Federation cup khelh mekah vawiin ah khan Semi Final match hnih na chu East Bengal leh Prayag United ten an khel a. East Bengal chuan 2-1 a hnehna changin Final an lut ta a ni.

An inkhelhna hmun hi Salt lake stadium, Kolkata a ni a. East Bengal tan chuan an home ground ani a. Advantage chu an nei sa phawt. Bakah anni lam hi nikum leh kum hmasa lama lo champion tawh anni a, Federation cup ah chuan Mohun Bagan dawta record nei ṭha ber an ni. Inkhel an ṭan a, Prayag lam hi an zam eih lo a, inkhel ṭan phat atangin game hi a ṭang nghal at a ni ber mai. An in nawr tawn zak zak a, goal thun hmasa zawk nih an tum hle a, goal teuh deuh deuh a pet a awm nghal nual mai.

Minute 16 naah prayag lamin Snehasish Datta goal hmangin hma an hruai nghal ta mai a. East Bengal hian an rawn bei let na sawt khawp mai a, Alan Gow  chuan East Bengal tan minute 37 naah a rawn ti goal ve lehnghal. Inkhel a hmuhnawm chho a, game pawh a ṭang tulh tulh a, Yellow card pawh a awm nual ta reng a. First half chu goal dang lutlo in a tawp ta.

Second half pawh chu dan ngai te in game a ṭang nghal a, card pawh an phawrh leh nual. Mahse goal a lut hleithei ta tlat lo. Mahse Prayag lam an khel rough ta deuh a, Joshimar Dasilva Martins chuan minute 77 naah chuan double yellow a hmu. Deepak Mondal pawh chuan minute 81 naah tho chuan double yellow leh in Prayag lam chu player pakua chiah an ni ta a ni. Minute 82 naah chuan Khan Thang Paite chuan Orgi Penn cross phei chu pet goal leh in he goal hi an chak pui ta a ni.

Final :  Final ah hian Salgaocar leh East Bengal te hi an in tum dawn a. Final hi 29 September 6:00 PM-ah khelh tur ani a. East Bengal hian Final vawi 14 lut tawhin vawi 7 anchampion tawh a. Salgaocar lam hi vawi 6 lut tawhin vawi 3 an champion thung. East Bengal hi 2009 leh 2010 a champion anni a, tunah hian an chak leh chuan hat-trick an siam thei dawn chiah ani. Salgaocar hi an champion hnuhnun ber 1997 bakah khan Final hi an la thleng leh miahlo ani.