Pathianni zanah Premier League match 4 a awm a, goal 16 tehmeuh a lut. Manchester leh Chelsea te inkhel chu post hran siam a ni tawh a, match dang ho hi in ennawn teh ang.

Tottenham Hotspurs 4 – 0 Liverpool

(Modric 7′, Defoe 66′, Adebayor 68′, 91′)

Top 4 team nih tum pahnih, Tottenham Hotspurs leh Liverpool te White Hart Lane-ah an inkhel a, Liverpool in si li fai an phur haw. Inkhel ṭantirh aṭangin Tottenham game a dik a, rang tak taka ball an inpe kual vel chu hmuhnawm tham a ni. Gareth Bale leh Modric te an langsar nghal a, Liverpool defence dinglamah Skrtel a rethei ṭhin ngei mai.

Minute 7 na lekah Modric hian penalty box pawn aṭangin goal ‘mawi’ zet mai a thun a, Spurs fans sapatal vel chu hmuhnawm dangdai tak a ni. Liverpool player pahnih, Charlie Adam leh Skrtel ten red card an hmu a, Agger a inhliam bawk nen, Liverpool chetchhiat ni a ni ber mai. Jermain Defoe chuan Liverpool buaina belhchhah turin minute 66 ah a pet goal. Player 9 a khel Liverpool an ṭang thei phian a, Downing leh Suarez ten an chance neih an hmang ṭangkai lo hlauh.

Spurs tân leithar Adebayor chuan minute 68 leh 91 a thunbelh a, Adebayor leh Defoe te inkawp hian EPL ah goal engemawzat an la thunbelh a rinawm. Van der Vaart a dam tawh a, Modric a chhuak lo a, Bale a tlanchak bawk si. Striker ‘ṭha’ an nei tawh a, Spurs hian Europe-a an khelh phak lohna chhan tur a awm bik lo.

Fulham               2 – 2         Manchester City

(Zamora 55′,                       (Aguero 18′, 46′)

Murphy 75′)

Manchester City chuan Premier League-a an 100%  record an hloh ta a, Craven Cottage-ah 2-0 a hma an hruai zet hnuin Fulham comeback an dang zo lo.

First half-ah Man City in inkhel an thunun a, minute 18 ah Sergio Aguero chuan a pet goal. Hemi hnu hian Dzeko leh Clichy ten an thunbelh teuh hle a, Fulham keeper Mark Schwarzer chuan ropui tak takin vawi 3 vel a save.

Second half an ṭan chiah a, minute 1 pawh an khelh hmain Sergio Aguero bawkin a pet goal leh a, he Argentine striker hian EPL-ah goal 8 a thun tawh!!  Fulham fans an beidawng duh lo a, an player te an au phûr a, minute 55 a an ‘move’ nalh tak chu Bobby Zamora ngei maiin a pet goal. Fulham an phur tawlh tawlh a, minute 75 ah Danny Murphy chuan a pet goal ve leh a, Craven Cottage chu a rik in a ri hulh hulh a ni ber.

Hemi hnu hian team pahnihten chakna goal thun tumin an innawr a. Richards, Dempsey leh Tevez ten pet goal theihna remchang an nei vek a, mahse huntawp thlengin goal dang a luhbelh lo. He match hi tun season-a City chak zawh loh hmasak ber a ni.

Sunderland 4 – 0 Stoke City

(Bramble 5′, Woodgate 11′ own goal, Gardner 28′, Larsson 58′)

Stadium of Light ah Europa League khel pha ‘ngat’ Stoke City an lenglut a, Sunderland lakah 4-0 ngawtin an tlâwm. Hei hi tun season-a Sunderland chak hmasak ber a ni a, Stoke City chak loh hmasa ber a ni thung.

Sunderland hian minute 5 lekah Titus Bramble hmangin hma an hruai a, hei hi Sunderland tâna Bramble goal thun hmasa ber a ni nghe nghe. Player thar lei nasa tak Sunderland hian bul an ṭan fuh a, midweek-a Europa League khel Stoke City game a zawi deuh niin a hriat. Woodgate chuan anmahni lamah a ti goal a, Gardner chuan home team tân rawn thun ve lehin darkar chanve a ral meuh chuan 3 – 0 a ni der tawh.

Stoke City hian Crouch leh Etherington te hmangin an ti goal teuh ṭhin hle a, an phûr lai takin lei thar tho Larsson chuan Sunderland goal 4 na a rawn thun. Hemi hnu hi chuan chak tur a chiang tawh a, huntawp thlengin goal dang a luh belh tawh lo. Steve Bruce pawh a nui ve thei ta e.