Manchester United chu kum 6 zet mai nomawi chawi loin an awm tawh a. Manager hrang hrang han ruai kual thin mah se Rih artui phur ang maiin hmalam an pênna lamtluang a sâwt thei lo. Manager thar rawn lut apiang ten an duh dan system an rawn hmang a, a sawt chuang si lo. Tluk leh din fawmin an khel thin a, Red Devils fans ten hlimna au thawm chhuah ve thin mah se rei a daih ngai lo. An bân uai thla leh khûp zawi tawh chu beiseina sang tak nen Ajax atangin manager thar April 2022 khan an la lut leh a. Chu pa chu Erik Ten Hag a ni a.
A rawn luh tirh a Premier League home match hmasa berah Brighton chu 1-2 in an hneh lo phawt a. A dawh leh ah phei chuan a aia chiang zawk a chak loin Brentford in lakah 4-0 ngawtin an mualpho! Brentford an hneh loh hnu hian a player-te thunun nan mel 8.5 (13.8 kms) chu a tlan tir a. He hi Brentford nen an inkhelh tuma an intlan tam hleihna zat chiah a ni. Hremna a pek hi player tam tak chu an ngaihdan a ni lo nasa a, mahse amah ngei pawh an chak lohna ah mawhphur a inngai in a tlan ve nghe nghe. Ar chuk tui lo khawpin selna au thawm a ring zui a, Erik Ten Hag hi Manchester United club te ang enkawl turin a tling tawk lo tih chu mi tamtak ngaihdan a ni. Mahse..
Tunah chuan United-ah danglamna nasa tak hmuh a ni tawh a. An khelh dan in awmzia a nei a, player a neih sa te an theihna tak tak pho chhuah sak mekin player hlawkpui fe fe an awm. Player a lakluh te reng reng tangkai takin a chhawr a, inkhelh laiin substitution a siam nasa in a tumpuite a zirin player khelh dan a her danglam fo thin; chu chu United chakna thuruk pawh a ni. Tunah Carabao Cup an chawi zo chiah a, EPL table-ah 3-na ni mekin FA Cup-ah an la dam a, Europa League R16 an lut bawk; Cup chawi theih an la ngah. Player-te an phur a, manager a phur a, fans te an phur bawk. United tantute Hnapkhawn pachang hmu ang maiin an khi hui hlawm tawh; an demawm loh e.
KHELH DAN MUMAL A DIN
ETH hian a tirah khan high possession leh high press in a khelhpui a, mah se an mualpho. Brighton leh Brentford lakah 60+% possession nei ve ve chungin goal 6 an chhuah. Hemi hnuah an khelh dan a ti danglam a, tuna a system hmanah chuan possession ngaipawimawh ber tawh loin ball an chan lai a play setup leh ball an hloh laia inven dan a thupui tawh zawk. A tawi zawngin an nawr laiin an vaiin an nawr a, goal ven a ngaihin an vaiin an veng.
Tuna a hman danah hian 4-2-3-1 formation a hmang tlangpui a. An nawr dan a ziriin 3-1-6 emaw 4-3-3 a hmang thin. ETH a hnuiah hian defensive midfielder an pawimawh hle a, pivot 2 hmang tlangpuiin tah chuan Casemiro/ Sabitzer leh Fred/Eriksen/McTominay te emaw a hmang thin. Ball an chanin Fred/Eriksen te tawlh hma in no.10 role an play fo a, ball an hlohin pivot 2 ah rang takin an inrem leh mai thin. Chu chuan Centre back te 2 nasa takin an veng thin a, an denfense hnawphuitu berte an ni- a bikin Casemiro hi. Interception leh ball lo chhuhsak, tumpui te counter attack tur hi vawi duai lo dang chat thin in, Bruno’n tlarhma a puih theih nan a thawhhlawk fal hle; hnunglam ngaihtuah lutuk ngai tawh miau hek lo.
GOAL NAWR IN AWMZIA A NEI
Goal an nawr dawn a sawi hmaih theih loh chu Portuguese Bruno Fernandes hi a ni. A tlangpuiin no.10 role play-in, a tul dan a zirin a dinglamah emaw pawh a insiam rem fo. CDM pakhat zawk a rawn tawlh hmain amah hi a tawlh let hret thin a, chu chuan ball recovery a tih awlsam phah thin a. No.10 a a awmin awl (space) awmna a hmu theiin an tumpuite final third a ball hlauhawm vawrh luttu ber a ni. EPL bikah phei chuan minute 90 a khelh ah goal thunna remchang vawi 3 siamsak zel ang a ni; a chungah De Bruyne leh Trippier chiah an awm. A taima in a tlan let peih a, ball an hloh changin recover tur leh defense pui turin a tlan let ngat ngat peih a ni.
Tin, ETH-an tunhnaia a chhawr nasat em em chu Wout Weghorst hi a ni. Striker ni si, goal a thun thei lo tiin mi tamtakin an sawisel. Mah se ETH hian a khelh tir danah goal thun tur ngawr ngawrin a chhawr lo a, tumpui te pressure pe a, amah vengtu lo pawt peng a a thiante tan a awl (space) siam sak turin a chhawr thin. Tunah rih chuan a tangkai khawp mai. Nou Camp-a Barcelona nen 2-2 a an in hnehtawk tumin no.10 role a play tir kha kan la hria anga, khing a chunga kan sawi zawng zawngte hi a hlenchhuak vek a, ETH pawn a fak hle a nih kha. A chang chuan thlar hnung thleng rawk te a tlan letin goal ven hi a pui thin a ni. A taimakna hi a chhawr duh chhan pawh niin a lang.
ETH hlawkpui ber tih a sawi ngam chu Rashford hi a ni. Goal a thun mawlh mawlh a, tun season ah goal 25 a thun tling der tawh. Veilamah khel tlangpuiin, tlarhma berah a dah fo bawk. United lamin ball an hloh a, nawr beh an nihin an tumpui defender/right back te an rawn tawlh hma tlangpui thin a, chu chuan mual veilamah awl tam tak a siam fo. Hetah hian ball an chanin Rashford um turin rang takin hmun awlah an an pass thin a, ani ang player tlan chak chuan a tumpuite tlan lehpelin goal thunna remchang an insiam vat thin. Chutiangin mual dinglamah pawh Antony a chhawr thin fo bawk. Counter attack a an inngahna te an ni.
An centre back pahnih Martinez leh Varane an inkawp fuh a, mi tamtak chuan Vidic-Ferdinand inkawp nen an tehkhin der tawh. United tan David De Gea te nen kulh bang an ni. Mual dinglamah Dalot/Wan-Bissaka a chhawr a. An tumpui turte a zirin a hman thlakthleng fo. Carabao Cup final a Newcastle player Saint-Maximin-an Dalot a chhaihbuai viau chu hmuin Wan-Bissaka a thun a, mual dinglam an buai leh tawh lo. Chutiangin mual dinglam a ball hlauhawm vawrh nasat angaihin Dalot zawk a chhawr fo bawk. Luke Shaw revival pawh sawi hmaih thiang a ni lo. An nawr laiin an tumpui ten a lai an veng tlangpui thin a. Chutih lai chuan mual veilam a awl awm hmang tangkai ber a ni thin ang. Hetia Shaw a tlan chhuah lai hian mual veilam chu Casemiro in emaw cover sakin Casemiro hmunruak chu Fred/Eriksen ten an luah leh thin. An goal nawr lai pawn an inveng tawn reng a ni.
Manchester United hian player tha chungchuang an nei a ni bik lo a, an that dan in an manager hian a chhawr thiam mai chauh a ni. An thianten ball an pass sual emaw ball an hlohin recover tumin an tlan let peih a. Tin, a pawimawh ber ‘tactical versatility’ chu hmuh a ni a, an goal venghim tur leh nawr turin player te mual tinah an insiam rem zung zung thin a ni. ETH hnuaiah hian thatchhe taka Bâwng fu her kal mai mai tur tan hmun a awm lo a. A duhdan a khel thei lo chu player man to engang pawh nise an lâng nghal lap zel. Titau a chhuah emaw field sîr thutthleng luah lum a ni mai.
Sawi tur ala tam a, ETH-a team te hi team inpum khat leh team khawng tak an ni tih an lan tir mek a. Arsenal, Liverpool, Manchester City, Tottenham leh Barcelona te hneh hi vanneih vang ngawt a ni hek lo. Erik Ten Hag era kan chuangkai chho tan dawn pawh a ni mahna le.. ilo thlir zel ang.
