UEFA Executive Committee chuan football game a lo that zawk theih nan September 2009 khan “financial fair play concept” chu lungrual takin an pawm a. He “concept” hi football association hrang hrangte paw’n pawmin a thil tumte chu hengte hi a ni:

1. Club hrang hrang sum enkawlna kawngah inkaihhruaina tha zawk leh felfai zawk neih a nih theih nan;
2. Players-te hlawh leh transfer fee sang lutuk tur ven nan;
3. Club hrang hrangte an sum lakluh mila an kal theih nan;
4. Thangtharte kaihhruai kawngah leh infrastructure lamahte “long-term” investment a awm theih nan;
5. Tun atanga hun lo kal zel turah European club football a tawp mai loh nan;
6. Club hrang hrangte’n a hun takah an ba an rulh theih nan.

A chunga thiltumte hian European football-a club hrang hrangte pawisa hman danah UEFA a inrawlh a tul zia a ti lang awm e.

Tunhnaiah club tam takte’n sum lamah an indaih lo nasa em em a. Ram hrang hrang economy a tlahniam bawk nen, Europe-a club hrang hrangte chuan harsatna namen lo an tawh phah a ni. Hei vang hian club dang laka an bate, an hnathawkte hlawhte leh tax thlengin a hun takah an pek theih loh phah ta a ni.

Heng zawng zawng vang hian UEFA chuan dan hrang hrang a duang thar a. Club tin te’n an sum dinhmun uluk zawka an vawn a ngai tawh dawn a, hun bituk chhungin an pawisa hloh zawng zawng lak let dan an ngaihtuah a ngai dawn a ni. He dan hnuaiah hian club-te chuan an sum lakluh aia tam an hman a rem tawh dawn lova, transfer fee zawng zawng leh an hnathawkte hlawh a hun taka an pek a ngai tawh dawn a ni.

Club hrang hrangte’n dan thar hi an zawm leh zawm loh lo monitor turin Club Financial Control Panel chu din a ni a. May 2010 khan UEFA Executive Committee chuan UEFA Club Licensing and Fair Play Regulations chu an pawm ta a ni. Heng dan thar hi kum thum chhunga hman tan tur a ni.