Tunhnaia FIFA Awards an semchhuah hian thil pangngai tak a awm a, chu chu Barcelona football club an lang tam em em ṭhin hi a ni. FIFA in Barcelona a duhsak vang lam ni lovin, players te leh coach te thiam vang a ni e.

FIFA Awards 2011 ah pawh Barcelona bawk hi an cheṭha lawrlak a, Messi chuan FIFA Ballon d’Or a dawn a, Pep Guardiola pawhin FIFA World Coach of the Year 2011 a dawng bawk.

FIFA World Coach of the Year (men): Pep Guardiola (barcelona)

Kum 2011 chhung khan Barcelona hi competition hrang hrang parukah an tel a, chung zinga pangaah chuan an champion vek!!! Field chhungah Messi, Xavi leh Fabregas te ho thawhrah chu a ni tehmeuh mai a, mahse an khelhdan tur lo ruahman a, players te enkawl a, field chhunga an inrem dan tur lo chhûtchhuak thlap ṭhintu chu a naupan lai aṭanga Barcelona fan ruh em em, tuna Barcelona coach ni ta Pep Guardiola hi a ni. Kum 2011 chhunga Barcelona hlawhtlinnaah hian a pawimawhzia chu sawinawn kher a ngai awm lo e.

Guardiola hian kum 2011 chhungin Barcelona chu Champions League, La Liga, Spanish Super Cup, Club World Cup leh European Super Cup te a lakpui a, Copa del Rey ah final a thlenpui bawk. Coach of the Year atân hian a ni lo thlan tur an awm lo a ni ber mai.

Vote tla zawng zawng aṭangin Guardiola hian 41.92% zet a hmu a. Sir Alex Ferguson (Manchester United) chuan 15.61% hmuin, Jose Mourinho (Real Madrid) chuan 12.43% a hmu bawk a ni.

FIFA World Coach of the Year (women):  Norio Sasaki (Japan)

Mipa lamah Barcelona in award an la zo deuh vek a, hmeichhe lamah chuan Japan an langsar kher mai. FIFA Women World Cup 2011 a Japan champion puitu, Norio Sasaki chu FIFA World Coach of the Year for Women’s football-ah thlan a ni.

Norio Sasaki hian vote 45.57% a hmu a, Pia Sundhage (USA) chuan 15.83% hmuin, 10.28% hmutu Bruno Bini (France) chu pathumna a ni.

FIFA Coach of the Year hi khawvel ram hrang hrang national team coach, players leh journalists ten an thlan a ni. An inthlan dan hi mipa in mipa, hmeichhiain hmeichhia tih ang zawngin an kal nghe nghe.

FIFA Presidential Award: Sir Alex Ferguson (Manchester United)

Kum 70 a upa, Manchester United manager Sir Alex Ferguson chu football tâna a thawhhlawk em avangin chawimawi a ni a, FIFA Presidential Award hlan a ni. Award hi FIFA President  Sepp Blatter hnen aṭangin a dawng.

Sir Alex hian November ni 6, 2011 khan Manchester United manager a nih champha 25 na a hmang a, hemi chhung hian trophy chi hrang hrang 30 chuang a la hman a ni. Heng zingah hian Premier League title 12, FA Cup 5, UEFA Champions League 2 leh FIFA Club World Cup 1 a tel nghe nghe.

FIFA Fair Play Award: Japan (Women’s team)

March 2011 a lirnghing nasa tak tuar a, harsatna tamtak paltlanga FIFA Women’s World Cup champion ni thei Japan hmeichhe football team chu FIFA Fair Play Award hlan a ni.

He award hi Japan FA President Junji Ogura leh team captain Homare Sawa ten a hmunah hian an dawng.