EURO U19 BEST PLAYER LO NI TAWH AN INHNAWN KUAL !

Estimated read time 2 min read

Kum 2016 a U19 EURO best player leh top scorer ni kawp thei Jean-Kevin Augustin chu tunah hian a club nghet RB Leipzig leh loana a khelhna Leeds United ten ‘nang nei rawh’ tiin an inhnawn mêk!

EURO U19 a a chêt ṭhat avanga RB Leipzig in tifuh inti taka PSG aṭanga an lakluh Augustin hi Leipzig a zawm tirh season 2017/18 kha chuan a che ṭha pangngai hle a. Mahse hemi season hnu lamah erawh a thiam a theihnghilh ta emaw tih turin a khel chhe zui ta a ni.

Tun season (2019/20) ṭan dawn khân AS Monaco ah loan in a kal a, mahse beisei a phâk loh avangin Monaco hian a loan chu kumin thlasik transfer bazar inhawn lai khân an titawp a. Premier League kai tum Leeds United chuan remchangah la in French hmatawng hi loan in an lalut ve leh nghâl a ni.

Leeds United in loana an lakluh dawn hian Leipzig nen inremna an nei a, chu an inremnaah chuan Leeds chu Premier League a an kaisang a nih chuan Jean-Kevin Augustin hi a ngheta lakluh theih turin inbiakna an nei dawn a ni.

The Whites hian an han lalut ta chêng a, striker kum 23 mi hi an chhawr ṭangkai leh ta mang si lova. League ah game 3 chiah a inlan a, Leeds in Premier League an kaina kawngah a thawhhlawk lem lo bawk nen club pahnihten inremna an lo nei tawh anga €21m lai a season tluana game 3 chauh khel han lei chu Marcelo Bielsa team tân chuan thil âwm ang pawh a ni chiah lo a ni.

Hemi avang hian Leipzig lam chuan Leeds hnenah ‘la nghet rawh u’ an ti a, Leipzig sporting director Markus Krosche chuan Leeds United hian an inremna chu zahin Augustin chu a ngheta lalut turin hma la se a duh thu a sawi a. Chutihmek lai chuan Leeds United lam hian an ṭangkaipui êm êm si loh player a €21m lai mai hman chu an tum bikin a lang si lo va, Leipzig lama thawn lêt dân an ngaihtuah ve mêk bawk a.

‘Ṭhiana nang nei rawh’ tiin hmanni lawka rawlthar duhawm berte zinga mi kha a neitu club leh loana a khelhna clubten duh lo ve ve in an inhnawn kual ta a nih hi! Engtiang takin Augustin-a hmalam hun hi awm zel ang maw..

C Tlanthianghlima

Football tui ve tak

You May Also Like

More From Author