Olympic Stadium, Kyiv (Kiev)-a European championship (Euro) final khelh zawh takah Spain chuan 4-0 a Italy hnehin a zawnin an champion a, vawi thum champion tawhin champion hnem ber Germany an nih rual chiah a ni. Final-ah hian David Silva, Jordi Alba, Fernando Torres leh Juan Mata te’n goal an thun a. Euro 12 Golden boot (Top Scorer) dawngtu chu Spain striker Fernando Torres a ni a. Tin, he inkhelah hian Iker Casillas, Fernando Torres leh Xavi Hernandez mai bakah Spain team hian record thar an siam a ni.

Inkhelh hma chanchin
Spain chuan a zawnin European championship final an lut a, champion zawn pawh an tum khawp mai. Chutih rualin Italy lam paw’n finalist nih satliah an tum lova, champion ngei an tum bawk a. Mi tam tak chuan Spain hi final an luh an ring fur a, an champion pawh an ring a ni. Mahse Italy erawh rinkai zingah an tel lo hrim hrim ti ila kan sawi sual tam kherin a rinawm loh. An ring lo mai ni lovin Euro tan hma hian Italy hi match fixing vangin an buai hle a. An Coach Cesare Prandelli phei chuan Euro khelh loh pawh pawi a ti lo hman hial a ni. Hei vang hian final chu sawi loh group stage an paltlang theih tawk an ring a ni. Mahse England leh mi tam takin champion-a an rin Germany an hneh a, final an lut a ni.

Italy leh Spain hi group stage-ah an lo intum tawh a. 1-1 in an in draw a. Chuvang chuan chak zawk tur hi rinthiam a har hle a ni. Italy hian 4-4-2 formation rawn hmangin group stage-a Spain an tum tuma an squad an siksawi nual a. Players pathum an thlak a. Barzagli, Montolivo leh Abate te’n an start thung a ni. Spain erawhin 4-3-3 formation bawk an rawn hmang leh a. Group stage-a Italy an tum tuma an squad ngai ang chiahin an rawn khel leh a ni.

Tute nge khel?
Italy :  Buffon; Abate, Bonucci,  Barzagli, Chiellini (Balzaretti-21’) ; Pirlo, Marchisio, Montolivo (Thiago Motta-56’), De Rossi; Cassano (Di Natale-46’)

Spain : Casillas, Arbeloa, Ramos, Pique, Alba; Xabi Alonso, Busquets, Xavi; Iniesta (Mata 87′), Fabregas (Torres 75’), Silva (Pedro 59’)

First half hmuhnawm takah goal hnih
Spain in an kick-off a. Inkhel hmuhnawm tak kan hmu nghal a. Khelhdan style inang lo ni mah se game erawh a hmuhnawm em em thung a. Spain lam hian midfielder an nei tha zawk nain duh angin game an thunun thei bik lova. Mahse half chance erawh an nei leh zeuh zeuh a. Minute 9 naah Fabregas leh Xavi chuan mawi taka Italy defence thiatin Xavi-in chance tha deuh a nei a mahse a pet over hlauh a ni.

Spainlam an hlauhawm chhunzawm zel a, minute 14 naah mawi takin Italy defence an thiat leh a, tuntum chu a goal ta ! Iniesta chuan Fabregas hnenah ball tha tak a pe lut a, a out hman dawna a lan laiin Fabregas hian a cross lut hman a, David Silva chuan mawi zetin a lo head goal a. Thawm a tha kher mai. Minute 14 lek a ni a,Spain-in goal khat an pet lut ta der mai.

Italy manganna belhchhah turin defender rinrawl leh tawnhriat ngah Chiellini chu a inhliam leh hlauh a. Loh theih lovin thlak a ngai a. Minute 21 naah Palermo defender, kum 30 mi Balzaretti chuan a rawn thlak a ni. Italy hian an nawr let nghal a. Half chance pawh an nei ve zeuh zeuh a. Mahse an ti goal thei bik lova. Balotelli leh Cassano hmel kan hmu tam tan a. Minute 32 naah Cassano shot tha tak chu Iker Casillas-in a lo dang per hman a. Mahse Spain lam hi counter attack-ah an hlauhawm hle thung a.

Italy lam hian an pet goal ve mai dawn emaw tih laiin goal an chhuah leh zawk tlat mai le! Casillas-a ball pet chhuah tha tak mai chu Spanish player te’n changin mawi takin ball an inpe kual a. Xavi chuan Italy defender te inkar ‘through ball’ tha tak a pe lut a. Valencia atanga Barcelona zawm tur, left back tlan chak tak Jordi Alba chuan lain khawvela keeper tha ber pawla sawi ngam Buffon-a man hman lovin a pet goal a ni. Stadium a chim dawn emaw tih tur khawpin Spain fans lam an ‘sapatal’ a ni. Minute 41 a ni a, 2-0 in Spain hian hma ah hruai der tawh a. Italy tan chance a chhe tawh hle a ni. Spain team hian Spanish game chu ‘boring game’ a ni tia sawisel tute ka an hup chiang kher mai. Hemi hnu hian Riccardo Montolivo shot tha tak chu Casillas chuan a lo save a. Goal dang a lut tawh lova, half time a ni zui a.

Second half chu Spain-in record siam nan an hmang !
Italy lam hian substitution an siam a. An siam fuh teuh hle a ni. Spain an draw tuma pet goal tu Di Natale a rawn lut a. A rawn chetha nghal hle a. Abate cross tha tak chu a lo head over hlauh a. Hemi hnu hi chuan Spanish hovin game an thunun leh tan a. Fabregas a tal na hle a, penalty box chhungah ball a khalh lut a, defender pahnih a bum hman a, a khalh tlang tep a mahse Buffon chuan a lo dang hman a ni. Spain lam hian corner an hmu a, Sergio Ramos chuan lo head-in Bonucci kutah a fuh a. Mahse referee-in a hmu miau lova, penalty an hmu ta lova. Italy an vannei a, Spain lam an vanduai thung! Spain hian goal thum thunna chance an chan a ni.

Minute 50 naah Montolivo chuan Di Natale tan ball tha zet a pe a. Di Natale hian pet nghalin a goal dawn emaw tih hnuah, khawvela keeper tha ber tia an sawi nasat ber pawl Casillas chuan a lo save hman hlauh a. Italy lam hian an ui khawp ang le. Minute 56-ah Montolivo chhuakin Paris Saint-Germain midfielder Thiago Motta a rawn lut a. Minute tam pawh a khel hmain Italy vanduaina belhchhah a ni leh ta! Rawn lut thar Thiago Motta chu a inhliam leh hlauh a. Stretcher-a zawnchhuah hial a ngai a. Italy hian substitution pathum an lo siam tawh si a, midang an lut thei tawh lova, kim lovin an khel ta ringawt a ni.

Hemi hnu phei hi chuan midfield nei tha zawk leh tam zawk Spain lam hian game an thunun tawh a tih theih a. Italy lam hian chance tha an nei meuh tawh lo a ni. Inkhel pawh beisei angin a hmuhnawm tawh loh a tih theih. Minute 84-ah Xavi chuan Torres hnenah ball tha tak a pe a, Torres hian a thiam thil a lo la theihnghilh awzawng lo mai, mawi zetin sir tawkah a pet goal a. 3-0 a ni a. Italy tan beisei tur a awm tawh lo a ni. Spanish Coach Vicente Del Bosque hian Torres hi a khelh tlem tir viau nain a khelh chhunah erawh a kheltha thei hle thung a ni.

Minute 88 naah Spanish midfielder te hian mawi taka Italy defence thiatin Torres chuan ball a chang a. Box chhungah bench atanga rawn lut ve tho Juan Mata tan ball tha tak a pe a, ani hian chiang zetin a lo pet goal a ni. 4-0 a ni a. Italy tan beisei tur a awm tawh lo. Goal dang a luh belh tawh lova, 4-0 in Spain an chak a, Euro 2012 champion an ni ta a ni.

Sawi zui ang
* Mi tam takin Spain game hi ‘boring game’ an ti a, mahse an champion thova, boring game kan la ti dawn nge ‘beautiful game’ kan ti zawk dawn?

* Zandang aiin Spain kha counter attack-ah an hlauhawm a tih theih a. Hemi kawnga thawhhlawk tak Xavi leh Iniesta an fakawm hle.

* Spain hian players an nei tha hrim hrim a, striker mumal tel lo paw’n an champion thei a ni tih an rawn pholang a. Mahse Torres hian start ta ziah zawk se hei ai hian match tinah goal an thun hnem zawkin kan ring em? Zanin paw’n rei lo te a khelh chhungin goal 1 a thun a, goal khat a siamsak bawk a ni.

* Italy Coach khan substitution a siam zo hma lutuk kha an tuar phah kan ti ang nge an vanduai ve hrim hrim kan ti dawn. First half-ah rin loh deuhvn Chiellini a inhliam a. Second half-ah Thiago Motta a inhliam leh a, players 10 chauhvn minute 30 chuang chu an khelh phah a ni.

* Italy khan Thiago Motta inhliam hnu phei kha chuan an ‘fight’ thei tawh lo a tih theih. Goal hnih an chhuah tawh a, an kim lo zawk bawk si a, an hneh ngang lo a ni.

* Italy hi mi tam tak chuan final an luh kan ring kherin a rinawm loh. An champion lo kha mak kan ti nge mak kan ti lem lo? Italy champion loh ai chuan Germany-in final an lut lo kha mak ti kan tam zawk mai ang em?

* Xavi, Iniesta, Alonso, Busquets, Silva leh Fabregas te hi khawvela midfieder tha ber an ni mai lo’ng maw? World champion leh European champion midfielder an ni miau si a. World Cup-ah pawh hian an champion leh mai kan ring em? David Villa a dam tawh ngei beisei bawk ila.

* Spain hian 1920 Olympics hnuah Italy hi minute 90 chhungin an la hneh leh miah lova, zanin khan record siamin minute 90 chhungin an hneh ta a ni.

* Spain hi a zawna major tournament pathuma champion thei hmasa ber an ni a. Euro 2008, World Cup 2010 leh Euro 2012-ah te an champion a ni.

* Spain hian Euro final vawi li an khelhna niin vawithum an champion a. 1964, 2008 leh 2012 ah te an champion a. 1984 khan France lakah an vanduai thung a ni. Tihian vawi thum champion ve tain champion ngun ber Germany an nih rual ta chiah a ni.

* Spain hi a zawna European championship champion thei hmasa ber an ni a. 2008 leh 2012 ah an champion zawn a ni.

* Spain Captain Iker Casillas chuan Euro-a goal chhuah lo rei ber record a siam a ni. Minute 510 chhung chu goal chhuah lovin a awm a. Record dinglai chu Italian keeper Dino Zoff siam niin minute 494 chhung goal chhuah lovin a awm a ni.

* Tin, Casillas hian record dang a siam bawk a. Chu chu mahni ram chakpui tam ber record a ni. Vawi 100 zet Spain hi a chakpui tawh a ni.

* Fernando Torres chu Euro final hranga goal thun thei awmchhun a ni. 2008 leh 2012 final-ah goal a thun a ni.

* Torres-a goal hnih te hi Xavi siamsak ve ve a ni a. Xavi pawh hi Euro final-a goal hnih siamsak thei awmchhun a ni.

* Mata hi tun tournament-a a vawikhat khelhna a ni a. A match hmasa berah goal a thun nghal a ni.

* Spain hi an Coach Vicente Del Bosque hnuaiah competitive match 19 chhung chu chak loh nei lovin an la kaltluang a. Match 9 phei chu goal chhuah miah lovin an awm a ni. Italy erawh Coach Cesare Prandelli hnuaia an vawikhat chak lohna a ni a. Game 16-ah vawi 10 ngawt an ‘clean sheat’ a ni.

* Tin, Vicente del Bosque hi Coach anga Champions League, World Cup leh European Championship (vawihnih) champion thei awmchhun a ni.

* Italy hi Euro final an vawi thum luhna a ni a. 1968, 2000 leh 2012 ah an lut a. 1968 chiah khan an champion a ni.

* Balotelli hian final-ah goal thun lo mah se Italian player Euro-a goal thum thun thei hmasa ber a ni.

* Italy hi major tournament khelh hmaa buaina an neih apiang hian mi rin loh deuhvn an champion thei hle a, kumin erawh an champion ta bik lo a ni. 1982 World Cup hma khan match fixing vangin an buai hle a. Italian striker Paolo Rossi chu best player leh top scorer niin Italy a rawn champion pui a. Tin, 2006 pawh khan Juventus kha match fixing vang bawkin an buai leh a. Mi rin loh takin an rawn champion a. Kumin pawh hian an buai leh a mahse rin loh takin final an thleng a. Mi tam takin an champion leh mai an rin laiin Spain an hneh zo ta lo a ni.

* World Cup leh Euro-ah hian England, Germany leh Spain te hian Italy hi an hneh ngai meuh lova. Zaninah erawh Spain-in kha record kha an thaichhe thung.

* Zanin inkhel result, 4-0 kha Euro final history-a insawpna sang ber a la ni. Record dinglai chu 1972-a West Germany-in USSR 3-0 a an hneh kha a ni.

* Goal thum thun hi players paruk ngawt an awm a. Mahse Golden boot (top scorer) dawngtu chu Fernando Torres a ni. Ani hian minute 189 lek khelin goal thum a thun a, chuvang chuan Golden boot a dawng ta a ni.

 Statistics

* All images from AP, Getty Images and www.livescores.com