Football tuipuitu ten kan nghahhlelh Manchester derby chu Etihad stadium ah boruak tang tak hnuaiah nizan khan khelh niin a pawl lam Manchester City in a sen lam Manchester United chu Kompany head goal hmangin 1-0 in an hneh.

Inhkhelh hma titi
He inkhel tur hi mi tamtakin an nghakhlelin Premier League Final ang hiala an chhal a ni a. United boss Sir Alex Ferguson phei chuan ‘Derby Pawimawh ber’ a lo ti hial a. Team pahnihte tan title inchuh kawnga a pawimawh em avangin a nghahhlelh awm hle a ni.United tan Draw ringawt pawhin an tan a pawi lo tih an hria a, City erawh chuan chak ngei ngei an mamawh thung.

Line Up
City lamin chak ngei ngei tumin 4-4-2 formation hmangin squad khawng tak an rawn tlar a. Tevez leh Aguero hmatawnga dahin Midfield ah Silva, Nasri, barry leh Yaya Toure te an rem bawk a. Defence lamah Captain Kompany hovin Lescott leh Clichy te an ding a, Richards aiah Zabaleta a lut thung bawk.

United lamin draw pawh pawisa lovin 4-5-1 formation hmangin Rooney an maltlat tir a, Veteran Giggs leh Scholes te bulah Park, Nani leh Carrick te awmin defence ah Ferdinand, Smalling, Jones leh Evra te an awm thung.

Man City: Hart, Zabaleta, Lescott, Kompany, Clichy, Barry, Toure Yaya, Silva, Tevez, Nasri, Aguero. Subs: Pantilimon, Richards, Milner, Dzeko, Kolarov, De Jong, Balotelli.

Man Utd: De Gea, Jones, Ferdinand, Smalling, Evra, Nani, Carrick, Scholes, Park, Giggs, Rooney. Subs: Amos, Berbatov, Hernandez, Young, Welbeck, Rafael Da Silva, Valencia.

Referee: Andre Marriner (W Midlands)

An Khel Ta E
City lamin ball thaiin game an tan a, mipui thawm a tha bawk a, game pawh a tang nghal hle. United lamin an tih thin dan pangngaiin a tir lamah an nawr nghal a, a tir minute 20 vel thleng chu game an thunun hneh hle. Hetih lai hian corner hlauhawm tak hmu in chuta tanga ball kal zel chuan Kompany awm ah a fuh a, penalty beiseiin United lam au dual mah se Referee Marriner a awm hnai tlat. Park, Scholes leh Carrick ten midfield an uap phui tlat a, City lami ball an chang rei hleithei lo.

Minute 20 bawr vel atang chuan City lamin United chak lohna an hmuchhuak tan ta a. A lai atanga an tlang theih loh avangin vei lam sira Giggs tlanchak tawh lo tak chu Nasri leh Zabaleta te chuan hmu fuhin attack nan an hmang tan ta a. Evra overlapping nasat avangin hmunawl a lo tam bawk nen, vei lam atang chuan City in ball hlauhawm tak tak an rawn chhuah ta mawlh mawlh mai a. United tan a luhaithlak hle ang.

A sir lam atanga City an rawn pawn nasat avangin United lamin Park a sir lamah an pawtthla hret hret a, chutah tak chuan Yaya Toure teho in chetna hmun an nei a, Midfield chu City ta a ni ta ringawt ami a ni. Mahse heti chung hian United defence an ding khawng tlat a, Goal ah an thun thei mai bik lo. Tichuan le, hun chanve an hmang zo dawn tawh tih in city lamin corner an hmu a, chu chu Silva chuan petin vengtu nei lo Kompany chuan chiang zet maiin a head lut a, United defender khawiah nge an awm? Etihad a City tantu ho chu an sapatal a ni ringawt mai a, an thawma tha hem hem hle. Goal luh hnu hian chwlhlawk in zui nghalin City an pawr hle.

2nd Half Hmuhnawm loh chu
Mi tam tak chuan in helh maithei a, mahse 2nd half hmuhnawm loh tak ani. United lamin goal thun ngei ngei an mamawh tih hria in tlemin an goal bawh an ti na deuh a, City lam lahin united counter attack hlauhawm zia hre rengin an tawngpawng nawr ngawt ngam lova, midfield ah an indah nil tawn a ni deuh ber mai a, ball in pass sual leh awmze nei lova ball vawrh mawp mawp ang chi a tam a, English football diktak Hit and Run tactic ngaina tu tan chuan hmuhnawm loh tak a ni.

Heti chung hian player pakhat hmuhnawm em em mai a awm a, chu chu Yaya Toure a ni. Nizan khan ani hian midfield ah ro a rel chiang hle a, a elpui United lam midfielder te khan kawng engkimah an tluk lo a ni ber mai. United lamin attack tum viau mah se Rooney a hma a amah chiah a an dah avangin engmah a thawk thei lova, khel chhe em em mai Park aia Welbeck an luhtir hnu ah Welbeck hma tawn tirin Rooney chu attacking midfield role ah a insawn a, mahse, hei hi hriain Mancini chuan Tevez la chhuakin De Jong a luhtir vat a, hei vang hian United beiseina chu a thamral a tih theih awm e.

Mancini vs Sir Alex
Second half minute 75 naah United attack chhu chat turin De Jong chuan Welbeck a ti tlu a. He thil thleng avang hian Sir Alex leh Mancini te chu inhnial in staff te kaihthen an ngai hial a, hei hian Etihad boruak san zia chu a tilang chian hle awm a. Hetih lai hian Balotelli erawh chu field sirah enghelh nei lo ang maiin fiamthu a la thawh ham ham a ni.

Tichuan 2nd half chu goal dang luh belh lovin 1-0 in an tin ta a. City in United lehpelin Table ah hmahruaitu an ni a. Game hnih khelh tur la awm ah champion theihna chance an nei tha hle a ni.

Inkhelh banah Manchester City boss Mancini chuan “Manchester United hi an champion a rinawm zawk.” a la ti fan a. Sawi zawm zelin, “Game hnih harsa tak kan la nei a, Champions League khelh tum Newcastle leh tlak hlau QPR kan la tum dawn a, United tum tur Swansea leh Sunderland chuan khelh chhan tur engmah an neih ve loh avangin champion na chance an la nei tha hle a ni. zanin ah kha chuan United kha striker pakhat chauh nen Draw tumin an lo kal a, kan khel tha zawk a, chak kan phu a ni.” a ti.

Manchester United boss Sir Alex ve thung chuan, “An keeper kha kan test tam tawk lova, a tir minute 15 vel kha chu kan khel tha viau a, mahse goal kan thun theih loh avangin half time thleng law law dan kan tum a, kan inrin loh lai takin goal kan chhuah a, kan tuar ta a ni. City hian champion na chance an nei tha hle a, an khelh leh tur 2 a an chak ve ve chuan an champion mai dawn a ni. Zanin khan sawisel tur ka nei lova, City khan chak an phu a ni.” a ti bawk.

Sawi belh ang
Nizan khan a game pumpui thlirin City an chungnung zawk chiang hle a. United player te khan Joe Hart kha hna harsa an pe lo hrim hrim a ni. Nani leh Park kha an khel chhe em em a, Valencia kha lut hma ta se enge a an ang? Tin, Mancini a fakawm a, player tha zawk nei reng chung a a pawngpaw nawr duh lo khan a fimkhur zia a tilang a. Ani hi tun season chu a cool em em a, Sir Alex a mind game ah pawh tawlhthlu duh lovin tun hi a thleng thei a, A champion pui mai ang em? United in nawr nat an tum hun lai taka Tevez lachhuak a de Jong a luh tir te kha a fuh thlawt a ni.

Tunah hian game 2 khelhtur ala awm a, City hian Newcastle an la tlawh dawn a, QPR an la mikhual dawn bawk a. Tin, United lamin Swansea an la mikhual dawn a, Sunderland an la tlawh dawn bawk a. Tunah hian City hi champion ah kan puang thei tawh em? Nge Newcastle lakah an chetsual kan ring? Inrinsiak hunlai a ni e.