Fak phu Khalid

Estimated read time 2 min read

Indian Super League table kan en chuan Northeast United hi pathumna ni mekin point 26 an hmu tawh a, an chungah club pahnih la awm mahse an dinhmun a tha thawkhat. He club enkawltu chu Khalid Jamil a ni a, Northeast United hi a zawnin game 6 chhung hneh loh nei loin an kaltluang tawh a, ISL chanchina Indian head coach hneh loh nei loa kaltluang rei ber a ni mek.

Northeast United hian kum 43 a upa Khalid hi season hmasa pawh khan an lo chhawr tawh a, tun season tan dawn khan an head coach Gerard Nus – a assistant turin ruat mahse nikum December thla khan Khalid aiah Alison Kharsyntiew an lalut leh a, Khalid a hawihil.

Nus – a hnuaiah game 11 – ah vawi hnih chauh an chak zawh tak avangin Nus hi ban a ni a, Khalid an kokir leh ta. Aizawl FC coach hlui hian bultan nan Jamshedpur FC chu 2-1 in an hneh a, hemi hnu hian an chunga awm ATK Mohun Bagan leh Mumbai City FC bakah Odisha FC te hnehin Hyderabad FC leh FC Goa nen an inhnehtawk thung. Head coach lailawk chauh ni mahse Khalid a hnathawh hi a ropui hle.

He club – ah hian Mizo pali – Lalengmawia (Apuia), Rochharzela, Lalkhawpuimawia leh Lalrempuia Fanai te an awm a, Khalid a hnuaiah Apuia’n hmun pawimawh a chang a, midang pawh a khat tawkin kan hmu fo. Khalid Jamil hian tunhnai khan Apuia hi India rama midfielder tha ber pawl a nih thu a sawi nghe nghe.

C Tlanthianghlima

Football tui ve tak

You May Also Like

More From Author