Pathianni zana Manchester United in Arsenal an lo mikhual tur hi EPL 2011-12 season a game la ‘pui’ ber tur a ni. EPL champion in EPL-a game ‘mawi’ ber (?) an lo mikhual dawn a, Gunners rawlthar ho in Devils rawlthar rual an va tlawh dawn. England mai ni lo, Europe khawmualpui leh a piah lam thleng pawha club langsar pahnih an inkhel dawn a, manager ‘ropui’ pahnih an insu dawn e. English Premier League i en ve ṭhin a nih chuan he match hi i hmaih phal dawn lo.

Bul ṭan dang inang lo

Manchester United in season bul an ṭan dan hi duhthusam tluk a ni ber. Community Shield ah hmelma City hnehin an champion a, league ah point 6 ah point 6 an hmu tawh. An player lei thar te an khel ṭha nghal a (de Gea?), defender ṭha te inhliam pawh hriat loh khawpin player naupang ten game hmuhnawm tak min hmuhtir ṭhin.

Arsenal in bul an ṭan chhia a, field pawnah leh chhûngah an chebuai. Player te an inhliam loh leh hrem an tâwk a, league ah chak an la nei ve lo a, an la pet goal ve lo bawk. Champions League playoff a Udinese an hneh hi tun season a an hlimna awmchhun a la ni mai awm e.

United kulhpui Old Trafford

EPL ṭan tirh aṭanga Manchester United innghahna leh an chakna bulpui pakhat chu an ‘home form’ hi a ni awm e. He khelmualah hian mipui 70000 chuangin awrawl tâwpin ‘Red devils’ te hi an lo au phûr ṭhin a, team tamtak he hmunah hian an kal a, an zâmchhe ṭhin. 2010-2011 season kha en ila, Old Trafford-a United record chu : Played 19, Won 18, Drawn 1, Lost 0.

EPL a wing hmang thiam ber (?) an ni a, Pathianni zanah pawh a sir aṭangin Arsenal defence ṭhiah an tum anga, a sir kiltinah United fans te a bengchheng thei ang berin an lo au ang. Tunah hian a zawnin home game 16 an chak zâwn tawh a, kar hmasa ah pawh Tottenham an sawp leh tawh a nih kha.

Mikhual huangtau Arsenal

An player ṭha pahnih an chhuak a, mi tamtakin Arsenal an tlachhe ta vek emaw an ti. He team hian khualmualah Italian team ṭha Udinese an hneh thei a, away game an khelhthiam zia kan hmu leh ta.

Season hmasa khan Premier League team zingah ‘away’ a team ṭha ber niin an point hmuh zinga a chanve deuhthaw chu mi vênga an hlawhchhuah ngat a ni. Hei hi a chhan ber nia lang chu, team dang hian anmahni home ah chuan attacking game an khel tlangpui a, Arsenal ‘counter attack’ rang lutuk hi an veng zo ṭhin lo niin a lang. Old Trafford-ah United in an attack ngei ang a, Walcott te ho in ‘space’ an nei dawn e.

Ins and outs

Manchester United lamah captain Nemanja Vidic (calf), Rafael (shoulder), Antonio Valencia (ankle) te an khel thei dawn lo a. Ferdinand chuan training a zawm tawh a, mahse Jonny Evans and Phil Jones te hi a luahlan kher angem tih a chiang lo. Darren Fletcher leh Hernandez te pawh an dam tawh e.

Arsenal lamah Alex Song, Gervinho leh Emmanuel Frimpong te chu hrem an ni a, Wilshire, Bendner, Gibbs, Squillaci leh Diaby te inhliam vangin an khel thei lo ang. Defender pahnih, Thomas Vermaelen leh Laurent Koscielny te chu an khelh theih ngei a rinawm.

Engtinnge an inrem ang

Home game ah United hian striker pahnih hmangin 4-4-2 hmang tlangpui mahse ‘big’ match ah chuan 4-3-3/4-5-1 hmangin midfield an ngaipawimawh ṭhin. He match ah hian Chicharito nge Welbeck start ang tih rin thiam a har viau mai a. Keeper de Gea fiahin a awm dawn a, zanina a khelh dan hian season puma a hmalam hun a hril thei. Rooney leh Nani hi chu a tir aṭanga an luh ngei a rinawm a, defence pawh an inthlak a rinawm loh.

Ashley Young hian bul a ṭan ṭha thawkhat a, mahse hetiang game lian ah hi chuan Park Ji Sung kan hmu leh nawlh maithei.

Arsenal hi chuan eng team pawh tum se an khelh dan an thlak ve ngai lo a, midfield ah ball an chang tam a, huaisen takin an nawr ṭhin. Pathianni zanah pawh Old Trafford a nih vang ngawtin an zam ve dawn lo a, 4-3-3 nen an rawn thawhchhuah leh ngei a rinawm.

Van Persie, Walcott leh Arshavin te hi chu khel ngei turah dah ta ila, midfield ah hian Ramsey leh Rosicky an chiang a, Djourou hian Song ai a awh a rinawm. Left back ah Traore hmel kan hmuh a rinawm a, Vermalean leh Koscielny te hi an dam chuan an luh ngei a rinawm bawk.

Nani hi Arsenal lakah a che ṭha phian zel a, Traore hian a veng hneh chiah angem? Chutihlaiin Evra hian winger tlanchak a ti thei vak bik lo a, Walcott hi a ven uluk a ngai viau ang. Arsenal midfield hi a phuahchawp deuh dawn a, mahse United midfield pawh ‘ropui’ tak a nih bik loh avangin an inbeitawk hle turah a ngaih theih awm e. Tlarhma nei ṭha ve ve, tlarhnung lama buaina nei ve ve an ni a, goal pawh kan beisei nual thei awm e.