Europe a league ‘ropui’ tih theih chinah, English Premier League aia speed pawimawhna hi a tam awm lo e. La Liga ah chuan ‘thiam’ a pawimawh ber a, Serie A ah chuan defence ‘solid’ an thupui a ni. English Premier League hi kan en tam ber a ni bawk a, player tlanchak ber nia ka hriat panga ka rawn thlangchhuak chhin a, in ngaihdan in lo sawi ve dawn nia. (Tuna la khel ho zingah)

Heng ka rawn thlanchhuahte hi research ka bei lem lo a, TV a an inkhel kan en aṭanga ka hmuh dan bak ṭanchhan ka nei lem lo. EPL a ‘speed’ sâng ber nia ka hriat mi pangate chu:

5. Gael Clichy (Manchester City)

Arsenal left back ni ‘ṭhin’ Clichy hi English Premier League defender zingah chuan a tlanchak ber a ni hial awm e. Critics ten a positioning a ṭhat tawk loh zia an sawi apianga an sawi tel ziah chu a tlanchak em avanga a positioning chhia langsar ngai lo hi a ni. A tlanchak mai bakah hian a fei em em a, field veilam ah hi chuan khawi hmunah pawh hmuh tur a awm a ni ber mai.

A tlanchak ka tih leh zual na em em pakhat chu season hnih vel kalta ah khan Agbonlahor nen ball an um dun a, speed la hmasa zawk Agbonlahor khan a tlanpel bik miah lo. Manchester City field veilama a overlap zak zak tur hmuh a chakawm tawh ngei mai.

4. Marc Albrighton (Aston Villa)

Manchester City in James Milner an lak hnua Aston Villa right wing changtupa, Marc Albrighton hi a naupang ang ngawta en chi a ni hauh lo. 2010-11 season ah khan a khel ṭha hle a, field sir dinglama a che vel kha hmuhnawm tham a ni ve. Milner angin a ball cross ṭha lo mahse ball khalh leh tlanchak ah chuan a khum chiang ngei mai.

Tunah Downing leh Young an awm tawh lo a, Albrighton hi Aston Villa winger pawimawh a ni chho dawn.

3. Aaron Lennon (Tottenham Hotspurs)

Season hmasa a AC Milan leh Tottenham Hotspurs an intum khan Lennon a tlanchak zia kan hmu nawn leh a nih kha. Hemi hma pawh hian EPL en ṭhin chuan field sira a ball tlanpui chakzia chu kan hrechiang ang.

Lennon hlauhawm zual em emna chu, chak taka a tlan chunga ‘direction’ a thlak thut thut thei hi a ni. EPL left back ṭha ber pawl Evra a lo tlanpel ve zak zak tawh a, Ashley Cole pawhin umpha lo tak a ni. Phit thutah a hlauhawm ema em a, full speed a thlen tawh phei chuan England a defender zingah dang zo an awm lo a ni ber mai.

2. Gareth Bale (Tottenham Hotspurs)

Sagna, Maicon, Ferreira, Baines…leh midang tamtak te hi Gareth Bale hian zahthlak khawpin a lo tlanpel tawh ṭhin. A lar tak hluaina kha Inter Milan laka hattrick a siam kha a ni a, khata a goal 2 na leh goal 3 na kha ennawn leh la, Inter defence pumpui a tlanpel a nih kha. A goal thun leh a ball hlauhawm siamchhuah hi chu a tlanchak vang deuh veka rawn chhuak a ni.

Vawi leh khata phit thut ah Tottenham-a a teammate Lennon hi a tluk lo deuh maithei a, mahse a tlan laklawh tawh chuan pui rem rem tak a ni. Tin, rei tak chhung chak taka a tlan thei hi a mak zawk hial awm e.Defender te nen hmun leh hmunah an indinchilh reng emaw tih laiin a lo fal leh duai ṭhin a nih hi.

1. Theo Walcott (Arsenal)

English Premier League-a player zawng zawngte hi 100m race ah intlansiak ta se la, Arsenal ‘flying’ winger Theo Walcott hi pakhatna a nih ngei a rinawm.

Lennon angin tlanpahin a inher thut ve lem lo a, mahse a hlauhawmna a nep chuang lo. A ball khawih reng reng hi a rang em em a, EPL defender zingah han um a, han elpha ve deuh hlek tur pawh an awm lo ang. Field chhungah a tlanchak theihtawpa tlanna chance a la nei ngai lo niin a sawi lehnghal a, chance a nei ta hlauh a nih chuan a vengtu tur ka ni lo hi ka lawm khawp mai.

A hnuaiah hian Bale leh Walcott te an tlanchak lai ber tehna a awm a, a lan dan maiah chuan phit thut ah leh full speed ah Walcott hi tlemin a sâng hret a, mahse Bale hi a tlanchak rei thei zawk thung a ni.

Note: Agbonlahor, Fernando Torres, Nani, Valencia, Drogba, Balotelli te pawh hi an tlanchak em em vek a. Mahse sawi tawh angin hei hi chu keima ngaihdan a ni a, in ngaihdan ka lo nghak mek e.