England manager lailawk Stuart Pearce chuan England senior team a enkawl hnua a squad hmasa ber a puang a. Karleha Netherlands hmachhawn tur, England senior team-ah hian Manchester United midfielder Tom Cleverley leh Sunderland striker Frazier Campbell te chu a vawikhatna atan an tel ve. Friendly match hi Wembley Stadium ah karleh Nilaini zan (March ni 1 zing dar 1:15) ah khelh a ni ang.

Pearce hian mi 25 a thlangchhuak a, players 23 te chu Premier League players te an ni.  Manager kalchhuak ta Fabio Capello hnuaia hmun chang hleithei lo Micah Richards leh Adam Johnson te pawh an tel. Rio Ferdinand, Frank Lampard leh Any Caroll te tân hmun a awm lo thung. Arsenal winger ṭha mi Alex Oxlade-Chamberlain chu koh tel ngei tur nia mi tam takin an ngaih laiin U-21 lamah a tel chhunzawm bawk.

Pearce hian captain tur a la ruat lova, squad han thlir vang vang hian naupang leh senior an inpawlh mawi tawk viau. England hi FIFA ranking-ah 5 na an ni mek a, an tumpui tur Netherlands hi 3 na an ni mek thung.

Stuart Pearce chuan “ Alex Oxlade-Chamberlain hi U-21 ah chuan player tha tak a ni a mahse senior squad-ah telh ila, minute 10 chiah khel leh si se awmzia a awm lova, football kalphung a ni lo a ni. Tin, club tan duh angin a khel tam lo bawk” a ti a.

Campbel leh Cleverley erawh a fak hle a. “Fraizer Campbell hi ka hrechiag hle a. U-21 ah ka hrual tawh thin a, player talented tak a ni a, a thawkrimin a taima em em a ni. Tin, Cleverley pawh season a tan tha hle a, vanduaithlak takin hun rei tak chhung a inhliam a. Tunah chuan a dam leh tawh a, United-in Ajax an hnehna kawngah pawh khan a thawhhlawk hle a, a hma hun a eng hle a ni” a ti.

Stuart Pearce chuan “ Fabio Capello leh a staff hnenah lawmthu ka sawi duh bawk a. Kum li dawn ka zui chhung khan thil tam tak ka zir belh a ni” a ti bawk.

England hian Fabio Capello ban hnu khan manager thar an la nei lova, Stuart Pearce hian a enkawl mek a ni. England hian Euro hmain Netherlands bakah friendly match hnih tur an la nei a. May ni 26-ah Norway nen Oslo-ah an inkhel ang a, June ni 2-ah Belgium nen Wembley Stadium-ah an inkhel leh bawk ang.

A hnuaia mite hi Wembley-a Netherlands hmachhawn tur ho chu an nia, tutenge First XI a lut tura i rin le?

Goalkeepers: Scott Carson (Bursaspor), Joe Hart (Manchester City), Robert Green (West Ham United).

Defenders: Gary Cahill (Chelsea), Ashley Cole (Chelsea), Leighton Baines (Everton), Glen Johnson(Liverpool), Phil Jones (Manchester United), Micah Richards (Manchester City), Chris Smalling(Manchester United), Kyle Walker (Tottenham Hotspur).

Midfielders: Gareth Barry (Manchester City), Tom Cleverley (Manchester United), Stewart Downing(Liverpool), Adam Johnson (Manchester City), Steven Gerrard (Liverpool), James Milner (Manchester City),Scott Parker (Tottenham Hotspur), Ashley Young (Manchester United), Theo Walcott (Arsenal).

Forwards: Darren Bent (Aston Villa), Fraizer Campbell (Sunderland), Daniel Sturridge (Chelsea), Wayne Rooney (Manchester United), Danny Welbeck (Manchester United).