Khawvela football thuneitu sâng, Fédération Internationale de Football Association (FIFA) chuan Zirtawpni khan thuchhuah siamin, football players te chu Olympic Games ah ram tâna khel tura koh an nihin, club ten an kaltir ngei ngei tur a ni a ti.

Zirtawpnia FIFA executive committee ṭhukhawm chuan he thuchhhuah hi siamin, hei hian Under-23 players te chauh a huam thung a ni. Kan hriat ṭheuh angin Olympic Games ah hian Under-23 players te chauh an khel ṭhin a, team pakhata kum 23 chunglam pathum tel phal a ni bawk. FIFA hian ‘overage’ player te chungchangah thuchhuah an la nei lo.

He thuchhuah hi club ṭhenkhat tân chuan thu lawmawm a ni dawn hauh lo. International match calendar-ah London Olympics hi a tel loh avangin club ṭhenkhatten an player duh lai, chawlh hahdam mamawh ve tak takte chu Olympics ah hian tel an lo phal lo tawh ṭhin a. Kum 2008 Olympic Games ah pawh Argentina in Lionel Messi an ko a, Barcelona in an chhuahtir duh loh avangin court ah an inkhin phah tawh a ni. Kha mi ṭum khan Court of Arbitration for Sport (CAS) chuan Barcelona thiam a chantir a, mahse Barcelona hian Olympic ah an kaltir ta tho a ni.

London-a khelh tur Olympics Games football hi July ni 25 a ṭan tur a ni.

source: uk.reuters.com