Real Madrid forward Cristiano Ronaldo hi 2010/11 season chhunga Europe-a league goal thun hnem ber a ni tih chu kan hre ṭheuh tawh awm e. La Liga BBVA ah goal 40 ngawt a thun avangin Zirtawpni khan European Golden Shoe award hlan a ni. He award hi Europe-a top division league hrang hranga pet goal hnem ber hnenah hlan ṭhin a ni.

Ronaldo hi Portuguese footballer ropui Eusebio leh Real Madrid  honorary president Alfredo Di Stefano ten lawmman hi an hlan a ni.

Ronaldo chuan mimal chawimawina a dawn chu lawmawm a tih thu a sawi rualin team a dahpawimawh zawk thu a sawi tel a. Golden Shoe Award chu Champions League emaw, La Liga nen inthleng theih se thleng a duh reng thu a sawi.

Ronaldo thukhawchang

Real Madrid thiampuipa chuan, “Teammate te tel lovin mimal chawimawina a dawn theih loh a, field chhunga ka khelhpuite puihna vang chauha he lawmman hi dawng thei ka ni. Tunah chuan a huho a lawmman dawn hi ka châk a, record thar siam ringawt ni lovin, Real Madrid hi eng lawmman (trophy) nge ka lâkpui theih ang tih hi ka ngaihtuah ber a ni.” a ti.

Messi nen an inel chungchang pawh sawichhuakin, Messi mai ni lo, Europe-a player ṭha ber ber te nen inel an nih thu leh, mimal ni lova team anga inel a duh thu a sawi a ni. “Inkhelh hi nuam ka ti a, mipuiin ka inkhel en hi nuam an ti bawk a, ka khelhdan thlak ka tum lo. Tunah hian kum 26 ka ni a, ka la inzirbelh zel dawn a, kum engemawzat ka la khel dawn a ni.” tiin a sawi.

Ronaldo hian kum 2008 ah Manchester United tân Premier League goal 31 a lo thun tawh a, European Golden Shoe Award hi a lo dawng tawh a ni. League hrang 2 aṭanga he lawmman dawng kawp thei hmasa ber a ni nghe nghe.

European Golden Shoe 

He chawimawina hi 1967/68 season tâwp aṭanga pekchhuah ṭan a ni a, vawi 2 dawng thei hi player 9 an awm tawh. Heng player 9 zingah hian Ronaldo leh Diego Forlan te an la khêl nghe nghe a ni.

A kum zâwna vawi 2 dawng thei hi mi pahnih chiah an la awm a. 1991-92 leh 1992-93 ah Rangers striker Ally McCoist chuan a lo dawng tawh a, Arsenal legend Thierry Henry pawhin 2003-04 leh 2004-05 ah a zâwnin a dawng tawh bawk. Ronaldo (Manchester United leh Real Madrid), Diego Forlan (Villareal leh Atletico Madrid) leh Mario Jardel (Porto leh Sporting CP) te hi club pahnih aṭanga he award dawng thei awmchhun an ni.

Season tâwpah Ronaldo hian record dang siambelhin a vawithumna atan European Golden Shoe Award hi a dawng leh thei angem tih hriat a chakawm tawh ngei mai.

source: sportal.co.in