Mizo mai ni lo, khawvel pum huapa football ngainatute pawhina an nghahhlelh leh enchak te zing ami Barclays Premier League (BPL) chu nizan khan tan a ni leh ta reng mai. Kumin chu vanneih kum a ni ber mai, season hmasa Premier League khelh zawh anih atang khan khawhar lutukin kan awm hman lova, hun a lo kal chak bawk nen hriat loh karah 2012-2013 season chu tan a lo ni leh ta reng mai. A bikin Aizawl-a awmte phei chu vannei tak an ni. Euro 12 hmuhnawm tak en zawh anih hnuin MPL Playoff a awm leh a, Independence Day Celebration Invitation Football Tournament a awm chhunzawm lehnghal a. Khua a har hman meuh lo a ni.

Heti chung hian Premier League kan nghakhlel a, transfer boruak hot chho tan nen Premier League Fever-in min rawn man chho leh tan nghal a ni. Zofooty paw’n hei hi hre rengin fans te tihphur nan leh inpawh tlanna tha zawk kan neih theih nan tiin fans a huhova en te va telpuiin kawmna hun neih thain kan hria a. Chumi bawhzui chuan season tan zana inkhel, team liante fans kan tlawh a. Admin zingah Ahruaia, Zara leh kei kan thawkchhuak a. Liverpool fans leh Arsenal fans te kan tlawh a. Ahruaia hian Liverpool fans lam a ziak ang a, keiin Arsenal fans lam ka ziak thung dawn a ni.

Arsenal fans kan va tlawh
Arsenal fans kan va tlawh te hi thianho an ni a. Supporters Club anga en erawh an ni lo a ni. Supporters Club ang chuan nidangah en ho an tum thu an sawi bawk. Pu Andrew-a (h/o Feli Thangluah) te inah inkhel hi an en a. Eitur tui hnai tak nen inkhel an lo en a, club jersey hain en chak an lo tum hle a ni. Mahse an match hmasa berah hian an tumpui Sunderland an draw avangin duh angin an bengchheng tawk lova, goal a luh miah loh avangin au na tur an nei meuh lo erawh pawi kan tihpui hle.

Tin, Cazorla leh Giroud te’n mawi taka defender te an thiah hnua Giroud-a pet goal loh tum kha chuan an au ring khawp mai. “A GOALLL” tiin an au rual hman a, mahse a goal leh ta si lova, an ui khawp mai. An ui zia hahipin an sawi zui nasa hle. An players thar te khel pawh a hmuhnawm an ti a, an khel chhe lovin an hre bawk. Giroud-a thelh ho lutuk erawh an dem ngam chiah lo nain an ui tih an hmel atang a hriat a, Cazorla erawh khel tha an ti hle bawk.

Arsenal fan Em-a Ralte kawmna
Sawi tawh angin Supporters Club anga en an ni lova. Hei hi chu thian hova en chauh an ni a. Mahse heng ho zinga mi hi chu Supporters Club-a a khaipa te pawh an ni fur tho a ni. Nizan kha chu a khuh hawnna chauh a la ni a, zandangah Supporters Club anga en pawh an la tum hle a ni.

ZoFooty chuan zawhna kan zawt nual a. A video a awm tho avangin post-ah hi chuan a tlangpui chauh kan tarlang ang. Video-ah hian inkawmna kimchang zawk chu kan en mai dawn nia.

M-a hian match hmasa bera Sunderland an draw hi a lungawithlak lova mahse Sunderland hian draw game an khelh avang an draw ta niin a sawi a. Tin, an players thar Cazorla, Giroud leh Podolski te chu khelchhia a ti hran lova, an pathum bikah chuan Cazorla khel tha ber a ti bawk. Tun hnaia an tum leh tur bul tan tha lo, Liverpool an hneh theih a ring bawk. An formation chungchanga a mimal ngaihdan sawi chhunzawmin Podolski alaia a awm kha fuhin a hre chiah lova. Gervinho kha bench-ah thuttirin Giroud zawk a first a ring deuh a mahse rin loh ang takin Gervinho a sira a awm zawk chu mak a tih thu a sawi.

Zanina inkhel en hi chu thianho chauh an la ni a, zandangah Arsenal Supporters Club anga la en an tum thu a sawi a. Tin, Arsenal Mizoram Supporters Club(AMSC) te hi official an ni a, India ramah chuan Mumbai lama Arsenal Supporters Club te an len ber thu a sawi lang bawk a. Van Persie a chhuak fel a, Alex Song-a’n a zui leh dawn a. A chhuak tur hi chhuak fel se squad hi inthuahfai ila champion chiah kan hmabak tawh a ni tiin a tawp nan a sawi a ni.

Tlangkawmna
Arsenal fans te hian match hmasa Arsenal en chak an tum nain an tum angin thil a kal thei ta lova. Heti chung hian nidangah pawh a huhova enkhawm zel an la tum thu an sawi a ni. Tin, AMSC anga la en an tum avangin Arsenal fans te chuan in lo hre theuh dawn nia.

Nizan lama inkhel zingah Arsenal leh Liverpool fans te kan tlawh a. City, Chelsea leh United te hian an la khelh ve loh avangin kan kal ve thei ta lo a ni. An en ho dawn ani tih kan hriat phawt chuan ZoFooty te’n telpui kan inhuam reng a ni. Tin, fans dang la enho ve lo te pawh tihian kan zawt teh ang. Club dang tih ang hian in en ve thei dawn em? In club tan te au phur tur hian in in rawt phur ve thei dawn em?

(Liverpool fans tlawh chungchang hi Admin Ahruaia’n a rawn post veleh bawk ang)