JRD Stadium, Jamshedpur-a Federation Cup khelh mekah vawiin tlai khan Aizawl FC chuan 5-1 in HAL, Bangalore an hneh a. Aizawl FC tan hian Lalrintluanga’n goal 2 thunin Michael Lalremruata, Johny Lalfakzuala leh Francis Zonuntluanga te’n goal 1 theuh an thun a ni. Aizawl FC hi chak mah se qualify-na chance an nei chhe hle a. Mohammedan Sporting Club leh HAL, Bangalore inkhelh result azirin an qualify-in an qualify lovang.

Tute nge khel?
Aizawl FC hian Mohammedan SC an hneh loh tuma an squad kha an siksawi nual a. 4 – 3 – 3 atangin 4 – 4 -2 formation rawn hmangin Goalkeeper ah Msa bawk a rawn awm a.. Defender ah Dinpuia aiah Lansning atang lak thar Malsawma leh Zohmangaiha an awm a. Veilamah Ricky a awmin dinglamah Thomas aiah Thazuala a lut thung.

Midfield laiah Johny leh Francis awmin vei lamah team captain Rammawia a awm a, dinglamah Shimla Youngs atanga lak Lalrintluanga a awm a, hmatawngah Zirtea leh Michael te an awm bawk.

First half-ah Aizawl FC in goal hnih phawt !
Season hmasa lama I-League khel pha HAL, Bangalore hian an match hmasa berah Aizawl FC hi hneh an tum hle a. Players pawh an nei chhe lova, an tang hle a ni.

Inkhelh tan phat atangin Aizawl FC hian an nawr nghal a, passing game mawi tak an khel a ni. Inkhelh tan atanga minute 18 na velah Aizawl FC hian HAL lamah goal hnaiah free kick an hmu a. He free kick hi Rammawia an petin Michael chuan HAL defender palian ho kar atangin mawi lutuk tak maiin a tauh goal a.

HAL lamah hian Mizo player Samuel-a a awm a. Samuela thawhrah sengin RC Prakash chuan HAL tan an siphurh a rawn sut ve leh nghal mai a. Aizawl FC lam hian dinglam sir atanga Rammawia ball cross chu Lalrintluanga’n over head kick mawi lutuk tak maiin a thun a. Goal dang a luh belh lova, half time a ni a. Aizawl FC in 2 – 1 in hma an hruai a.

Second half-ah goal thum !
Aizawl FC lam hian bul an tan tha hle a. Mahse ruah a sur avangin ground a nal deuh hlek a. HAL lam hian long ball an pet uar deuh zawk a, an tlan chak an hmang tangkai hle bawk.  Pumraw lian zawk HAL player te an hlauhawm thei hle. Mahse Aizawl FC denfender te’n HAL hmatawng te tan chance an pe duh bik lova. Aizawl FC lam an insiamtha thuai a, an khel tha tial tial a. Mawi takin HAL defender ho an thiat a, Johny-a goal ropui a thun a,  3 – 1 a ni der mai.

Aizawl FC players an inthlak kual a, Zirtea la chhuakin Brandon-a an luhtir a. Hemi hnu lawk hian Mohammedan SC lam a goal thuntu bawk Francis chuan Aizawl FC tan a thun ve leh a. Johny-a ke a nat deuh avangin a aiah Valpuia a rawn lut ve leh a. Hun tawp dawn hnaiah Rintluanga bawkin Aizawl FC tan goal khat dang thun lehin  5 – 1 Aizawl FC an chak ta ni.

Tlangkawmna
ZoFooty chuan Aizawl FC Manager Pu Hmingthana kan be fuh hlauh mai a. Pu Hmingthana chuan “Kan match hmasa berah kan chak lova, kan mualpho tawh a. Nizan lamah te kan infuih nasa a, vawiinah chuan kan khel tha tak zet zet a, Pathian zarah kan chak a ni. Player te an kheltha vek a. Abikin Rammawia a kheltha hle a, midang tan pawh a siamsak nual a ni. Kan player thar Malsawma pawh a khel tha khawp mai.” tiin a sawi.

Aizawl FC hian an match hmasa zawkah 6-1 ngawtin Mohammedan Sporting Club an hneh lova. Mahse tunah erawh 5-1 in HAL an hneh ve thung. Aizawl FC players leh coaching staff te an fakawm hle.  An chak loh kha tan nan hmangin insiamthat nan an hmang a, a lawmawm tak zet zet a ni. Aizawl FC hian luhna chance an nei chhe hle a, chhiarkawp dan anga chhut phei chuan tla chiang sa an ni tawh a ni. Mahse Football-ah chuan engpawh a thleng thei a. Chuvang chuan engmah la sawi theih a ni bik chuang lo a ni.

Aizawl FC hi qualify lovin tla ta pawh ni se, Aizawl FC hian nasa takin an hlawkpui tho a tih ngam. Players te’n tawnhriat tha tak an neih phah a. Inrintawkna an neih phah ang a, he qualifying an khelh hi a thlawn dawn lo a ni.