“Mizoram hi Myanmar leh Bangladesh inkara awm kan ni a… football âtchilhna ram niin zan lama khelh tur, TV lama chhuah theih tur ni bawk semi-professional league din tumin tan kan la mek a…” ka ti hman dek dek a, FIFA aiawh lo kalte chuan kut an beng ve hial.

July 30, 2012 khan All India Football Federation headquarters Football House, Delhi-ah ‘Organisation Review Meeting by FIFA’ neih a ni. FIFA-in AIFF inrelbawl dan an hre chiang duh a, chumi atan chuan state paruka football association-te an sawm a, Mizoram Football Association pawh sawm an ni a, MFA aiawhin ka kal ve.

Eng meeting chiah nge?
He meeting hi chhawng tam taka neih a ni. FIFA lam hian AIFF chhungril ber thlenga hriat an duh a, a tihhmasawn dan tur an ngaihtuah dawn a, chuvangin mi chi hrang hrang nen meeting an ko.

AIFF Executive Committee-a a pawimawh chinte nen an inkawm zet a, Finance Committee lam an titipui leh a, I League club aiawh sawm bik mi pangate an kawm leh a, chutah state sawm bik parukte min kawm ve leh bawk.

West Bengal leh Goa-te kiangah sawm bik zingah kan lang ve nawlh mai a, mahni state association chanchin theuh kan sawi a, kan thlen chin, kan harsatna, kan hmathlirte min zawt. AIFF siam that an tumna lamah state lam kalphungte hriat chian hmasak an duh a, an dilchhutin an zawt chik hle.

Hei le Mizoram…
Mizorama football dinhmun sawi hun a thleng a, football ngaina state kan nih thuin bul kan tan a, naupang lama hma kan sawn chak dan leh state league mumal kan neih loh vanga puitlin hnua kan harsatna tawhte ka sawi lang. Players vannei chin state pawna khelin sum tam tak an hlawh a, anmahni ang tluka tha leh a thente chu pawna chhuakte ai pawha tha zawk ni chunga ‘chance’ an hmuh loh vanga hlawh nei mang loa state chhunga an khelh dante ka sawi a, chumi tihtawp tuma Mizoram Premier League bul tan tum a nih dante ka sawi chhuak.

FIFA aiawha lo kalte an lawm ve hle mai a, FIFA-a Performance Programme-a an Senior Manager Frederic Guillemonte chuan, “Indian football-ah beiseina thar siamtu in ni thei ang,” a ti a, min lawmpui thiam hle. FIFA Consultant lo kal ve Brandon pawhin ‘football culture’ siam thiam chu football tihhmasawnna tura a pawimawh thu a sawi zui a, Mizorama inkhel entute thlalak thenkhat a hmuhin, “Hetianga mipuiin an hlut chuan footballer tha tam tak in chher chhuak zel thei ang,” a ti.

Goa leh West Bengal
State dang sawi hun a thleng a, kan intiat lo ngei mai! Goa Footbal Association President Shrinivas Dempo hun a thleng a, ani hi chu Dempo SC neitupa, Dempo Group of Companies-a an chairman ni bawk, millionaire a ni. Goa football than dan leh an thlen chinte a sawi a, kawng engkimah an ‘professional’ em em mai a, sum an ngah a, khelmual an nei tha a, kum khata Goa FA sum che vel chu cheng nuai 100 chuang daih a lo ni!

Hei mai hi a ni lo, Goa sorkar-in football hi an ‘state sport’ atan tun hnaiah a thlang a, Goa football development council an din a, a bul tanna atan cheng veibelchhe 5 an dah thute a sawi; Goa-ah hian professional footballer thahnem tak an awm mek a, an awm belh zel theihna turin foreign club-te nen academy changtlung din tuma an inbiak thute a sawi bawk.

West Bengal football association (IFA) Secretary Utpal Ganguly chuan a sawi ve tan ta a, “State dang ang lo takin sum leh paiah harsatna kan nei lo… IFA office-ah hian hun puma hlawh neia chhawr mi 32 kan nei,” a ti a, Salt Lake Stadium chu a ‘hlui tawh’ tiin IFA-in anmahni pual khelmual din tuma hma an lak mek thu leh, Kolkata League atan sponsor mumal tak an neih thute a sawi a, Kolkata-ah cricket-in kua hreuh ve mek mahse football ngaihtuah chuan a la tê hle niin a sawi bawk.

Ka rilru te te chuan, “Heng state-te hi eng tin tin emaw kan hneh leh nawlh thin a… football hi chu kan khelh chi tak chu a ni chiang mai,” ka ti hial a ni.

FIFA Technical Director
FIFA Technical Director ni thin, FIFA Technical Adviser ni zui ta Jean Michel Benezet nen zan lamah kan intawng a; AIFF hotute pawh be pawp ngai mang lo Mizoram FA-in FIFA-ah pawh an hotu lian zinga mi kan titipui ve ta hial mai a, zan lamah dinner-ah inhmuin kan inkawm ve nual a, a lawmawm hle.

Chhun lama a intiam angin FIFA Performance Programme-a an Senior Manager Frederic chuan min rawn ko phei a, “Hei hi Northeast India-a state pakhata an football honorary secretary a ni a, football tuipuina state an ni a, anni ramah chuan cricket ringawt an ngaihven lo,” tiin fiamthuin a sawi a, Jean Michel chuan, “Cricket-in football a ei zo zel in ti si a, in state-ah tal chuan cricket chu in lo khap mai dawn em ni?” a tifiam a, a nui nasa mai.

Jean Michel-a sawi danin India hi FIFA-in a ngai pawimawh em em a, mihring tamna ram a nih piah lamah football-a hmasawn thei tur ram niin an hmu. Tuna AIFF inkaihhruai dante leh India ram football kal dan hrim hrim hi a ‘tunlai’ tawk lo a, hmasawnna tur tam tak a awm a, hmasawn thei turin ‘theihna’ a neih thute a sawi.
Mizoram tlawh turin kan sawm ve hram a, a nui suk ringawt!

Mizoram an hria e
FIFA hotu lo zinte tan Mizoram hriat thu a awm lo a, Burma leh Bangladesh-in a karcheh a nih thu atanga tan a ngai a; nimahsela football ngaina state kan nih thu an lawm hle. Hetiang kan sawi lai hian AIFF-in FIFA Academy a din tura Technical Director atana an dah Australian pa lian zet mai Scott O’Donell a rawn inrawlh a, “Mizoram hi FIFA Grassroot Football School dinna tura kan thlan hmasak ber an ni a, an naupangte hian football an thiam a nia…,” a rawn ti zui ve bawk a, a lawmawm duh ngei mai.

AIFF lam chuan tun hnaia Mizoramin football-a hmasawnna a neihte an hre fuh hle tawh a, ‘Jeje and Dika’ tiin Jeje Lalpekhlua leh Lalrindika Ralte-te hming ka bulah an lam ve reng a, I League second division-a club pahnih kan neihte an sawi a, Goa lama India junior camp-a kan Mizo player awm mekte pawh an lo hre khawp mai.

A tlangkawmna
FIFA hian Mizoram hi a hranpain an hre ngawt thei lo a, puih pawh an pui thei lo. Frederic-a hnenah FIFA atanga puihna awm theite ka zawt a, “Keini chuan AIFF kan pui thei a, anni lamin an puih tur chu an thlang mai a, state association hi a hranpain kan pui thei lo che u,” a ti.

Hei erawh a sawi a, “India hi football khawvela a thlen chin chu in hre vek ang a, he ti chung hian FIFA chuan hmasawn thei tur ram a nih tih kan hria a, he ramah hian tan lak zel kan tum a, nangni pawh in state-ah theihtawp chhuah ula, India ramah hian football hi a lian deuh deuh dawn a ni,” a ti.

Football hi thenkhat tan ‘hun khawhralna’ a ni a, thenkhat tan phei chuan, “atthlak leh tul lo,” pawh a ni ngei ang; nimahsela kan tlangval tam tak tan ei hmuhna a ni a, thenkhat tan phei chuan ‘eizawnna leh hmingthanna’ a ni a, India ram media liana a tha zawnga Mizo hming a lan zinna ber a ni a, kan game ngainat ber a ni bawk.

Source : Vanglaini
( Tete-a Article hi Zofooty in kan dil ang in chhuah chhawn min phalsak a, a chung ah kan lawm hle)