Mizoram local football-ah insawpna nasa tak tak a thleng fo va, tunhma deuh chuan khawvel ram changkang zawkah pawh a tha zawk tena a chhe zawk chin vak ang chi hi sawi tur a awm nual.
Kumin HPC Cup-ah Zobawk South in 21-0 a Hrangchalkawn an sawp khan titi a titam a, ‘inzahlohna rawngkai a ni,’ ti tawk leh ‘engati nge goal thun belh tawh lo tura in hrilh loh,’ etc tih zawhna hrang hrang kan dawng nawk mai a, tun tum chu hemi lam hawi hi tawite tarlang ila a tha awm e.
Football danah hian insawp viau loh tur a ni, tih dan a awm lo va, ram leh ram ang pawhin he kum sangbi tharah hian insawpna a la thleng fo.
April 11, 2001 khan 2002 FIFA World Cup qualifying match-ah Australian leh American Samoa national team te International Sports Stadium, Coffs Harbour, Australia-ah inhmachhawnin Australia hian 31-0 ngawtin an nghaisa. Hemi tum hian Socceroos player Archie Thompson chuan goal 13 zet thunin ram leh ram inkhelhnaa, match khata goal thun tam ber record a siam nghe nghe a ni.
Amaherawhchu, ‘Beautiful Game’ tia a hming an phuah, khawvela infiamna lar berah hian nungchang mawi leh mahni khingpuite zahna lantir hi thupui lian tak niin Fair Play ngaih pawimawh a ni a, Fair Player Award lawmman pawh hi mimal chawimawina aiin a tam zawk ngei ngei tur a ni.
Tin, football-ah hian dan bu-a ziah lan loh tihdan phunga neiha zawm thin hi a awm nual bawk. Lehlam player inhliam an awm a, an enkawl theih na’na a inhliam lo lamina ball petchhuah te, hetianga ball petchhuah, a throw-tute lamin a petchhuaktu an han pe thin ang te hi thil mawi, mualchhunga chetdan mawi a ni. Zawm ngei ngei tur tih erawh a awm chuang lo.
Tin, goal thun dan leh goal thun lawm danah te hlei hlei hian lehlam rilru tur ngaihtuahpui chunga chet ze mawi lantir a tul a, uchuak tak emaw lehlam pawl zahpahna nei lek lova goal thun leh lawm (celebrate) chu inhrem theihna a ni!
Eg. Tuemaw chu lehlam player te hmakhalh vekin an keeper nen lam bum vek tawhin goal ruaka thun mai thei dinhmunah a ding a, mahse, pet goal tha hle hle duh lovin a mawngin emaw a luin emaw si goal kher ta se, a goal miau avangin goal-a pawm tur a ni.
Amaherawhchu, a khingpuite zahna nei lo va, a mawnga a nawr goal emaw a sik goal kher avangin Yellow Card hmanga hrem tur a ni. Tin, hemi hnua lehlam tana hmuh hrehawm khawpa a lawm zui a nih chuan Red Card pein mual atanga hnawhchhuah tur a ni.
September 15, 2009 a English Premier League-a Manchester City in 4-2 a Arsenal an hneh tumin Arsenal striker hlui Adebayor chuan a club hlui lama a goal thun chu Arsenal fan te hmaa uchuak taka ava lawm kher avangin £25,000 (Rs. 22,46,027.34) chawitirin match 2 khel thei lo tura hrem a ni.
Nikum June thla khan Spanish youth team coach pakhat chu an khingpui 25-0 ngawta an sawp avangin ban a ni!
June 3, 2017 khan Valencia khuaa inbun Benicalap C (Under-11) team leh Serranos B Under-11 te inkhelin Serranos B hian 25-0 in an khingpuite hi an sawp a, amaherawhchu, heti em ema insawp hi football thiamtir aia maha football tuichilh tir an tum mek, naupang team tan a tha lova hriain coach hi an ban ta a ni.
Hei hi Benicalap C match hnuhnung ber niin league-ah a mawng berah an awm a, a mawngphaha awm satliah mai lovin point khat mah an hmu lo. Match 30 khelin an lamah goal 247 a lut bawk.
Spanish youth football-ah hian insawpna chu thleng fo mah se, an khingpuite laka 10 a hma an hruai tawh chuan an thunbelh tha duh ngai tawh lova, hei hi an khingpuite zahna leh football a an tui zel theih na’na tih a ni. Hemi tum hian a chak lam coach hian a naute chu goal 10 an thun hnuah pawh nawr zel tura a tih avangin Serranos Board chuan an ban ta a ni.
Naupang football zirlai kum 12 hnuailamte chu hmun tam zawkah inkhel kalphung leh training ang chi senior player te anga pangngai taka neihpui an ni ngai lo. Zalen leh nuam ti taka football khelhtir a, tui tir kha hetiang rualah hi chuan an tum hmasak ber a ni thin.
Kum 14 hnuailam te chu an hriselna thlirin ‘Heading’ zirtir loh duhthusam a ni a, tin, an zir a nih pawhin chawl lovin minute 15 aia tam tihpui loh tur a ni. Kum 17 hnuailam te chu player puitling an la nih miau loh avangin minute 90 khelhtir hi phal a ni lo va, U17 Tournament-ah chuan a tlangpuiin match khat rei zawng pawh minute 70 a ni thin.
A tawp berah chuan, football-ah hian insawp hi a thiang lo tihna lam ni lovin awmze nei lo va, inzahpah lo taka mahni khingpuite nawp chiam hian mi football tuina a tihreh theih bakah zahna nasa tak leh rilru lama nghawng tha lo zawk a thlen theih avangin football-ah chuan an duh ngai lo a ni.
