Tunkar chu English Premier League ngainatute tan ‘ treat’  a ni ber a, derby lian tham pahnih en tur kan nei. A hmasa zawk, ‘Merseyside derby’ ah Everton leh Liverpool an innuai a, Andy Caroll leh Luis Suarez te goal hmangin Liverpool 2-0 in an chak.

Tutenge khel

Everton: Howard; Hibbert (Vellios 78), Jagielka, Distin, Baines; Coleman (Drenthe 61′), Fellaini, Rodwell, Osman (Neville 69′); Cahill; Saha

Liverpool: Reina; Kelly, Carragher, Skrtel, Enrique; Kuyt, Lucas (Henderson 87′), Adam (Gerrard 67′ ), Downing (bellamy 67′ ); Suarez, Carroll.

First half: Goal tih loh a kim vek

Everton leh Liverpool inkhel kan hmuh thin ang thoin a tir lamah inkhel ‘hot’ tak kan hmu. Team pahnih an innawr tawn zak zak a, goal chance hlauhawm lutuk awm lem lo mahse Suarez, Cahill, Distin leh Adam ten chance an nei nghal mawlh mawlh mai.

Minute 23 a ni a, Everton midfielder Jack Rodwell chuan red card a hmu a, replay en chuan Rodwell a vanduai hle tih kan hmu thei ang. Player ngah zawk Liverpool in ball an chang tam tawlh tawlh a, Dirk Kuyt chuan minute 41’ ah penalty a pet goal si lova, first half-ah goal a lut lo.

Suarez leh Caroll

Second half tantirh phat atangin Liverpool an khel tha zawk. Adam te hoin a laiah ball an chang tam a, tlarhnungah Everton long ball Carragher ten an lo head khalh zel bawk a, mual neitu an pawr hleithei meuh lo.

Minute 71 ah veilam atanga Luis Enrique cross chu Andy Caroll chuan hnai set sawt atangin a pet goal a, he goal hi Merseyside derby-a Caroll pet goal hmasak ber a ni. Everton in Hibbert aiah striker Vellios an luhtir a, an siphurh sut tumin an nawr dawn chiah tihah, minute 81 ah Distin tihsual vangin Suarez chuan Everton goal bulah ball a chang a, a pet goal dan a ‘cool’ kher mai.

Huntawp thlengin goal dang a luhbelh lova, Goodison Park-a an intum hnuhnung 12 ah Liverpool vawi 9 an chak ta.

Inkhel leh a behbawm

Everton leh Liverpool an intuma kan hmuh ngun tak chu red card hi a ni. Tunhnaia an intum hnuhnung 15 ah red card 11 tehmeuh mai awm tawhin Rodwell kha 12 na chiah a ni. Referee Martin Atkinson hi tuna Premier League referee zingah chuan card ‘ ui lo ber’ a lo ni maithei a, tun season ah red card 4 a phawrh tawh!!!

Liverpool tlarhmaah Suarez-Caroll combination a fuhchho dawn niin a lang a, midfield-a player tharte pawh an inbengbel tawh e. Downing kha khel tha lo mahse EPL winger zinga ball cross thiam ber a ni hial angem? Gerrard a dam tawh a, tlarhmaah Suarez an nei a, a sirah Bellamy leh Downing an la awm cheu. Tunkum hi Liverpool ‘comeback’ kum a ni thei angem?

Everton player-te an thawkrim a, a bik takin centre back Jagielka leh Distin te khel tha tak an ni. Inkhelh zawhah sawisel tur neuh neuh an nei nual ngei ang.