Hmanni lawka UEFA Champions League aṭanga tla thla, Premier League-a rorel mektu pahnih Manchester United leh Manchester City te chu Europa League aṭangin an tla leh ta a, tun season-ah Europe-ah beisei tur an nei ta lo.

Ningani zana Europa League round of 16 khelhah Athletic Bilbao chuan Fernando Llorente leh Oscar de Marcos te goal hmangin Manchester United 2-1 in an hneh a, aggregate ah 5-3 a chakin quarter final an lut. He inkhela Man United goal awmchhun hi Wayne Rooney thun a ni.

Hetihlai hian Manchester-a Etihad Stadium ah Manchester City chuan 3-2 in Sporting Lisbon an hneh a, mahse first leg-ah 0-1 a an chak loh avangin away goal rule hmanga hnawhchhuah an ni. Manchester City tân Balotelli leh Aguero (goal 2) ten an thun a, Matias Fernandez leh Ricky van Wolfswinkel ten Sporting Lisbon tân an thun bawk.

Athletic tâwnah United an bibo

Old Trafford-ah goal 3 chhuahin 2-3 in an chak lo tawh a, khami ṭum kha Athletic Bilbao khelh ṭhat leh Man United khelh chhiat a innangfuh mai mai niin mi tamtakin an ngai a, beiseina sâng tak nen Man United players ten Spain an pan. Mahse Athletic Bilbao kha Old Trafford ah ‘vanneih’ vanga chak mai an ni lo tih a chiang ta a, Premier League hmahruaitute hi Estadio San Mamés stadium-ah an dim lo ngei mai.

Inkhel ṭantirh lamah goal thun mamawh Man United in an nawr a, a tirlamah chuan goal chance pawh an nei mai a, mahse an hlauhawm rei lo. Athletic Bilbao player te an che rang em em a, an tlan peih bawk a, Man United player ten hunawl an nei hman meuh lo a ni ber. Minute 22 ah Spanish striker Fernando Llorente chuan goal ‘special’ zet mai a thun a, first half-ah goal dang a luhbelh lo. First half-ah hian Llorente chu inhliam vangin thlak a ni.

Second half-ah United in goal 3 an thun ngei ngei a ngai a, an goal nawr a na lo ngei mai. Athletic Bilbao zawk hian goal chance an nei deuh mawlh mawlh a, ball thiam Munian leh de Marcos ten United tlarhnung an chhaih buai reng a, Bilbao midfielder ten United midfield-a Cleverley leh Carrick inkawp an dah nil chiang kher mai. Minute 65 ah khel ṭha em em Oscar de Marcos chuan Bilbao goal hnihna thunin, aggregate ah 5-2 a ni tawh a, quarter final lut tur a chiang deuhthaw tawh. Huntawp dawnah Rooney chuan mawi zetin pet goal ve mahse mualphona lak ata United a chhanhim zo ta lo a ni.

Manchester United in Athletic Bilbao game rang lutuk an ngam lova, a zawnin vawihnih an hneh lo mai ni lovin, Bilbao hian an sawp hrep lo chauh ve ve a ni. Europe-a club liante nena inel tur chuan tuna Man United players te hi an la ṭha tawk rih lo tih a tichiang viau awm e.

Team Line-ups

Athletic Bilbao:  Iraizoz, Aurtenetxe, Amorebieta, Martinez, Iraola, De Marcos, Iturraspe, Ander Herrera (Inigo Perez 82′), Muniain (Domínguez 88′), Susaeta, Llorente (Toquero 40′)

Manchester United: De Gea, Rafael, Ferdinand (Smalling 63′), Evans, Evra, Park, Carrick (Paul Pogba 63′), Cleverley, Giggs (Welbeck 68′), Young, Rooney

Statistics

Etihad Stadium-ah Lisbon an vannei

Portugal-a Sporting Lisbon leh Manchester City ten round of 16 first leg an khelh khan an inhnehtawk viau a, away team Man City kha an khel chho lova, 0-1 chauha an chak loh avangin quarter final luh beiseina an nei sâng hle a, inrintawkna nasa tak nen Eithad Stadium-ah Sporting Lisbon hi an lo mikhual kan ti thei awm e.

Inkhel an ṭan a, goal phur sa-a khel Man City in an nawr nghal a, Adam Johnson leh Kun Aguero te hmangin half chance pawh an nei nghal. Sporting Lisbon in fimkhur takin bul an ṭan a, counter attack ah chance an insiam ve leh zeuh ṭhin. Man City pawh an khel ṭha bik lova, game muang tak kan hmu. A tirlamah inkhel a hmuhnawm lem lo.

Minute 33 a ni a, Man City fans te beiseina tichau hnawk turin Lisbon player Matías Fernández chuan freekick mawi em em mai a thun a, minute 40 ah dinglam aṭanga cross lo kal chu Ricky van Wolfswinkel chuan hnai set sawtah a lo pet goal bawk. First half a tâwp a, quarter final lût turin Man City in goal 4 an thun a ngai tawh. Away goal an nei lo kha an ui khawp ang le.

The Citizens Fightback

Second half ah chuan Man City pet goal tur Sporting Lisbon in an lo vêng a ni deuh ber. Minute 60′ ah dinglam aṭanga Yaya Toure ball pek ṭha tak chu a aia ṭhain Aguero chuan a lo thun a, hemi hnu phei hi chuan City lamin ball an chang deuh tawp a ni ber. Lisbon hi tlarhnungah an inremphui em avangin goal chance ṭha erawh an ngah bik lo.

Minute 75 ah Aguero penaly hlawhchhuah chu Balotelli chuan ‘confi’ zetin a pet goal a. Minute 82 ah Aguero bawkin City goal 3 na thun lehin, City players leh fans te an phur tawh takzet a. A tawp thlengin ‘home’ fans te nen ṭangrualin nawr mahse goal dang erawh an thunbelh thei ta bik lo. Europe-a Manchester City zinkawng chu tihtawp rih a ni ta. Minute 95 naa Joe Hart head goal teuh lutuk kha City fans te tan a va uihawm dawn tak em.

Team Line-ups:

Manchester City:  Hart; Richards, K. Toure, Savic, Kolarov; Y. Toure, Pizarro (Dzeko 55′); Johnson (Nigel de Jong 46′), Silva (Nasri 66′), Balotelli

Sporting Lisbon: Patricio; Xandao, Polga, Carrico, Insua; Schaars, Fernandez (Renato Neto 64′); Pereirinha, Izmailov, Diego Capel (Jeffren Suarez 64′); van Wolfswinkel (Carillo Diaz 68′)

Statistics:

Inkhel dang result

Hannover 96 4 – 0 Standard Liege (aggregate 6 – 2)
Hannover 96: Abdellaoue 4′, dos Santos (OG) 21′,73′, Sergio Pinto 73′

PSV Eindhoven 1 – 1 Valencia (agg 3 – 5)
PSV: Ola Toivonen 64′
Valencia: Adil Rami 47′

Udinese 2 – 1 AZ (agg 2 – 3)
Udinese: di Natale 3′, 15′
AZ: Erik Falkenburg 31′

Olympiakos 1 – 2 Metallist Kharkiv (Kharkiv hi away goal rule in tlang)
Olympiakos: Marcano 14′
Kharkiv: Millakva 81′, Marco Devik 86′

Schalke 4 – 1 FC Tweente (agg 4 -2)
Schalke: Klass Jan Huntelaar 29′, 57′, 81′, Jermaine Jones 71′
Tweente: Janssen 14′

Besiktas 0 – 3 Atletico Madrid (agg 1 – 6)
Atletico Madrid: Adrian 26′, Falcao 83′, Salvio 94′