FIFA AWARDS SEM A NI; KHAWVELAH RONALDO A THIAM BER

Zanin khan Switzerland khawpui pakhat Zurich – ah The Best FIFA Football Awards 2016 sem a ni a, khawvela footballer tha ber atan Cristiano Ronaldo thlan a ni.

The Best FIFA Football Awards hi a vawikhat semna a ni a, FIFA World Player of the Year sem thin tihtawp a nih hnuah Ballon d’Or nen kaikawpin FIFA Ballon d’Or kha kum ruk (6) zet sem a ni hman a, kumin atangain The Best FIFA Football Awards hi kalpui a ni.

He lawmman semnaah hian tunhmaa award dang kalphung ang tho in thuthar lakhawmtu te, ram hrang hrang national team coach leh captain te bakah mipuiin ‘vote’ an nei a, an vote neih hlut zawng hi 25% theuh a ni. He award dawng thei tur hian kum 2015 November ni 20 leh kum 2016 November ni 22 chhunga an chet that dan en a ni.

Ronaldo, Ronaldo, Ronaldo !

Kum 2016 kha Portugal captain Cristiano Ronaldo tan kum tha a ni. Real Madrid tan inelna hlu ber UEFA Champions League a chawi bakah Club World Cup-ah a champion pui a, an ram Portugal chu a vawikhat nan European Championship – ah a champion pui bawk. Ronaldo hian mimal chawimawina hlu pahnih UEFA Best Player in Europe leh Ballon d’Or te kumin hian a dawng tawh bawk a, a lungthu kim nan ‘The Best FIFA Men’s Player’ atan thlan a ni.

He award dawng thei tur a tehfung an dah hun chhungah Ronaldo hian nomawi pathum a chawi bakah game 44 khelin goal 42 a thun a, assist 14 a nei bawk. Kum 31 a upa hian kum 2016 chu a tan kum tha tak a nih thu leh chawimawina a dawng thei chu a lawm thu a sawi a, Barcelona player tumah an kal ve lo erawh pawi a tih thu a sawi rualin a hriatthiam thu a sawi lang zauh bawk ! Ronaldo hnuaiah hian Lionel Messi leh Antoine Griezmann te an awm a ni.

Chawimawina dang

Hmeichhe lamah USA captain Carli Lloyd chu Best Women’s Player atan thlan a ni a, kum 34 a upa hian Germany tana Olmypic gold medal hlawh chhuaktu Melanie Behringer leh Brazil thiampuinu Marta te a khum.

Leicester City boss Claudio Ranieri chu Men’s Best Coach atan thlan a ni a, ani hian rinkai lo Leicester City chu Premier League nomawi a chawipui bakah UCL Round of 16 a thlenpui a ni. Italian pachal hi UCL – a Real Madrid champion puitu Zinedine Zidane leh Euro 2016 – a Portugal champion puitu Fernando Santos te’n an tluk lo a ni.

Hmeichhe coach tha ber atan Germany coach hlun Silvia Neid thlan a ni a, ani hian a vawikhat nan Olympic – ah German nulate gold medal a lakpui a ni.

Kum 2016 chhunga footballer pet goal mawi ber chu Malaysian club Penang a khel Mohd. Faiz Subri a ni. Kum 29 a upa forward hian Malaysian Super League – a Pahang an hmachhawn tumin yard 35 vel atangin nalh takin free-kick a pet lut a, a mawi bawk aniang vote tla zawng zawng atangin 60% vel zet a hmu pha nia !

The FIFA Fan Award chawimawina chu Borussia Dortmund leh Liverpool te hnenah hlan a ni a, anni club pahnih hi Europa League Quarter-final April thlaa an inhmachhawn tum khan Hillsborough chhiatnaa thi te hriatrengna ni pah fawmin Liverpool hla chuam ‘You’ll never walk alone’ tih chu club pahnih tantute hian lungrual tak leh urhsun takin an sa ho thei a ni.

Copa Sudamericana final khel tur a kal Chapecoense player – te chhiatna tawh khan khawvel a deng chhuak tak meuh a nih kha. Kha chhiatna thlen hnu khan final – a an hmachhawn tur Colombian club Atletico Nacional chuan CONMEBOL hnenah he inelnaah hian Chapecoense hi champion tir ni rawh se tiin thu an thlen a, CONMEBOL pawhin Nacional duhdan hi a ti hlawhtling zui a. He an chet dan mawi leh zahawm tak avang hian Atletico Nacional chu FIFA Fair Play Award hlan an ni.

FIFA FIFPro World XI atan heng mite hi thlan chhuah an ni bawk.

Goalkeeper : Manuel Neuer

Defenders : Dani Alves, Gerard Pique, Sergio Ramos, Marcelo

Midfielders : Luka Modric, Toni Kross, Andres Iniesta

Forwards : Luis Suarez, Cristiano Ronaldo, Lionel Messi

3 thoughts on “FIFA AWARDS SEM A NI; KHAWVELAH RONALDO A THIAM BER

  1. Pingback: otc cialis

  2. Pingback: buy cialis online

  3. Pingback: Buy viagra low price

Leave a Reply