Zaninah Euro 12 quarter match thumna kan en dawn a ni a. He inkhel tur hi ngaihven hlawh pawl tak a ni. A chhan chu Spain hi champion lai an ni a mahse competitive match-ah hian Spain hian France hi an ngam lo hle a ,vawikhat mah major tournament-ah Spain hian France an la hneh lo a ni. A vaiin competitive match hi vawi 6 an khel tawh nghe nghe.

Midfielder nei tha zawk Spain bawk hian game an thunun leh rin a ni a. Mahse France hi chak lo hlim an ni a, a zawna chak loh chu an duh dawn bik lo a ni. France lam hi counter attack-ah an hlauhawm hle tura ngaih a ni. Khelhdan style inang lo an ni nain inkhel hmuhnawm tak beisei ang. Spain leh Italy intum dawn pawh khan tumahin khatiang khan a hmuhnawm kan ring lo anih kha. Zaninah engkim a chiang ang.

Tute nge khel tura I rin? 
France : Lloris,Debuchy, Koscielny, Rami, Clichy, Cabaye, M’Vila, Menez, Nasri, Ribery, Benzema

Spain : Casillas, Arbeloa, Ramos, Pique, Alba, Busquets, Alonso, Iniesta, Xavi, Silva, Torres

Spanish boss Vicente del Bosque hian Torres hi a mal tlat tir leh rin a ni a. A hnungah Iniesta, Xavi leh  Silva a dah leh rin a ni bawk. An ni hnungah hian Busquets leh Alonso an awm leh hmel a. Defence-ah pawh Arbeloa, Ramos, Pique leh Alba te bawk an awm leh rin a ni. Tin, Captain Casillas bawkin goal a veng leh ang.

Spainish player Alvaro Arbeloa, Jordi Alba, Fernando Torres, Xabi Alonso leh Javi Martinez te hian yellow card an hmu tawh a. Zanina an hmu leh anih chuan chak pawh nise Semi final ah an hmel kan hmu lovang.

France lam hi chu an match hnuhnung berah Sweden an hneh loh avangin an squad hi sawi lawk thiam a har a. France boss Laurent Blanc hian  Philippe Mexes erawh a hmang thei dawn lo tih chu thilchiang a ni tawh a, Sweden an hneh loh tum khan a inhliam a ni. A aiah Arsenal Defender Laurent Koscielny a hman rin a ni.

Tin, Samir Nasri leh Franck Ribery te pawh Nilaini kha chuan an inhliam deuh avangin training an zawm thei lova mahse zaninah erawh an khelh theih beisei a ni. Tin, Yohan Cabaye pawh hian an match hnuhnung ber kha a khel thei lova, zaninah erawh a khelh theih beisei a ni bawk.

France-ah chuan Laurent Blanc hian Benzema bawk hi a mal tlat tir leh rin a ni a. A sir atang Ribery leh Menez te’n an nawr pui leh rin a ni. A laiah Nasri a awm leh ngei ang a. Tin, an hnungah hian Cabaye leh M’Villa te an awm rin a in a. Defence lamah chuan Debuchy, Koscielny, Rami leh Clichy te hmel kan hmuh a rinawm a. Captain Lloris bawkin goal a veng leh bawk ang.

Hriat atan 
* Euro 12-a Spain record chu vawikhat draw, vawihnih chak niin an Group-ah leader an ni a. France record erawh vawikhat chak, vawikhat chak lo, vawikhat draw niin an group-ah runners’ up an ni thung.

* Goal keeper te ve ve captain an ni dawn a. Khawi captain zawk tak che tha ang maw. Tin, Spain leh Italy intum tum pawh khan goalkeeper ve ve kha  captain an ni a, 1-1 in an indraw anih kha.

* Spain hi October 2006 atang khan competitive match-ah vawihnih chiah an la chak lo. Confederations Cup-a USA an hneh loh leh World Cup 2010-a Switzerland an hneh loh bak kha chu chak loh an la nei lo a ni.

* Fernando Torres hi Spain squad-a top scorer nilai mek a ni a. Match 96-ah goal 30 a thun a ni.

* Spain midfielder Xabi Alonso a khel anih chuan, ram tana vawi 100 a khelhna chiah a ni ang.

* Spain hi Euro 12 group stage-a vawikhat aia tam ‘clean sheet’ thei awmchhun an ni.

* Spanish midfielder leh playmaker ni bawk Xavi chuan Ireland nena an inkhelh tum khan passing completed/successful 127 zet a nei a. Kum 20 chhung zet Dutch player Ronald Koeman-a record vawi 117 chu a khum ta a ni. Ronald Koeman hian 1992 Euro-a Denmark an tum tum khan he record hi a lo siam tawh a ni.

* Spain hian Ireland an hneh tum khan European championship-a passing successful ngah ber record thar an siam bawk a.  Vawi 860 zet an in pass a, anmahni record tho vawi 778 chu an khum a ni.

* Spain hi an chak anih chuan European Championship record, match 10 chak loh nei lo, record dinglai chu an nih rual thei dawn a ni.

* France hian group match tawp bera Sweden an hneh loh avang khan vawi 23 chak loh nei lova an game kaltluang lai chu a tawp ta a ni.

* France Striker Karim Benzema hian competitive match 4-ah goal a thun tawh lo a ni. Hengah te hian a start vek bawk.