Bolton Wanderers midfielder kum 24 mi Fabrice Muamba chuan doctor te thurawn zawmin football a chawlhsan thu a puang ta. Muamba chawlh chhan chu kan hriat tlan vek a rinawm a, March ni 17th 2012 khan FA Cup match Tottenham Hotspurs nen a an  khelh laklawh lai takin a tlu tawp mai a,  inkhel pawh tihtawp nghal niin  amah rawn zawnchhuaktu medical team te chuan an zawn chhuah lai pawhin a thaw lo a, a lung pawh minute 78 chhung chu a phut loh thu an sawi a ni. A thi tawh mai dawn emaw an tih laiin a hnu thlahnih hnu velah chuan rawn tha chhuak lehin pangngai takin awm leh thei tawh mahse, hah tak tak a inkhelh leh kha Doctor te chuan a lung lam tan a that tawh loh thu an hrilh avang in naupang tak niin, a vanglai hun  a hmang tan dawn chauh emaw tih laiin football khawvel a mangtha a ngai ta a ni.

A va lainatawm tak em….

Kum 24 chauh a la ni a, a football khawvelah hian a vanglai a hmang tan dawn chauh emaw tih laiin hetiang a a awm ta mai hi a lainatawm takzet a, amah Fabrice Muamba chuan, “Ka la dam avangin Pathian hnenah lawmthu ka sawi duh a, keimaha beidawng mai lova, ka dam chhuah leh ngei theihna tura theihtawp chhuahtu medical team te chungah pawh lawmthu ka sawi a ni. Heart attack ka tawh hnua hospital ka chhuahsan hnu khan Bolton tana inkhelh leh ngei hi ka tum hle a, fit elh awlh a ka inkhelh leh ngei theih nan kar hmasa khan Belgium ah Cardiologist hmu turin ka kal a, mahse a thu min hrilh chu ka lo beisei thin nen chuan a lo inang lo khawp mai. Ka hmangaih em em football chu ka thlah a lo ngaih phah ta ani,” a ti a, a khawngaihthlak hle.

Hemi chungchangah hian Bolton pawhin thuchhuah siam tawhin,” Hetiang hun kan player Fabrice a’n a tawng hi ka tawrhpui takzet a, kan club tan a a rawn khelh leh ngei chu duhsak viau mah ila a hriselna atan a that tawh loh avangin a theih tawh si lova, kan club tan a tha a lo thawh tawhna zawng zawng te kha kan theihnghilh leh tawh ngai lovang,” an ti a ni.