Euro 2012 khuhhawnna ah match pahnih kan hmu a. Inkhel hmasa zawk ah Poland chuan Greece 1-1 a in draw puiin, a inkhel hnuhnung zawk ah erawh chak zawk an awm chiang hle. Russia chuan si 4 ngawt Czech Republic lamah thun in Group A ah hma an hruai ta. He match hi Russia in an thunun hle a, an vanneih ni phei chu nise goal ruk velh lai thun thei tur an ni. Euro khuhhawnna a inkhel pahnih te hi a hmuhnawm a, inkhel hmasa zawk ah inkhel boruak ti tang tu yellow card, red card leh penalty thelh te kan hmu a, a hnuhnung zawk ah goal lut tam kan hmu leh. Hei lo liam a Euro khuhhawnna inkhel hmuhnawm a awm dawn chuang em ni? Euro 2012 nghah man awm ngei mai.

Czech Republic Starting Lineup (4-2-3-1): Cech, Gebre Selassie, Kadlec, Hubnik, Sivok, Rezek (Hubschmann 46’), Rosick, Plasil, Pilar, Jiracek (Petržela 76’), Baros (Lafata 85’).

Russia Starting Lineup (4-3-3): Malafeev, Anyukov, Ignashevich, Zhirkov, Berezutski; Shirokov, Denisov, Zyranov, Dazgoev (Kokorin 84’), Arshavin, Kerzhakov (Pavlyuchenko 74’).

Referee: Howard Webb

1^st Half- Bul tan tha zawk in si hnih an phur

Czech Republic in bul an tan tha zawk a, inkhelh tan tirh atangin ball an chang tam nghal. An tlankual tam a, ball an in pe tam a, Russia lam hi atir lamah a bet  zawk ah an tang. Kadlec leh Selassie hmang in a sir atangin an nawr a, a laiah an captain Rosicky a tangkai. Mahse Czech Republic lam hian an ball chan tam an hmag tangkai theilo a, Russia lamah goal hlauhawm an nei theilo. Minute 15-na ah Russia lam hian counter-attack atangin goal hmahruai an rawn thun ta. Aleksandr Kerzhakov in ding lam atanga ball rawn kal chu goal ban an tauh per in, a ball let leh lam hi Alan Dzagoev chuan chiang zet in alo pet lut. Russia lam an ‘confi’ sawt a, an ball in pass leh an che velh a rawn dik tan. Czech Republic defense a buai a, hemi hnu lawk pawh hian Dzagoev tho hian a thun leh thelh.

Russia tan an captain Andrey Arshavin a langsar tial tial a, minute 24-na ah counter-attack atang tho in Roman Shirokov chuan goal thun leh in  keeper a chip khum. He goal hi Arshavin siam sak niin, a ball pass luh a tawk in a class kher mai. Russia lam in goal hlauhawm em em an neih chhunzawm tawh biklo a, Czech Republic lam hian Pilar hmang in 1^st half tawp dawn ah an thun thelh a. Mahse Russia  leh Zenit St.Petersburg keeper, Malafeev a ding khawng tlat a, 2-0 a hma hruai in chawlhlawk an hmang.

Czech Republic beseina ti thamral tu 2^nd Half

2^nd half tan anih atang Czech Republic –in substitution siam in, game rawn thlak an tum. Russia lam in ball hlauhawm chhuah zawk mahse minute 52-na ah Vaclav Pilar chuan mawi zet in Czech Republic tan a rawn thun. He goal lut tur a Jaroslav Plasil passing fing tak chu hmuhmaih phal chi anilo, Russia defence a thiat nalh kher mai. A game a atang sauh a, Czech Republic an rawn phur thar a, Russia lamin fimkhur takin ball an in pe kual a, a lai an thunun in ball an chang tam zawk. Russia lam hian Zyranov hmang in chance nei mahse goal an a chan tir zolo a, Czech Republic lam pawn khel tha tak Pilar hmang in half-chance ang chu an hmu ve.

Russia tlar hmaa tlan Kerzhakov chuan chance tha lutuk vawi 2 lai hmu in goal ah a chantir zolo a, minute 74-na ah Pavlyuchenko chuan a rawn thlak. He pa rawn lut hian game a rawn thlak chiang kher mai. Minute 74-na ah Alan Dzagoev tan tha zet a siamsak in ani hian zanin a a goal hnihna tur kawh zet in a pet lut a, 3-1 ani ta der mai. Czech Republic lam in beseina tlemte an la neih chu Pavlyuchenko hian ti tawp in, minute 82-na ah defender pahnih kar atangin mawi zet in a pet goal a, 4-1 ni tawh in Czech Republic tan beisei tur a awm tawh lo. Russia lam hian ball an in pass kual tan a, Rosicky shot te chuan Malafeev a paltlang zawh miau loh avangin hun atawp meuh chuan 4-1 laiin Russia an chak ta a ni.

‘Hming-Lam-Har Group’ atangin Russia in Quarter-final an lut chiang?

Game khat chauh anla khel a, point 3 chauh anla hmu. Mahse nizan a an khelh dan en kha chuan Russia hi ‘Dark Horse’ an ni thei mai angem? An game flow atha em em a, a sir atanga an nawr a na in an counter-attack phei kha chu Czech Republic lamin an ngam lo hle anih kha. An tumpui te lamah world class keeper Peter Cech a ding tih an hreve lova, goal 4 lai an thun. An captain Andrey Arshavin a khel tha thlawt a, game a siam in Russia attacking tina tu ber a ni ti ila a sual awmlo e. An group a awm ve Poland leh Greece chu an tan tum huphurhawm lutuk an nih a rinawm loh a, Group A atangin Russia hi an tlang ang tiin huai takin sawi mah ula, in tisual kher lo maithei a ni.

He inkhel ah hian Russia an khel tha zawk a, chak an phu a ni. Czech Republic lam hian Rosciky, Pilar leh 2004 a Euro top scorer Milan Baros te nei mahse  an che hleitheilo. An coach sawisel hlawh Michal Bilek chuan sawisel a hlawh zel dawn a ang khawp mai. Russia kha vannei se chu, goal thun belh nual tur an ni. Chutih rualin Russia goal thumna te kha a ball kal kha chak viau mahse Peter Cech te ang class tan chuan, alo save lo kha Czech Republic ‘vanduaina’ ani mai em? Alan Dzagoev kha tlar hmaah a talna in, a hlauhawm em em a, goal 2 a thun anih kha. Euro ah hian kan ‘players to watch’ list ah a dah chi viau ang. Engpawh nise, sawi tur atam a, a chak phu zawk Russia an chak a, he ‘Hming-Lam-Har Group’ atang hian an tlang chiang tawh in ti ve em?