Sept 20, 2012: I-League tih loha India rama football tournament ngaihhlut ber Federation Cup chu a nihnihna khelh a ni a, Group D inkhelah Pune FC chuan United Sikkim 1-0 in an hneh a, he inkhela goal awmchhun hi minute 51 na a Pune FC striker Jeje Lalpekhlua thun a ni. Group D ah tho hian champion lai Salgaocar chuan 1-0 in Prayag United an hneh bawk.

Group B inkhelah Mohammedan Sporting in Air India 1-0 in an hneh a, club lian pahnih Churchill Brothers leh Mohun Bagan te goal awm lo in an inhnehtawk bawk.

Federation Cup ah hian team 16 telin group pali ah ṭhen an ni a. Group pakhata awmho te hi vawikhat ṭheuh an inkhel kual ang a, a che ṭha ber ṭheuhin in semi final an lut dawn a ni. Final hi September ni 30 ah Siliguri ah khelh a ni ang.

Jeje a fit tawh e

ZoFooty chuan Pune FC chakpuitu Jeje Lalpekhlua biain inkhel chungchang kan zawt a, Bhaichung-a club United Sikkim chu a khelh ah an hneh hle tih sawiin, inkhel an thunun a, a mimal tak pawhin a khelh danah a lungawi tih a sawi. Champion lai Salgaocar leh sum hmang nasa Prayag United te nen group khatah awm mahse semi final lut turin beiseina an nei sâng hle tih a sawi a, heng team pahnihte ṭhat zia a sawi rualin huphurh loh phawt a pawimawh a ti.

Jeje-a hi inhliam vangin Nehru Cup ah a khel thei lo a, India team ah pawh tunhnaiah a hmel kan hmu mang lo. Tunah chuan a fit tawh hle tih a sawi a, amah ṭawngṭaipui ṭhintu Mizo mipuite chungah lawmthu a sawi a ni.

Inkhel result:

Group B
Air India 0 – 1 Mohammedan Sporting (Mohammed Mukhtar 54′)
Churchill Brothers 0 – 0 Mohun Bagan

Group D
Salgaocar FC (Anthony D’Souza 64′) 1 – 0 Prayag United
Pune FC (Jeje Lalpekhlua 51′) 1 – 0 United Sikkim F.C.