Manchester United leh Real Madrid striker hlui Ruud van Nistelrooy chu Euro 2012 Netherlands squad ah a tel ve dawn lo tih Netherlands coach Bert van Marwijk chuan a sawi. Nistelrooy hi World Cup 2010 ah pawh Netherlands squad ah telh a lo ni tawh lo a ni.

Van Marwijk chuan Dutch chanchinbu Algemeen Dagblad hrilhin, “May thla-a hetiang inhrilh chauh hi ka duh lo a, chuvangin a hma thei angin ka hrilh a ni. A tân chuan chanchin lawmawm lo tak a ni a, mahse Poland leh Ukraine ah a zin ve dawn lo tih hrilh tur hian amah (Nistelrooy) pawh ka be tawh a ni.” a ti.

Nistelrroy hi kum 35 a ni tawh a, Spanish La Liga club Malaga ah a khel mek.

Netherlands tâna game 70 a goal 35 thun tawh tu Nistelrooy chuan coach thutlukna chu mak a tih lem loh thu a sawi a. “Euro 2012 ah ka tel ve dawn lo tih chiang takin coach in min hrilhfiah tawh a, a thutlukna hi ka hrethiam a, ka lo rinlawk dan a ni mah zawk. Malaga ah ka start pha tawh lo a, chuvangin Netherlands -a khelh phak chu thil harsa tak a ni hrim hrim tawh a ni.

“Van Marwijk hi ka zah a, min enkawl dan hi a ṭha in a fiah fel thei em em a ni. Oranje a khelh ka la duh tih a hria a, hetia chiang taka ka khelh phak loh tur thu min hrilh hi kan pahnih tân pawh a ṭha zawk awm e.” a ti.

Netherlands hian striker ‘ṭha’ an tlachham lem lova, Robin van Persie leh Klaas-Jan Huntelaar bakah Dirk Kuyt leh Luuk de Jong te pawh an la nei. A vanglaia ‘poacher’ ropui Nistelrooy tân hmun a awm lo pawh hi a âwm lo lem lo e.

Netherlands hi Euro 2012 ah Portugal, Germany leh Denmark te nen group khatah an awmho ang.

source: goal.com