Zaninah World Cup dawt a khawvela Football inelna sang ber Euro 2012 chu tan alo ni dawn ta  reng mai a. Kan hriat angin tun Euro hi Poland leh Ukraine in an inthlen tawm dawn ani a. Inkhelhna hmun pariat a awm dawn a, a thlengtu ram pahnih hian hmun pali ve ve in an insem a. Poland hian National Stadium, Warshaw ah opening ceremony leh game hmasa ber an thleng ang a, Ukraine hian Olympic Stadium, Kiev-ah final an thleng ve thung ang.

Inkhelhna a hman tur Stadium pariat a awm dawn a, heng zinga paruk te chu sak thar hlim an ni nghe nghe. Heng an Stadium sak thar te hi a theuneu lo hle a, tunlai a stadium sak thar zingah chuan a changkang berte an ni ngei ang. Stadium pariat zinga pathum phei chu UEFA in stadium rating a pek san theih ber Category 4 class nei pha anni a. A thlengtu ram pahnih te hian stadium in neih changkang siak lamah an lo inel nasa hle tih a hriat thei awm e. Hei hi football fans te tan chuan duhthusam ani ringawt.

Inkhelhna hmun tur Stadium hrang hrang te han en hmasa ila:-

Awle, tuna tum atan chuan Opening Ceremony leh match hmasa ber khelhna tur stadium sak thar, National Stadium, Warshaw ami hi kan bihchiang dawn ani.

• Official name                      : National Stadium (Poland National Team home ani nghal)
• Capacity                               : 58,500 (Concert: 72900)
• Location                               : Warsaw, Poland
• Sak tan kum                        : 2008
• Hawnni                                 : January 29, 2012
• A sak man                            : £409million
• Khelmual zau zawng        : 105 metres x 68 metres
• Architect                              : Gerkan, Marg and Partners (GMP), Germany
• Match hmasa ber              : Feb ni 2, 2012: Poland 0-0 Portugal

Design

National Stadium hi Warshaw a stadium upa ber pawl, 10th-Anniversary Stadium awmna thin hmunah sak ani a. A design tu GMP Architects te hi 2010 South Africa World Cup Semi Final pakhat zawk, Spain in Germany si khat a an hnehna Moses Mabhida Stadium design tu te kha an ni. Stadium pawn lam hi hnanga kho kan tah ang deuh hian design ani a, Poland national rawng var leh sen inpawlh langsar tak tura design ani. Stadium hi 41m laia sang ani a, a roof sang lai ber phei chu 70m lai ani. Warshaw khawchhungah chuan a langsar hle ani.

Facilities

Stadium hi ground level atanga chhawng 4 a sang ani a, a hnuaiah basement chhawng 4 lai a la awm bawk. Basement ah hian players dressing rooms, kitchen, car parking, journalists room, fan club, fan shop, museum, press conference room leh technical areas hrang hrang te a awm a. Milem tawp bera a lan ang khuan khelmual hnuaiah hian car parking chhawng hnih a awm a, hetah hian car 1765 lai a park theih. Stadium luhna ber chu ground floor level, promenade an tih atang hian ani a. Hetah hian inthiarna, dawr, first-aid hmun leh mi 2600 thut theihna business club te a awm.

Mipui thutna hi chhawng hnih a sak ani a, hemi chhawng inkarah hian nuam bik taka thut theihna VIP boxes leh restaurants te dah ani. He stadium changtlung tak maiah hian sky box changkang lehzual bik 69 a awm a, press mi tan seat 900, premium seat 4600, rual banlo tan seat 106 leh VIP seat 800 lai a awm bawk. Stadium bul velah hian practice field te, community spaces leh transportation facilities hrang hrang a awm bawk ani.

Roof

He stadium danglamna ber chu a chung khuh theiha an siam hi ani. A roof area hi 69,000 m² lai ani a, chu ta 10,000 m² chu retractable roof area ani. Fiberglass leh Teflon puan a siam niin, vur tla 18 cm laia chhah pawh a dawlzo ani. A chung hi hmun thumah a then theih a, mipui thutna zawn khuhna hi a chesawn ve theilo a, khelmual chung zawn erawh hi chu pawh hawn theih ani. Hemi inkar hi meter 8 a hlai glass a khuh leh ani. A roof system atan hian mar leh tang takin steel cables enemawzat chu stadium hual tu thir ban atang te in pawh kual ani a. Heng cables te hi khelmual chung feet 100 chuang zeta sanga inkhai thir tlawnah an inzawmkhawm leh a. Hei hi bicycle ke spokes ang deuh hian a inpawt mar ta ani. A chung khuhna hi minute 20 chhung lekin  pawh khuh theih ani a. He system hi thil thar chu ani lem lova, Roman ho khan Coloseum chung khuh nan khan an lo hmang daih tawh ani.  A roof ringawt hi tihian 1200 tons laia rit ani a. A laiah hian LCD screen lian 4 khai ani bawk a, mipui tan en a remchang hle ang.

(A lian zawka en nan pic hi click rawh)

Euro Stadiums dangte pawh a tahtawlin kan la en leh zel dawn nia.