Liverpool chu tun season-a FA Cup fourth round lut hmasa ber an ni ta. Zirtawpni zanah captain Steven Gerrard telna Liverpool team hian Anfield-ah an mikhual Oldham Athletic chu 5-1 in an sawp a, mual neitu tân Craig Bellamy, Steven Gerrard, Jonjo Shelvey, Andy Caroll leh Stewart Downing ten goal an thun.

Team Line ups:

Liverpool: Reina; Kelly, Carragher, Coates, Aurelio ( Flanagan 71′); Spearing, Maxi, Gerrard, Shelvey; Kuyt (Andy Carroll 88′), Bellamy (Downing 74′)

Oldham Athletic: Cisak; Mvoto, Wesolowski (Filipe Morais 74′), Diamond, Lee; Simpson (Smith 74′), Adeyemi, Taylor, Furman; Scapuzzi (Joshua Parker 54′); Kuqi

A tirah mikhual an huangtau

League One club Oldham Athletic hi a tir lamah an khelṭha a, minute 8 lekah Oldham striker Shefki Kuqi chuan Liverpool defender te tlanpelin Pepe Reina chiah a hmachhawn tawh a, a pet over chiang hle. Liverpool hmatawngten bul an ṭan chhe lo a, a bik takin Welsh winger Bellamy a hmuhnawm. Tlarhnung lamah erawh khelho ngai lo Carragher, Kelly leh Coates te an buai leh zeuh ṭhin.

Team pahnihte an inhnehtawk viau laiin Oldham Athletic hian an pet goal ta mai a. Minute 28 a Robbie Simpson long shot chu Pepe Reina tân dan ngaihna a awm lo. He goal a luh chiah hian Anfield meuh pawh a reh duk thei nia.

Liverpool tân Bellamy leh Gerrard

Liverpool hian si an phur rei lo a, minute 30 ah Bellamy chuan Shelvey shot (cross?) a lo dang pial a, an siphurh a sut nghal. Hemi hnu hian team pahnih tan Dirk Kuyt leh Taylor ten goal chance ṭha tak tak an nei zui bawk. First half tawplamah Liverpool an khel ṭha zawk a, minute 45 ah Maxi Rodriguez penalty hlawh chu Gerrard chuan thunin, hei hi October thla hnulama Gerrard-a goal thun hmasa ber a ni nghe nghe.

Second half-ah Anfield a bengchheng mah mah

Second half ṭan a ni a, Liverpool tân Bellamy bawk a langsar a, a sir aṭangin vawi duai lo ball hlauhawm tak tak a siamchhuak a ni. Luis Suarez hrem a nih dawn avangin Bellamy ‘form’ hi Liverpool tân a pawimawh chho viau ang le. First half ang thoin Liverpool tlarhnung a nghet tawk lova, Oldham hmatawngte finishing ṭha deuh se chu goal an thunbelh ngei ang. Minute 68 ah Jonjo Shelvey chuan Liverpool goal thumna a thun a, hei hi Bellamy assist a ni nghe nghe. He goal luh hma deuh hian Oldham hi an khel ṭha hle a, he goal hi mual neitu lam tân goal pawimawh tak a ni.

Liverpool in ball an chang tam tawlh tawlh a, Anfield a bengchheng tawlh tawlh. Minute 80 ah fans ṭhenkhat bengchheng zualin Oldham player Adeyemi chu an lo au nawmnah deuh a, a thinrim kher mai. A teammate te mai bakah Liverpool player Kuyt leh Gerrard ten an hnem hnuah inkhel hi chhunzawm leh chauh a ni. Heti taka a thinrim chhan hi vunrawng vanga inhmuhsitna lam a nih ngei hmel a, fans ṭhenkhat mawl vangin Liverpool in ‘racism’ thubuai an awrh leh ang tih a hlauhawm khawp mai.

A tawpah Liverpool substitute pahnih

Inkhel tawp dawnah Liverpool hian goal hnih an thun belh a, minute 89 ah lut thar Andy Caroll chuan penalty box pawn aṭangin a pet goal. Hei hi tun season-a Anfield-a Caroll goal thun hmasak ber a ni. Liverpool goal nga na hi injury time-a substitute Stewart Downing thun a ni.

Dalglish a chapo lo

Inkhelh zawhah Liverpool manager Kenny Dalglish a inphahhniam thiam hle a, an chak chu a lawm hle tih sawiin, Oldham player te a fak bawk. “5-1 ngawta kan chak hi a lawmawm a, mahse he scoreline hian field chhunga kan inthlauhna dik tak a tarlang lem lo. Oldham Athletic player te an khel ṭha a, an manager an chawimawi tak meuh meuh a ni. A tirah kha chuan kan buai lek lek a ni a, mahse kan siphurh kan sût leh vat a, hma kan hruai hnu kha chuan kan khel ṭha hlein ka hria.” tiin, 5-1 a an sawpte hi a fak thiam hle.

Liverpool fans ten Adeyemi an auh nawmnah chungchang hi Police leh Liverpool club ṭangkawp chuan an chhuizui mek a, tun thlengin man an la nei lo thung a ni.