Euro 2012 Final kan lo thleng dawn ta der mai a. Stadium changtlung tak takah inkhel hmuhnawm tak tak kan en a, naktuk zana final match khelhna tur Olympic Stadium, Kiev, Ukraine ami hi i lo belchiang hmasa leh ang u hmiang. He Stadium hi Ukraine a stadium lian ber niin, Luzhniki Stadium, Moscow dawtah chuan East Europe-a lian ber ani bawk. Olympic games thleng thei tura duan anih angin a hming pawh hi Olympic National Sports Complex tih a ni bawk.

• Official name                      : Olimpiyskiy Stadium (Ukraine national football team home ani nghal)
• Location                                : Kiev, Ukraine
• Capacity                               : 70050
• Sak tan kum                        : 12 August 1923
• Renovation                          : Euro atan 2011 khan sak that ani
• Hawnni                                 : 8 October 2011
• A sak man                            : $600 million
• Khelmual zau zawng        : 105 metres x 68 metres
• Architect                              : Gerkan, Marg and Partners (GMP), Germany
• Match hmasa ber              : 11 November 2011, Ukraine 3-3 Germany

History

Olympic Stadium hi a tirah chuan Red Stadium of Trotsky tih hming pu in 1923 daih tawh khan sak a lo ni tawh a. 1997-99 chhung khan nasa takin FIFA duh dan anga thuamthat a ni a. FC Dynamo Kiev home ground ani thin a, mahse a stadium hi a len tham em avang leh inkhel entu an tlem thin avangin anni hi an insawm chhuak ta a. Inkhel liantham deuh atan chiah anni hi chuan an hmang ta ani. Tunah chuan Unkraine National team home ground ani mek. Tun Euro thleng tura ruat anih vang khan he stadium hi nasa taka chei that leh ani a. Thutna tier hnuai chu thiatin sak that ani a, west stand thar sak belh a ni a, a chung khuhna thar hlak sak belh a ni bawk. Tin, heng bakah hian Stadium pawn maiah hian building chhawng 13 a sang sak thar ani. Heng hna hi 2008 khan tan niin $600 million lai sengin nikum mai khan zawhfel a ni a. Tunah chuan UEFA 4 Star category stadium niin, Europe a stadium changtlung ber pawl, Euro Final hial thleng thei a lo ni ta a ni.

Design

He Stadium hi Olympic games thleng thei tura tih anih avangin khelmual hi athletics track in a hual a. Hei hi football enna atan chuan duhthusam a ni lo tih mail lohah chuan stadium tha tak a ni. A structure hi a dung 300m, a vang 220m a sei niin, 51m laia sang a ni. Tuna stadium dinglai hian kum 1968 a sak thutna tier chung zawk chu a chhawm chho ta zel a. 2008 a thuam that anih khan 1948 a sak a plinth erawh siam danglam fe a ni a. He stadium thuamthatna a langsar ta ber chu a chung khuhna thar leh a stadium tuamna thar mawi danglam tak mai hi a ni. A chung khuhna hi 43,000 m² laia zau ani a, tensile fabric puan a ni. Skylight te reuh te te dah ani a, hei vang hian stadium chhung pawh hi a eng tha hle ani. He stadium hi a tha thei ang bera design leh sak a ni bawk a, rikrum thilah pawh minute 8 lek chhungin a entu mipui zawng zawng hi an chhuak hman vek tura tih a ni. He renovation ti tura stadium design siamtu te hi GMP Architects an ni. Anni hi Euro opening match khelhna Warshaw Stadium design tu te tho kha an ni.

(Picture khu a lian a en turin click theih ani)

Facilities

• Mipui thutna chhawng hnih, block 80 a then a ni.
• Standard seats 64 119
• Business seats 3 546
• Rualbanlo tan seat 150
• Sky-box 39 , VIP seats 738 leng
• Press mite tan thutna 1 497
• Conference halls 8, fast food dawr 42 leh restaurant lian tham tak a awm bawk.
• A khelmual hi natural grass ani a, kum 2 chhung vel laia rawn to ani a. Grass roll 800 lai chu khelmual a phah atan hian phurh thlen niin, hei hi 640 ton laia rit ani a. A phah nan pawh ni 8 lai a ngai reng a ni.
• He sports complex avaia zau zawng chu 145 741 sq.m (36 Acres) lai a ni.
• Khelmual hual hian 8 lane athletic track dah ani a, long jump, pole vaulting etc tihna te a awm bawk.

 

Roof

48 000 sq.m a zau a chung khuhna hi €16 million lai senga sak ani a. A rih zawng pawh 765 tons lai a ni. Thir ban 80, 45m a sang theuh in stadium hi hualchhuak in cable, beam leh suspended struts 640 hmangin a chung khuhna puan hi pawh mar a ni. A chung hian 13 ton/sq.m laia rit load pawh a dawl zo ani. Mihring pawh a kal ngam var var anih chu. 260 °С laia sa kangmei lakah pawh a him bawk.

 Awle tunah chuan he stadium chungchang tam tak kan lo hre ta bawk a, final match hmuhnawm tak anih beiseiin inkhel kan en theuh dawn nia.