India ram chauh ni lo, khawthlang rama manager tam takin ram tana khel tura an player te ‘phal taka release’ lem lo hi sawi tur an leh zauh thin. Hei hi a chhan ber nia lang chu kha player khan ram tana a va inkhelhin hliampui lo tuar ta se, hlawh pe tu a khelhna club – in an tuar ber thin.
Hetiang laka club te venhimna tur leh thawidamna turin kum 2012 atang khan FIFA hian Club Protection Programme hi a kalpui tan a, insurance policy ang deuha kalpui niin ram tana khel tura koh te chu an inkhelhnaah emaw training ground – ah emaw an inhliam a nih chuan an hlawh zat leh an inhliam nat dan a zirin FIFA hian club hnenah zangnadawmna a pe thin a ni.
He policy hnuaia zangnadawmna hmu tur chuan player kha professional a ni ngei tur a ni a, tin, a tlem berah a zawnin ni 28 tal a inhliam tur a ni. Hei hian thihna emaw, piansualna emaw a inenkawlna senso lam a huam lo a, a inkhelh loh chhunga a hlawh pe reng tu club te thawidamna a ni ber.
FIFA – in pawisa a pek theih sang ber hi player pakhatah Euro 7,500,000 a ni a, chu chu India pawisain Rs. 67,47,00,000 (Cheng nuaih sang ruk vel) a ni. He policy hi chik taka zirchian tham a ni a, huam/huam loh hrang hrang ken tel a ngah hle.
Footballer lar zingah he policy vanga an club te’n pawisa an dawn an awm nual tawh a, Italian midfielder inhliam ching ve tak Ricardo Montolivo kha ram tana a khelh naah a inhliam avangin Milan khan euro maktaduai 2 vel an lo dawng tawh a, tin, Liverpool player Joe Gomez pawh ram tana a inlan tuma a inhliam avangin a club hnenah FIFA hian zangnadawmna a lo pe tawh bawk.
India club zingah hian hriat theih chinah Kerala Blasters chiah hi Club Protection Programme hmanga pawisa dawng hi an la awm a, 2019-20 season khan an captain Sandesh Jhinghan chu India training camp – ah a inhliam a, an defender rinrawl ber hi season tluanin an chhawr thei lo. He policy hmang tangkaiin Blasters hian FIFA – ah zangnadawmna an dil a, India pawisa Rs.7,00,00,000 (Cheng nuaih sawmsarih) vel an dawng nia hriat a ni.
