European Championship 2012 atana qualifying round khelh zawh tak a tling zo ve ta lo, mahse che ṭha si te chuan play-off an khel leh ṭan ta. Ningani zana play-off match 4 awmah Croatia, Czech Republic leh Republic of Ireland te an chak chiang hle a, Bosnia leh Portugal te goal awm lovin an inhnehtawk thung a ni.

Turkey 0 – 3 Croatia

Play-off first leg khelhah hian Croatia chuan Ataturk Stadium-ah Turkey an va tlawh a, 3-0 in an va hneh a, second leg chu an home-ah a nih ve tawh dawn avangin Croatia hi tlin ngei tura ngaih theih an ni ta.
He inkhelah hian inkhelh tan atanga minute hnihna lekah Vedran Croluka cross tha zet chu Ivica Olic chuan hnai set sawtah a thai goal a, Croatia-in hma an hruai nghal a. First-half tawp hma deuhvin Mario Mandzukic chuan goal a khung leh a, chawhnu lamah Corluka hian goal khung lehin Croatia an chak chiang hle a ni.

Czech Republic 2 – 0 Montenegro

Czech Republic pawh an chak a, Montenegro 2-0 a hnehin Euro 2012 khelh an tum hle. Anni pahnih inkhel hi a hmuhnawm hle a, goal a lut thei mai lo. Minute 63 naah Vaclav Pilar chuan a head goal a, Czech-in hma an hruai hram a ni. Second leg khel leh tur an nih avangin si khat chauh a tawk lo tih an hria a, mahse an khung belh thei bik lova. Hun tawp dawnah Sivok chuan pet goal lehin Czech chuan beiseina sang zawk an nei thei ta a ni.

Bosnia 0 – 0 Portugal 

Hetih lai hian Bosnia-Herzegovina leh Portugal te chu goal awm lovin an ṭin a, Portugal hi second leg thleng tur an ni a, an lawm zawk ngei ang.
Bosnia hian Zenica-a Bilino Polje stadium hi an Lucky Stadium an tih thin a ni a, mahse an inkhelh chhung zawngin Portugal an che ṭha zawk mah a ni. Real Madrid Jersey a hak a ropui em em Cristiano Ronaldo chu Portugal kawr a hakin a ropui leh lo pek a. He inkhela chance ṭha ber pawh Helder Postiga hmuh a ni. Engpawh ni se Lisbon-a an inkhelh leh hunah Portugal hi chak tura rinkai zawk an ni tawh ang.

Republic of Ireland 4 – 0 Estonia

Republic of Ireland-in Estonia 4-0 in an hneh a, LA Galaxy striker Robbie Keane chuan goal hnih a khung a, Keith Andrews leh Jonathan Walters ten goal khat ve ve an khung bawk a, Aviva Stadium-a an inkhelh hunah draw result pawh nei se an pawiti lo ngawt ang. Estonia hi player pahnih hnawhchhuahsak an ni a, an che hlei thei lo a ni.