Fak hlawh lo Benzema

Nizan La Liga inkhelah Real Madrid chuan Valencia si thum faiin an hneh a, he inkhela goal hnih thuntu Karim Benzema chuan football khawvela mi ropui Farenc Puskas khumin Real Madrid tana goal thun tam ber 5-na a ni ta.

Lyon tana hming a chher chhoh dan te, France tana vawi 80 chuang inlan thei a nih dan te, khelmual pawn lam buaina a tawh vanga kum 2015 atanga ram tana a khelh leh tawh loh thu te chu lo dah tha ta ila, he French striker hi amah aia star lar leh huhang ngah zawkin Real Madrid – ah hian an luahlan fo.

Kum 32 a upa ni ve tawh Benzema hian kum 2009 khan Lyon chhuahsanin Real Madrid hi a pan a, kum 10 chhung hian striker ni ve siin La Liga – ah top scorer pawh a la ni lo ! Santiago Bernabeu – a manager hrang hrang hnuaiah tlaktlum loh chang tawng ve fo mahse chhel takin a tuar zel a, a beidawng ve mai ngai lo a, bench atanga a luh tlauh tlauh chang tam mahse Madrid player pawimawh a ni tlat.

Kum 2009/10 season atang khan inelna hrang hrangah Benzema hian Madrid tan game 503 khelin goal 243 a thun ta a, kum 10 chuang zet chu season khatah game 30 aia tam a la khel thei ziah. Hetia han sawi mai hian thil harsa angin a lang lo ani maithei a, mahse Real Madrid te ang club lian leh pressure tamna lutukah season khata game 50 chuang inlan hi season 4 ngawt a nei. Tun season bikah La Liga – ah hian game 28 khelin goal 16 a thun a, Europe lamah game 7 khelin goal 4 a thun bawk.

Heti khawpa Madrid tana player pawimawh ni si hi fak leh chawimawi a hlawh kan fo a, mi tam tak chuan ‘unsung hero’ a ni tiin Real Madrid – a ‘Ronaldo ti Ronaldo tu’ a ni ti te pawhin an sawi thin. A thiante’n goal an thun theih nan a position a thlak a tul fo a, mahse Benzema a nghing ngai lo !

Madrid fans ruhkawl te’n nasa takin sawiselin diriam thin mahse Benzema hian a tuang a la ti chhah zel a, goal hmaa mahni hma sial lo, thiante goal siamsak thin, lar khel ngai lo – fak hlawh lo val a ni !