Pathianni zana Etihad Stadium-a FA Cup 3rd round khelh zawh takah Manchester City chuan an mikhual Manchester United chu 2-3 in an hneh lo a, FA Cup 2011 champion Manchester City hi FA Cup 2012 ah an champion dawn lo tih a chiang ta. He inkhelah hian mikhual lam tân Wayne Rooney (2) leh Danny Welbeck ten goal an thun a, Aleksander Kolarov leh Sergio Aguero ten Man City tan an pet goal bawk.

Inkhelh hma boruak

Barclays Premier League table hi team ṭha teh nan kan hmang dawn a nih chuan, Manchester khaw club pahnihte hi tun dinhmuna English club ṭha ber pahnih an ni ang. Inkhelh hmain manager pahnihten chak an mamawh thu an sawi ve ve a, Man United manager Sir Alex Ferguson chuan an mikhual ‘bengchheng’ te chu an kalbo mai loh tur thu leh, Manchester City chu club ‘ṭha’ an ni tak tak tawh a, an inel reng tawh dawn a ni tih a pawm thu a sawi a. Manchester City manager Roberto Mancini chuan United chu team ṭha tak an nih thu leh, an dinhmun ang pha tur chuan an la beih fe a ngaih thu a sawi thung. Club pahnih players te an invautawn zauh zauh bawk.

Internet khawvelah pawh Manchester club pahnihte inkhel tur hian titi a ti tam a, FA Cup 3rd round ‘lek’ mah ni se club pahnih fans te an ṭang hle tih a hriat. Mizoten kan hman lar em em Facebook-a football group hrang hrangah pawh he inkhel hian ngaihven a hlawh a, ‘Mizo Manchester United fans’ group member te phei chuan projector leh big screen te hawhin, a huhoin inkhel hi an en hial a ni.

Image from fifa.com

Inkhel pawimawh

Manchester derby hi chu pawimawh lo tak tak hi a awm meuh lo a, mahse tunhnaiah Man City hi an rawn ṭhat tak em avangin he inkhel hi derby rau rauah pawh a pawimawh lehzual a tih theih awm e. Club hlun leh ropui zawk nia inngai Manchester United hian tunhnaiah an mikhualte hi an hneh hleithei lo a, Manchester City fans ten hei hi hriain Manchester club ‘tak tak’ an nih thu an lo tlauangpui mek bawk. Club ropui leh ṭha zawk nih inchuh mek an ni a, Man United tân an la ropui zawk a ni tih tihlan theihna remchang a ni a, Man City tân an ṭhenawmte hi an lehpêl tawh a ni tih lantirna remchang a ni bawk.

Manchester United hi an game hnuhnung pahnihah Blackburn Rovers leh Newcastle United te hneh lo chiah an ni a, Manchester City hi Liverpool 3 – 0 a sawp thei an ni thung. Derby ah chuan ‘form’ in awmzia a nei lo an ti ṭhin a, form inang lo tak chungin team pahnihten khelmual an lût.

Tutenge inkhel?

Manchester City lamin inhliam vangin Balotelli an chhawr thei lo a, Yaya Toure leh Kolo Toure te unau pawh African Cup of Nations an khelh dawn avangin an khel thei lo. Keeper Joe Hart aiah loan a an lakluh Pantilimon chu a lût teh tlat bawk. Manchester United bench ah retirement aṭanga rawn lêt leh Paul Scholes a ṭhu vang a, Chris Smalling chu defence lâiah rawn letin, Phil Jones chu dinglam sirah sawn phei a ni.

City: Patilimon, Richards, Kompany, Lescott, Clichy, Milner, De Jong, Johnson (Zabaleta 45′), Silva (Savic 45′), Nasri, Aguero.

United: Lindegaard, Evra, Jones, Ferdinand, Smalling, Valencia, Carrick, Nani (Scholes 59′), Giggs, Welbeck (Anderson 75′), Rooney.

First half-ah red card leh United goal 3

Inkhel ṭan phat aṭangin mual neitu lam hian an nawr phei nghal a, Aguero chuan a thun teuh nghal hle. Mahse minute 10 na-ah dinglam sir aṭanga Valencia cross chu Wayne Rooney chuan a lo head goal a, a khelha bet zawk United in hma an hruai der.

Hemi hnu, minute 12 ah City defender Vincent Kompany chuan Nani ball lo laksak a tumna lamah a ke pahnihin a lo tlawh a, ball tlawhfuh mahse referee Chris Foy chuan red card a pe. Han en mai chuan direct red card pekna awm loh tak niin a lang awm e. Football-ah chuan ke pahniha tlawh (two-footed lunge) hi direct red card tur a ni a, mahse Kompany challenge hi leihrul deuhthaw-ah a nih bakah ball a tlawhfuh a, yellow card pe se a awm zawkin a rinawm. Ṭanlam azirin ngaihdan a dang thei viau awm e.

Mual neitu lam hi tlem zawk mahse an khel ṭha chhunzawm viau a, a bikin tlarhmaa David Silva leh Sergio Aguero te che vel a hmuhnawm. Mahse minute 30 ah Man United bawkin an thun leh a, Evra cross, Welbeck lo lak per chu Nasri chuan a lo tawkpeng ve lehchhawng a, hemi ball kâng hi Welbeck chuan kil zetah a hlap goal. Player ngah zawk United in inkhel an thunun chhunzawm a, minute 40 ah Welbeck chuan penalty hlawhchhuakin, penalty pet tur hian Rooney a rawn dingchhuak a. City keeper in penalty hi save mahse a per let leh chu Rooney bawk hian head goal in, first half a zawh meuh chuan mikhual lam hian si thum faiin hma an hruai der mai.

Second half-ah a tlem zawkin an pet goal thei zawk

3-0 in hma an hruai tawh a, player pakhatin an tam zawk bawk a, first half a zawh chiah khan United fans tamtak chuan goal an thunbelh an inring ngei ang a, Old Trafford-a 1-6 a an chakloh phuba lain, Etihad stadium-ah City an sawp dawn emaw an ti hman ngei ang. Mahse Premier League hmahruaitute hi an tlem vanga zuam ngawt chi an ni si lo. Mancini chuan Silva leh Johnson lachhuakin Savic leh Zabaleta a rawn luhtir a, 3-4-2 formation hmangin an mikhualte hi a nawr.

Image from dailymail.co.uk

Minute 48 ah Kolarov chuan freekick mawi tak thunin Man City tân beiseina a siamsak a, mahse hemi hnu hian mikhual lamin an thun teuh thei hle thung. Minute 62 ah Richards chuan Valencia chu penalty box chhungah a tithlu a, penalty tur ni mahse referee in a pe lo. Hemi hnu lawk, minute 64 ah lut thar Scholes ball pass sual chu Milner chuan lo changin, dinglam sir aṭangin a cross a, Aguero shot chu United keeper in a dangbet zo lo a, a save per hi Aguero bawkin a thun zui. Etihad Stadium-ah Man City fans te thawm a ṭha hem hem ngei mai.

City hian fans te authawm nen han nawr deuh ṭhin mahse midfield-ah United an inhnawh tawh avangin goal hlauhawm an nei thei mai bik lo. Hun tawp dawnah vawihnih vel chu an siphurh an sut zo teuh hle a, mahse huntawp thlengin goal an thunbelh thei ta lo a ni. Penalty box chhunga Phil Jones handball chu referee in a hmu lo hlauh bawk.

Inkhelh zawha manager pahnih kamchhuak

Sir Alex Ferguson a lawm lo a, second half-a goal 2 an chhuah chu an inthlahdah vang a nih thu a sawi. “Second half-ah khan kan fimkhur lo em em a ni. Half time-ah 3-0 a hma an (players te) hruai avangin chak sa-ah an inngai a, an inthlahdah a, awlsam taka chak thei tur kan nih laiin keimahni tan harsatna kan insiam a ni. Manchester City kha an nihna tak aia ṭhain kan lantir a ni.” a ti.

Roberto Mancini chuan a naute a fak ve thung a. “Kan khel ṭha a, a bik takin second half-a kan khelh dan khan min tilawm hle a ni. Goal hnih kan thun a, goal dang thunbelh theihna chance kan nei nual bawk. Second half-ah phei kha chuan United tân goal thun theihna remchang kan siamsak lo reng reng a ni.” tiin a sawi.

Tunhnaiah Manchester City an rawn pâwng thur thur a, Pathianni zana an inhnehtawk dan han en khan anni pahnih hi an la inel chho zel dawn niin a lang. Season tâwpah tu tak trophy chawi hnem zawk ang maw?