October 15-19 chhung hian Aizawlah FIFA Grassroot Football School atana trainer turte tan training neih a ni dawn a, AIFF aṭangin coaching department hotupa ber Scott O’Donell a lo kal dawn.
Australian football coach Scott hi FIFA-in India rama football academy an dina hotupa ber, an Technical Director a ni a, ani hi AIFF hnuaia coaching lamah chuan hotupa ber a ni thar bawk. Hei mai hi a ni lo, Scott hi Asian Football Confederation hnuaiah Director of Coach Education a lo ni tawh bawk.
Ani hian Mizorama naupangte zirtir chhawng leh thei tur Mizo football coach ṭang lai leh coach ni thar duh thlan chhuah mi 28-te tan training a pe dawn a ni.
He FIFA grassroot football coach training-a tel duhte chuan MFA Office, City Park, Aizawlah September 7, 2012 chhun dar 12:00 hma ngeiin ziakin dilna thehluh tur a ni a, mi 28 thlan fel an nih hunah heng mite hming hi AIFF lama thawn thlak leh tur a ni.
Dil thei chin chu NIS Diploma nei, AFC ‘C’ License nei chin bakah heng coaching certificate nei lem lo tan pawh pawl 12 pass chin, Sapṭawnga ṭawng thei tan dil theih a ni.
Dilnaah hian hming, pa hming, present leh permanent address kimchang, date of birth, educational qualification-te ziah lan tur a ni. Coach nilaite tan coaching experience ziah lan tur a ni a, coaching certificate neih xerox copy (attested) thil tel tur a ni. Coach la ni lo dil duhte tan educational qualification bakah football lama experience neih ang ang ziahlan bawk tur a ni a, document neih ang ang xerox (attested) copy thil tel tur a ni.
– Tetea, Honorary secratery, MFA