FINAL ROUND LUT TUR ZAWNNA : MIZORAM VS ASSAM

Kum 2014 a an champion hnuah Mizoramin Santosh Trophy final round an la lut ziah a, Assam hian nikumah final round lut pha lo mahse a hma kum zawnin an lut tawh a, team chhia an ni lo.
 
Naktuk chawhnu dar hnihah state pahnihte an inhmachhawn dawn a, a chak zawk zawkin final round an lut dawn. A hmun a en duh tan cheng 30 sen a na dawn lo a, Lammuala Mizoram team tawiawm thei lo tan Zonet chuan TV bakah an facebook page-ah ‘live’ in an pe chhuak ang.
 
Dinhmun tha zawk Mizoram
 
Group A ah Arunachal Pradesh, Assam leh Mizoram awmin Arunachal an tla chiang tawh a, Assam leh Mizoram an la dam. Subrata Bhattacharya enkawl Assam hian Arunachal 1-0 in an hneh a, Lalsangzuala Hmar enkawl Mizoramin 2-0 in hnehna an chang thung. Team pahnih kan buk dawn a nih chuan ‘goal difference’ ah Mizoram an that zawk avangin naktuk tlaia kawr sen ha tur Mizoram tan final round lut turin ‘draw’ a tawk ang.
 
Arunachal an hneh tumin Mizoramin goal thun theihna hun remchang an hloh hnem a, goal hnih thun mahse goal pakhat zawk hi penalty atanga thun a ni. Mizoram khan game mawi tak khel mahse a pawimawh ber goal thun lamah an hmatawngte ‘finishing’ a tawih tawk lo.
 
Mizoram vanduaina
 
Naktuk tlai inkhel turah Mizoramin vanduaina pakhat an nei a, chu chu Assam aia hahdamna hun an nei tlem zawk hi a ni. Assam hian Mizoram aiin ni hnihin hahdamna hun an ngah zawk a, Arunachal an hneh rualin Mizoram hmachhawn turin an inbuatsaih nghal thei. R.Malsawmtluanga captain na hnuaia khel Mizoram erawhin Arunachal an hneh hnuah ni hnih awrh inbuatsaihna hun an nei a, amaherawhchu December thla atanga training ngawrh taka nei tawh Mizoram team fitness a tha a, Mizo mipuiten an chungah beiseina sang tak an nghat.
 
Entu mipui
 
Santosh Trophy sawi chuan entu mipuite sawi tel loh theih loh a ni. An match hmasa zawkah Mizoramin tawiawmtu an nei chhe lo a, mahse naktuk tlaiah hian tantu neih that a pawimawh lehzual dawn. 2014 Qualifying Round match hnuhnung berah tantu ngah Mizoramin chak an mamawh a, hun tawp dawn tepah Manipur lakah chakna goal thunin final round-ah an champion zui.
 
Naktuk chawhnu dar 2-ah, Mizoram tan Lammual pan ang aw.
Posted in Mizoram, Ramchhung, Tualchhung.

Leave a Reply

Or