Inrinni zanah champion tura rinkai ber pakhat Germany an chak a, an chak dan erawhin beisei a pha chiah lo. Group of Death an tih mai, Group B ah Denmark in Netherlands an hneh avangin he group hi a chiang lo sawt a, Germany laka Portugal khelh dan en khan Netherlands tân khelh an chakawm zawk zawk lo viau ang.

Germany leh Netherlands hi matchday 2 ah an inkhel dawn a. Anni pahnih innuai tur hi group stage inkhelah chuan a nghahhlelhawm ber a ni awm e.  A bik takin Netherlands tan chak ngei ngei a ngai tawh dawn a, Robben leh a ṭhianten Germany bang sut hawn tuma an nawr lai leh, German rilru lian hoin an nawrlet lai hmuh a va chakawm tawh em.

Denmark hi an dinhmun a ṭha tawh khawp mai. Germany leh Portugal an la hmachhawn dawn a, game awlsam ni dawn lo mahse an draw ve ve pawhin an tlang thei tawh dawn a ni. Portugal hian striker ṭha an mamawhzia a lang leh a. Netherlands leh Denmark zinga pakhat zawk zawk tal an hneh a nih loh chuan quarter final luhna chance an nei tawh lo.

Point hmu tawh pahnih, Germany leh Denmark hi an dinhmun a tha a tih loh theih loh a. An khelhthat nia inhneh kual thei vek an nih avangin tumah hi han dahhniam chi an la ni rih lo. Vawihnih an inkhelh kual hunah thil a chiang kuarh thei a, a chiang lo zual sauh thei bawk. Nghah a ngai a, nghah chhung hi a va rei ṭhin si em.

Group C: Spain vs Italy

Anni hi an khel kan la hmu lo a. Quarter final lut tura rinkai pahnih Spain leh Italy an intum nghal dawn avangin anni pahnih intum a a chak zawk zawk hi group winner tur an nih mai hmel. Ireland leh Croatia hi team chhia an ni lo a, mahse Spain leh Italy chunga awm tur em chuan rin an har.

Thu nawi..
# He ram pahnih te hi vawi 29 lo in tum tawh in, Spain hi vawi 8 an chak a, vawi 11 an in draw a, Italy hi vawi 10 an chak ve tawh thung. Mahse, heng vawi 8 zinga vawi 7 hi friendly match ah ani e.

# Spain hi tun hnaia an International match record hi a tha angreng khawp mai. An game khelh hnuhnung vawi 45 a vawi 41 tawp ah hian hnehna an chang ani. Heng zinga vawi 14 hi a zawna an chak ani nghe2.

# Anni pahnih hi an in tum tawp ber chu August 2011 khan a nia, Italy hi 2-1 in an chak.

#Tun qualifying round a Italy tana goal khung hnem ber chu Cassano ania, ani hian goal 6 a khung.

# Italy hian he competion bik a an last 9 games ah tum 2 chiah hnehna an chang.

# Spain hian Euro 2008 quater- final ah Italy tie breaker hmanga an lo hneh tawh thu kha chu kan la hre tlang vekin a rinawm.

# Italy hi an defence lam chu an khawng that hmel khawp mai. Qualifying round a an match vawi 9 khelh ah goal 2 chiah an chhuah zuk nia!. An keeper Buffon hi tun qualifying round a shots on goal save hnem ber record chelh lai mek ani bawk.

Statistics han en hian, goal nawr tur zawka ngaih chu Spain an ni awm e. Spain hi tunhnaiah tournament lianah hneh thei an awm meuh lo a, an khelhpuiten defensive game an rawn thawhchhuahpui tlangpui avangin goal pawh an thun tam lutuk lo a tih theih ang. Italy defence that zia kan hria a, an chakna lai hi hmang tangkaiin, Spain hmatawngte danbeh a, goal chhuah loh an ngaihpawimawh ber a rinawm bawk. Chuvangin zanina inkhel turah hian goal tamtak a luh beisei lo phawt ila a fuh awm e. Beisei loh anga thil a kal ta a nih leh a tha hlei hlei.

Probable Line Up: 

SPAIN: Casillas; Arbeloa, Ramos, Pique, Alba; Xabi Alonso, Busquets , Xavi; Silva, Iniesta, Torres.

ITALY: Buffon; Bonucci, De Rossi, Chiellini, Maggio; T. Motta, Pirlo, Marchisio, B’retti; Balotelli, Cassano.

Spain vs Italy
Time: 9.15 (IST)
Live: NeoPrime
Venue: PGE Arena, Gdansk

(Spain vs Italy statistics hi facebooka Huapzo Inpuihtawnna a post a ni a. A post tu Joseph Lr Chhangte chuan ui hauh lovin zofooty.com a chhuahchhawn min phalsak a, a chungah kan lawm hle a ni.)