuak).

Eng nge ‘homegrown’ chu an pawimawhna ni ta ?

A chunga kan sawi tawhte atang khian he zawhna chhânna hi chu a hriat nghalin a rinawm a. A chhânna awlsam ber chu squad a ‘homegrown’ player dah tur nei tlem apiang an squad a pan dawn tihna a ni mai.

Hei tak hi a bik takin England ah English mi an to kan tih fo nachhan chu a lo ni leh ta a. English mite hian ‘homegrown’ quota an ken tel avang hian ‘homegrown’ player mamawh club chuan manto mahse an ngam to ve leh zel a ngai a, a khelhna clubten a lei tu turten ‘homegrown’ player an mamawh tih an lo hriat ve bawk thin avang hian ‘a man a phu lo’ kan tih tam tak English an lo awm phah ta a ni.

Awle, a sei lutuk dawn a, hetah hian duhtawk rih phawt mai i la. Hmaih leh ziah lan tel âwm tak kan ziak tel lo a nih chuan comment lamah kan sawi tlâng leh dial dial dawn nia.